1 Timoteo 5 - Nuevo Testamento Toba Maskoy

Aktemakha aktaqmanma nentemakha

¹ Meliennaho nkek apkellanei'o apkelvaneiam la'a, ntasek koka eleltennasangkok nentemakha malha aktonak apiapom apankek la'a. Eltaqmelkes hata nhan apketko'ok malha aktonak apkelialheng'a apankek la'a.

² Eltaqmelkes hata nhan alvaneiam malha aktonak ngken apankek la'a. Eltaqmelkes hata nhan ngkelvana atko'ok malha aktonak apkelialheng'a apankek la'a, mankotsep ankek na apneniek ma'a.

³ Elpasem hata nhan lhentampak'a metka nak atkak,

⁴ koka apkakhangko la atkak ma'a, atkak hata eltaqmelkesek ma'a malha apkeliaqmongkasekha la'a altakmelkeskama lhta amanie, koka akleklemelha nhan apvalhok Eniapom Neten ma'a.

⁵ Koka lhentampe la'a aknekha nlhepkennenga nkoie, nkonmalhnama mota Eniapom Neten lhamakho aknem kanhan pelhasep ngkanek niavek epasmok hata m'a.

⁶ Koka lhentampe la aklhengkeskama akiaspongkomakha nkek av'alhok ankek, malha nha ntak atsepma la m'a.

⁷ Lheiap Timoteo, eniana ta eleliehekhok lhamakho askeltakha nak etnangkok kakpota mankolentepkasalhkek apkelvesai'a m'a,

⁸ koka meleliahakho la m'a melpasmek na apketkak ma'a, mang na nkoitak meliaskeiam ma'a, tep ankek meliamolhma metlhok ma'a melioho nak mokhom Eniapom Neten.

⁹ Elpeneso ta apnaqtalhesaikamok alvesai'a lhentampak'a kakpota nkotlhevangkok qaselha alpasmoma, koka vanlha ta alvaneiam akvaiakmo tep 60 iantelhkapa anko'ok, vanlha koka lhema atava' akvetai'a sekhe lhta,

¹⁰ kanhan apketlheianma la enenlhet alanai'a qaselha altaqmelo, ka kto nak altakmelkeskama la atkak, kanhan aktaqmanma mota anmaikamok takha amaika'a, alienieskeskama nhan apmanko'ok apkellelto nak apkelpokkenammap, alpasmoma mota apkellengaiangko akientalhnema, allelto lhta nhan allanekamok lhamakho aktemakha qaselha altaqmelo.

^11-12 Koka menaqtalhes ankek alvesai'a m'a atko'ok anak lhentampak'a, ngkanek nheklhek kelha ngkotnek aklhenaikama av'alhok nkoteniekhak atava', akhemo kelha nha ngkotnek aktakha aliatekama nkasennama Cristo, mankoieplavkesek aktakha alheianma, nkoselhnanalhkok hata nkek nahan.

¹³ Kanhan akpenesalhko la akpekkenammalhka akvesai'a m'a, nkovak kelha nhan mangkoiakvaiam nkomakmama, nkotnama kelha nhan amaika'a natemma la'a, nkomaleniongvomok kelha nhan akvanlha la natemma, ngvanengvakmek na akvet'akha la akientalhnema mo'ok, nlheianvakme nkek nahan.

¹⁴ Askeltavek ko'o atko'ok la lhentampak'a nkoliemhapekhak mokhom, nkolvetekhak atkak, nkollavanak na nkoltaqmelkesek nahan, netamen nkotno emmo'ok mankoimatkesama ta m'a lhentampak'a nak,

¹⁵ moklhem'a lhentampak'a koka nkelvatesangkek alleliehekhok Cristo, koka nkeltemengvakmok alleliehekhok ma'a Satanas.

¹⁶ Ka lhema ngkelvana la akto Jesucristo apnemolhema aknema aknemakha lhema lhentampe la'a, ntase nkopasmo nkek ma'a kakpota mankoientelhek iglesia m'a, vanlha koka ntasek elpasmok lhentampak'a altaiekha nlhepkennenga nkave nak.

¹⁷ Nietavek etlhevangkok akianmoma akietemo nkoie aniem'o nhan apkellai'o metno apketko'ok anak apkellelto apkenmakmekama akientalhnema apieseksek anak ham, apkellelto nak apkeleltennaikama, apketlhekmosekamok nahan.

¹⁸ Ka aktemo nak na aklheianma Eniapom Neten apaivoma m'a: «Meniapkesangkek atong buey neksa aptepelkekha trigo apelhkapkok la'a», ka ntemak ma'a. Ka ntemak na mo'ok aklheianma: «Nietavek elhkak akianmoma apmakmekama apto la apmakmekama», ka ntemak ma'a.

¹⁹ Koka lhema aphapak la enenlhet apvekha apnakha lheiap apketlheianma metno apketkok ngkolatsekama aptemakha, meniailho nkek ma'a metko la nhan apketlhelhma'a apkanet nlho ka la apkanet'olhema enenlhet apkelvetaiangko m'a.

²⁰ Koka eliennaho ta ellanhok lheiap ma'a apkellelto nak melvatesaikamok apkellanekamok ngkollatsekama napaqtavek aplhamakho enenlhet'avok la'a kakpota elagak apkellelto apkellengai'a m'a.

²¹ Askeltave etnek lheiap napaqtek Eniapom Neten, Jesucristo, kanhan ángeles apkeliekieskama, eliehekhok henganemakha astakha lhkek askano, etne apeivomo napaqtavek aplhamakho enenlhet'avok, etne ta nhan apneskamo mo'ok apkellanei'o po'ok.

²² Kolketamama ta apvalhok amanie nkek sekhek apmahai'a enengkenek apmeiok takhaplhet la enenlhet kakpota etneskesek apkemhama apmanie' m'a apieseksek Jesucristo apkennemolhema, koka mankolketamengka la apvalhok ma'a, etnek hata nhan lheiap malha apselhnanemmap aniem'o m'a enenlhet mangkolatsekama apmakmekama, etne ta mota alhnai'o apvalhok lheiap.

²³ Vanlha mota akmaska apvakmo lheiap, eien hata iemmen kanhan ketsek vino.

²⁴ Moklhem'a enenlhet apkellanekamok anak ngkollatsekama apkelvetakpek iokhalhmek ankek nenvanlha nak, ngkolhek hata nhan aliekpelko m'a, napokha nhan enenlhet melvetakpok apkellanekamok qaselha ngkollatsekama nenvanlha nak, koka ngkolhek hata nhan alvet'o m'a.

²⁵ Moklhem'a nhan enenlhet apkellanekamok anak aktaqmanma apkelvetakpek iokhalhmek ankek nenvanlha nak, kanhan moklhem'a enenlhet anak apkellanekamok qaselha altaqmelo malha akielhammalhko nak, elvetakpok hata nhan ma'a.