1 Tesalonicenses 3 - Nuevo Testamento Toba Maskoy

Apkapasammap Timoteo

¹ Hai', avanhek nengeleltemo antangkok mokhom amaika'a ham koka nne lhta hengeliasengko lhma m'a, lhta nkeniem'ak nelpaqmetkesalhko nengaqhengvakho akieto Atenas.

² Ka nellapaso lhta enialheng Timoteo ham apto nhan Eniapom Neten apkasennaikama, nenmakmekamo lhemek nahan nelpaieskama ania'a aktaqmanma aplhenammap Cristo, nellapaske lhta ham kakpota eliatekho, elpasmok nahan nkoliennak meliaskeiam ketlhengkap

³ neksa akvai'a akientalhnema kakpota mankoltemeskesantaniek na koneng ketlhengkap ham. Apkeliavek na akientalhnema nak mankavankek hengieka'.

⁴ Neksa nengakhengveiam alhta apieseksek anak ketlhengkap ham nelpenesave lhta neleltennaskama nkovak hata akientalhnema, ntemengkek na lhta m'a apkelvetai'a ketlhengkap.

⁵ Nlhenaikama evalhok nketlhengkaske lhta mankolianmolhkek asleng'o ania'a apkellengaiangko akientalhnema ketlhengkap ham, ka nkeniemai'ak askapaskamo lhta Timoteo kakpota hesantengkesek ania'a, asmahai'a aihok ania'a aktemakha meliaskeiam ketlhengkap ham. Avanhe lhta ko askai'a hengel·hanmo ngken anak nkolpalesemma ketlhengkap ham, lhta akto la m'a, akhemo lhta ngkotnek nengetlhekmosekamok ketlhengkap ham.

⁶ Apvaktame lhta Timoteo hengke'e apkeniaktamo ham Tesalonica, apsantanie lhta ania'a aktaqmanma, avanhek na lhta akietnema meliaskeiam ketlhengkap, nengasekhai'o, avanhek nak na apkenmahai'a hengelvetekhak ketlhengkap ennengko'o, ennengko'o nhan ntak ma'a avanhek nemmahai'a angelvetekhak ketlhengkap.

⁷ Ketlhengkap elialheng'a, avanhe lhta apkelpaiesekha engelvalho'ok nelleng'o akiennaktema meliaskeiam, niekhe lhta akietnema mota akientalhnema nelvetai'a ennengko'o,

⁸ koka hengeliennaktesakhave lhta nelleng'o ania'a akiennaktema mokhom meliaskeiam Apveske ketlhengkap.

⁹ ¡Nketlhengkaskek mamma nelpaqmeiasma antangkok gracias Eniapom Neten aniem'o hengeliekangveiakmo apkelpaiesekha engelvalho'ok ketlhengkap!

¹⁰ Nengelmalhnekama nengasnekama nhan Eniapom Neten lhamakho aknem kakpota angelvetekhak mokhom, ampasmok etsavhongvomho' meliaskeiam alaimommalhka ketlhengkap.

¹¹ Hai, nengeltavek Eniapom Neten kakpota nhan Apveske engankok Jesús hengellangkok lhema aknem antangkok amaika'a ham.

¹² Nengeltavek na Apveske engankok elvanengkeskesek meliaskeiam lhamakho aknem ketlhengkap, eliavenkasangkok na apkellasekhammakpo apieseksek anak ham, kakpota nhan ellasekhok po'ok enenlhet, ka nentaiangkolha nak na ennengko'o nellasekhai'avek na ketlhengkap.

¹³ Nengeltavek na eliennakteskesek meliaskeiam, elalhnaskesek na apvalho'ok kakpota mangkolhek atlheno apkelvesai'a ketlhengkap napaqtek Eniapom Neten apvaktamo ta hengke'e Apveske engankok Jesús kakpota nhan apalhakvaktamo ta apkelpokkanma apanko'ok. Amen.