2 Corintios 5 - Nuevo Testamento Toba Maskoy

¹ Neniokha nak malha lhema la pa'at akmaskengvaiam anak. Koka aktevaselhko la m'a, neliavek koka nhan ennengko'o hengellangkok hata Eniapom Neten mo'ok neliokha m'a mankomovana nhan nkomaskengvomok akieto neten, malha nhan pa'at la m'a have kto nak apkelanai'a nak enenlhet.

² Neksa nelloma mokhom hengke'e nalhepop anak nlhengama enneniek ngkanek avanhek nemmahai'a angenmangkok ma'a malha nengakhaiangkolha mo'ok neniokha akieto m'a neten.

³ Nkolhek hata hengel·hatsoskaso m'a malha nelentalhnema nak hengke'e neniokha nak, koka have ta m'a nengalhnai'o, angetlhevekhak hata alhnankok neniokha.

⁴ Neksa nellaniemhaikama hengke'e neliokha nak malha pa'at, nelleklhangvek aniem'o nellengaiangko, malha niekhe mangeleltemo nkotvasalhkak neniokha nak akmovana nak nkomaskengvomok, koka nengeleltavek niekhe angetlhevangkok kolhvave nak alhnankok neniokha mankomaskengvaiam.

⁵ Hengellangkek ennengko'o Eniapom Neten Espíritu akto aktemeskeskama have niapak ma'a angetlhevangkok hata ma'a.

⁶ Hai, neliavek ennengko'o ngkotnek hata m'a. Neksa nellaniemhaikama neliokha nak hengke'e nalhepop anak, taiepek ankek Apveske m'a.

⁷ Mongapvankek angvetak ma'a, koka mongeliaskeiam anak hengellangkek neliennaktema kakpota angelloka mota,

⁸ mongeliaskeiakmok ennengko'o m'a. Ka nkanek nenmak'a niekhe angelieniekhak neliokha nak kakpota angenmangkok ma'a angaqhengvomhok lheme Apveske m'a.

⁹ Ka nkeniemai'ak ma'a angelienlhanmangko mota anlekkeskasama mota apvalhok Apveske neksa mokhom nellaniemhaikama hengke'e neniokha nak, hata nhan angelienlhanmangkok angellekkeskasama apvalho'ok Apveske m'a nengaqhengvakmo ta m'a napaqtek ma'a.

¹⁰ Hai, nenlhamakho ta lhma nkek ham angelanvakhak ma'a akieto m'a apkeliekpelkemelha nentaiangkolha Cristo, moklhem'a ta angetlhevangkok akianmoma aktemakha la nellanai'a ngkolatsekama, nlho ka la aktaqmanma neksa nellaniemhaikama hengke'e nalhepop anak.

Apkellasekhekho Eniapom Neten enenlhet'avok

¹¹ Neliavek ennengko'o ntasek angellaho mota Apveske, angelienlhanmangkok na nellannengvaiam enenlhet'avok kakpota meliaskamek ma'a. Apiavek Eniapom Neten iokhalhmek netlheianma ennengko'o, askeltave niekhe nhan eliohok ketlhengkap.

¹² Have nhan neleltemo eltaqmelkasama nelvesai'a hengetlhenek, vanlha koka nengeleltemo angetlhengkeskakhok apvalho'ok aktaqmanma nentaiangkolha ennengko'o kakpota nkolalhkok apvalho'ok ketlhengkap ham hengellanhok ennengko'o. Etlhenek hata nhan nelvesai'a m'a napaqtavek enenlhet'avok apketlhenammakpo nak apankavek apkeliamolhma aniem'o apkelammakpo m'a, mok apatno'ok koka m'a, moka ngkollatsema nhan apvalho'ok.

¹³ Malha lhnak ennengko'o alanema lhna aptaiangkok enenlhet hengetlheianmo aniem'o nhan hengellasennaikama Eniapom Neten, have koka niekhe ennengko'o alanema, vanlha koka nenmahai'o angeltakmelkeskesek apkellangiemhaikama ketlhengkap ham.

¹⁴ Hai, avanhek ankek na hengeliephesekama angellasekhekhok ketlhengkap aniem'o Cristo m'a, ampai'o lhta nhan neliangveiakmo apketsepmo lhta lhema enenlhet apkeliaqmoiekha aplhamakho enenlhet lhmankek ham, ka nkeniemai'ak ma'a malha apkeletsepmo lhemek ma'a.

¹⁵ Apketsepme lhta Cristo apkeliaqmoiekha aplhamakho enenlhet'avok, kolhva apkellava nak mokhom nenvanlha nak ntasek metenia nkek allekkasekama la apvalho'ok apanko'ok apankave, koka ellekkeskasama apvalhok ma'a apto lhta apketsepma, aplhatekhangveiakmo lhta nhan kakpota eltaqmelkeskesek apkellangiemhaikama aplhamakho enenlhet.

¹⁶ Lhennenga lhta nhan ennengko'o nketlheianmek engelvalho'ok malha aktonak enenlhet apkeliaskeiam anak Cristo, kolhva koka nenvanlha nak mmaskek ma'a, kolhva koka nketlhenkek engelvalho'ok apkeltemakha la antangkok Eniapom Neten.

¹⁷ Nelvatesaiangkek ma'a aktemakha lhta alketamekama engelvalho'ok lhennenga, nelvatesaiangkek na nentaiangkolha lhta ngkollatsekama aniem'o nelpasmekha m'a Cristo, kolhva alhnankok nentaiangkolha

¹⁸ aniem'o Eniapom Neten, apkapaskamo nhan apketka kakpota ellasekhaskesekhok mokhom ma'a. Netamen na hengellapaskama ennengko'o kakpota angellasekhaskesekhok enenlhet'avok kanhan Eniapom Neten.

¹⁹ Apkapaskangkek Eniapom Neten Cristo kakpota etnek apkellasekhaskesekho aplhamakho enenlhet'avok ma'a, etneskesama nhan apankek apkeliekai'a meleltemakha etnangkok ma'a. Hengellapaskama nhan ennengko'o kakpota angelleltennaksek ania'a nak.

²⁰ Hai, ennengko'o hengellapaskama Cristo kakpota angelleltennaksek ania'a ketlhengkap, malha la nhan Eniapom Neten apkellasnekama napaqtavek ketlhengkap. Akieplomo apvesai'a nak Cristo nellasnema ketlhengkap neleltemo ellasekhekhok mokhom, eleliehekhok nahan Eniapom Neten.

²¹ Metka nkek apkelanai'a qaselha ngkolatsekama Cristo, nkakhemavek koka m'a apatengkasekhek Eniapom Neten ngkollatsekama nellanekamok ennengko'o, apteskasekho malha ngkolatsekama apankok la m'a kakpota hengeltemeskesek nengelpeivomo napaqtek ma'a.