1 Tesalonicenses 5 - Nuevo Testamento Toba Maskoy

Mamma nkoihok apvektanlha ta Apveske

¹ Ketlhengkap elialheng'a, mankaimelhkak annaktalheskesek aktemakha aknem hata akvetammalhka lhamakho qaselha askeleltennaso lhkek,

² apkeliavek ketlhengkap ngkotnek hata akpelapkeskama apvaktamo ta Apveske hengke'e, malha enenlhet la apmenielhma akpelapkeskama apvai'a la pelhasep.

³ Hata etnangkok enenlhet'avok hengke'e: —Moltama apvalho'ok, mellaga nhan —hata etnangkok ma'a. Koka nkotlapkesek hata akvai'a akientalhnema apnaqtevasemmap enenlhet'avok ma'a, mamma ta nhan elielhanengvomok ma'a, nkotlapkesek hata nhan malha aktonak ngkelvana la nlosek akpelapkeskama nak akmaska av'alhok.

⁴ Koka ketlhengkap mankolpelapkesek hata apkelvetai'a m'a malha enenlhet lhek apmenielhma, ngkanek ketlhengkap melloka mota ienaqtesakha lhma.

⁵ Aplhamakho ketlhengkap apkelloka mota atsak'elha lhma aknem anke nak, have pelhasep anak apienakteskama na lhma.

⁶ Melienmama nkek nahan malha aptaiangkolha nak ma'a po'ok enenlhet, ntasek koka etnangko mota malha apnaklhatekhai'a la'a, metka nhan alieihama lhma la'a.

⁷ Pelhasep apankek la'a apnaktenkek enenlhet'avok, nkelieihak na lhma,

⁸ ennengko'o koka nelloka mota aknem anko ie ka ngkanek ntasek montangkek malha hengelieihamalhma la'a, ntasek angelapkesek malha nelapkeskama la ennenio'ok alvesai'a m'a nengasekhai'o kanhan mongiaskeiam, angelletsavek hata nhan malha casco la'a akvesai'a nengel·halhanma angelvongkasalhkak hata tep.

⁹ Hengeliekieskangkek ennengko'o Eniapom Neten have apmahai'a hengellangkok apiaqmongkasekha nentaiangkolha, vanlha koka apmahai'o hengelvongkesek tep aniem'o apveske Jesucristo,

¹⁰ apto lhta apketsepma henianmoma ennengko'o kakpota annakhok lhemek ma'a niekhe neksa neletnaikamok nlho ka la nennaqteianma.

¹¹ Ka ngkanek ntasek eleliatekhok po'ok, eleliennakteskasekhok na apvalho'ok po'ok lhamakho aknem.

Apkellanemakha etnangkok Pablo ko Tesalonica

¹² Ketlhengkap elialheng'a, nengeleltavek ennengko'o ellahok apkelemhama apmaniaie apanko'ok apkenmakmekama mota akientalhnema m'a, apkennaveskama mota kakpota nhan apketlhekmosekamok aktemakha Apveske engankok.

¹³ Ellaho mota malha apkelpetma la'a, ellasekho ta nhan ngkanek apkelpasme mota ketlhengkap ma'a, elloka ta nhan metka akmaska apieseksek anak ketlhengkap ham.

¹⁴ Elialheng'a, nengellapiosavek ennengko'o ketlhengkap neleltemo ennavaksek apkellelto la menmakmekama ham, eliatekho ta nhan ma'a apkellelto nak anmaiosak'a apvalho'ok, elpasem hata nhan meliennaktema nak, kakpota nhan etnangkok metka apkelpekhesammap apieseksek anak ham.

¹⁵ Mellanko nkek eliaqmongkaskesekhak po'ok apkellaneskeskama la ngkolatsekama, ntasek koka mota eteniangkok ellanangkok qaselha altaqmelo apieseksek anak ketlhengkap kakpota nhan apieseksek po'ok anak enenlhet.

¹⁶ Kolpaihekha koka mota apvalho'ok,

¹⁷ elelmalhnamok na metka nnelha.

¹⁸ Ketlhengkap apkellelto meliaskeiam Cristo Jesús nietavek na etnangkok gracias lhamakho qaselha apkelvetakha la'a, ka apiaspongkomakha Eniapom Neten ma'a.

¹⁹ Menmangvom apmak'akha la etnek Espíritu,

²⁰ meltaqneva nhan ania'a aniem'o Eniapom Neten aklhenammalhka nak,

²¹ ntasek sekhek na ellanama netamen enmankok hata takha aktaqmelo la'a,

²² koka eltakneva m'a ngkollatsengka nlho nema atlhekmoskama.

²³ Nengeleltavek na Eniapom Neten apto aktaqmelaikama engvalhok etnek na apkelpokkanma ketlhengkap, eltaqmelkesek apvalho'ok, apkelvanmongkoma kanhan apkeliokha kakpota etnangkok metka apkeltemengveiakmo lhma akvakmo apvaktamo ta apveske engankok Jesucristo.

²⁴ Hai', apto apkellavekama ketlhengkap vanlha mota apkellanai'a aptakha la aplheianma, eieplavkesek hata mota nhan aptakha apaivoma.

Aktakha nnelha apaivoma Pablo kanhan aklheianma apvalhok

²⁵ Ketlhengkap elialheng'a, hengellelmalhneskes hata Eniapom Neten kakpota hengeltaqmelkesek ennengko'o m'a.

²⁶ Elpaivesap hata nhan apkelialheng'a akieplomo apkelpetsesammap alhnai'o nkek ham,

²⁷ askeltavek ko'o akieplomo asientalhnemo heiaikamok Apveske elietsatangkok vakkahak anak aplhamakho elialheng'a ham.

²⁸ Askeltavek na Apveske engankok Jesucristo eltaqmelkeskesek apkellaniemhaikama ketlhengkap ham.