2 Corintios 9 - Nuevo Testamento Toba Maskoy

¹ Mankaimelhkak anaktalheskesek ko'o vakkahak aktemakha askeltemo la elankeskasokhak alpasmoma apkellelto nak apkelpokkenammap.

² Nkanek asiave ko'o anmahai'o nkek apvalho'ok ketlhengkap ma'a. Askeleltennaske lhta engelialheng'a nak hengke'e Macedonia nkalhkek na ko evalhok aniem'o ketlhengkap ko Acaya, iantelhkapa lhta apkelpeneskamo apkelpakmeiasma ellankeskasekhak hata alpasmoma kakpota ellapaskesek engelialheng'a mo'ok nekha la'a. Apkenmak'a alhta nhan ketlhengkap elietkesangkok aptaiangkolha ko Macedonia aniem'o apkelvetai'a alpaikehka apvalho'ok ma'a neksa apkellankesaikokha alpasmoma po'ok.

^3-4 Kolhva smak'ak allapaksek engelialheng'a askeleltennaso lhta sekhe lhta kakpota elpasmok elpenaksek na apkellankesekha alpasmoma amanie asvekta ta ham, asketlhelhma'ak hata nhan engelialheng'a akieto hengke'e Macedonia. Koka melelpeneso la apkellankesaikokhak alpasmoma, henmankaksek hatelhalha napaqtavek asketlhelhma'ak, ketlhengkap aniem'o melpeneskamo.

⁵ Ka nkeniem'ak allapaksek engelialheng'a kakpota ellankesekhak alpasmoma la apkelpeneskamo lhta apketlheianma have niapak ankek ellangkok hata ketlhengkap ma'a. Ntasek elpenaksek apkellankesekha amanie nelvekta ta ham kakpota elvetak asketlhelhma'a anmahai'o nkek apvalho'ok ketlhengkap ellankesokha. Koka apkellankesakho la ketlhengkap nelvakto ta ham, nkotlhenek hata nhan apvalho'ok asketlhelhma'ak hellai'a ko'o asvaktamo la ham.

Akpaihekha envalhok nengaikamok qaselhaha

⁶ Ellailhonoho, apto la apkanma atketse, ketsek hata nhan enaklhek akielhna m'a. Apto la nhan apkanma akiavai'a, nlhaniek hata nha ngkotnek apnaklhema akielhna m'a.

⁷ Ntasek ellangkok qaselha apmak'akha la ellangkok apvalho'ok apankavek koka, metka anmaiosak'a apvalho'ok, kanhan metka nema aliatekamok. Apkamelakmek Eniapom Neten apto la apkaikamok qaselha akieplomo akpaihekha apvalhok.

⁸ Apvankek Eniapom Neten ellangkok ngkeskama nkek qaselha aktaqmanma kakpota mankaimalhke mota qaselha apanko'ok, nkoliekangvomok hata kakpota nhan elpasmok po'ok.

⁹ Ka ktemo nak na aktalhesammalhka Eniapom Neten Apaivoma hengke'e: «Apkennasektengkek qaselha apankok apieseksek anak metka apkelletsekama, mankomaskengvaiakmok na apeivomo apankok ma'a».

¹⁰ Apkankek Eniapom Neten aktek apto la apkanmo mota, apkankek na nentoma aptoma la'a, ellangkok hata nhan ketlhengkap nkeskama aktek nkeskama ta nhan nkotnek akielhna aniem'o apkelpeivomo ketlhengkap.

¹¹ Nkolhnangkok hata nhan lhamakho aktemakha nkeskama qaselha ketlhengkap kakpota ellangkongvomok metka apkenmeiavkesammakpo qaselha apanko'ok. Ennengko'o toka angelletsakhak hata alpasmoma apkellankesaikokha lhta ketlhengkap, avanhek hata nhan etnangkok gracias Eniapom Neten engelialheng'a m'a apkellelto apketlhevai'a.

¹² Angenmaskeskakhak hata alaimommalhkelha la ma'a aniem'o netsekha alpasmoma, kakpota nhan eltangkok akiavai'a gracias Eniapom Neten ma'a.

¹³ Hata apkelvet'o ta m'a apkelpasmoma ketlhengkap ma'a, nkotlhenek hata nhan apvalho'ok ma'a ketlhengkap apkellelto apkelleliehekho ania'a aktaqmanma aniem'o Cristo apkellanemakha etnangkok. Netamen hata m'a eltakneskasangkok, ellahok nahan Eniapom Neten apvesai'a aniem'o metka apkenmeiavkesammakpo mota qaselha apanko'ok ketlhengkap apkellaikamok aplhamakho engelialheng'a m'a.

¹⁴ Elelmalhneskesek hata nhan Eniapom Neten ma'a akieplomo apkellamelaiakmo ketlhengkap, aniem'o akiavai'a nkek qaselha altaqmelo apkelvetai'a aniem'o Eniapom Neten.

¹⁵ Hai, gracias ennengko'o nentangkok Eniapom Neten aniem'o qaselha metka akianmoma hengellaikamok ma'a, akiavai'a nkek na aktaqmanma qaselha, mammopvana anlhenek ma'a.