1 Tesalonicenses 2 - Nuevo Testamento Toba Maskoy

Aklheianvekho apvalhok Pablo aptemo amaika'a m'a Tesalonica

^1-2 Elialheng'a, apkellengai'ak na lhta ketlhengkap ania'a neltaqnommalhko kakpota nhan nemo hennaqtevaskamo m'a natemma Filipos, koka hengellaiangke lhta Eniapom Neten nenmakmosak'a kakpota angelpaiaksek ania'a aktaqmanma apieseksek anak ketlhengkap ham, niekhe lhta nhan apentalhnema hengellammelhma ham, nkaqhok koka nellaneiangkek aktaqmanma nenmakmekama, apkelvetai'a lhta ketlhengkap ham. Have akhemo ennengko'o nenmeioiakmo lhta ham.

³ Netlhekmoseiangke lhta mota nhan akto haveniapak ankek, ma lhta nhan nkolhnaiangkok engelvalho'ok malha alposkama la qaselha kakpota nhan mankonmahai'ak angeliennengkesek.

⁴ Eniapom Neten koka hengelleltemeskeskama kakpota ampaiaksek ania'a aktaqmanma, monteniaiangko' ennengko'o nkolekkasama apvalho'ok enenlhet'avok nentaiangkelha, vanlha koka nenteniaiangkok ma'a nkolekkasama apvalhok Eniapom Neten apto apvetai'o alhnakho nkek engvalho'ok.

⁵ Apkelvetai'a lhta nentaiangkelha metka nellannengvaiam aktaqmanma nelpaqmeiasma angellanhok ketlhengkap, ma lhta nhan anteniaiangkok patakkom apanko'ok la ketlhengkap, apiavek koka Eniapom Neten akto have niapak ankek astakha nak alheianma.

⁶ Ma lhta nhan anteniaiangkok hengeltemeskesek ketlhengkap kanhan po'ok enenlhet la'a neten engankavek ennengko'o.

⁷ Envanka'a nlho lhta niekhe angeliatangkok hengelleliehekhok ennengko'o ketlhengkap, ngkanek nengelelto hengellapaskamo pankok Cristo, koka ma lhta ntaiangkok ma'a, malha alhta nentaiangkok aktaiangkolha nak nematkak. Neltaqmelkeskanke lhta mota malha aktona ngken altakmelkeskama nak atkak.

⁸ Avanhek anke lhta nellamelaiam ketlhengkap, nellankongvaiakmo ania'a aktaqmanma, niekhe lhta atlhenkeskama angelletsepok aniem'o hengellasennaikama ketlhengkap. ¡Ka m'a avanhek anke lhta aknaikamok nengellamelaiam ketlhengkap ma'a!

⁹ Nketlheianvakhavek kelha apvalho'ok ketlhengkap elialheng'a akiavai'a nenmakmekama akvaiakmo lhta neliampei'o lhamakho aknem apieseksek anak ketlhengkap ham, nekha emmeio'ok alhto ka neleltennaskama ania'a aplhenammap Eniapom Neten, nekha emmeiok alhto ka nhan akiavai'a nenmakmekama kakpota mankolientelhek apvalho'ok ketlhengkap hengellangko nlho lhamakho qaselha alaimelhkelha la'a ennengko'o.

¹⁰ Apkelvetai'a lhta ketlhengkap kanhan Eniapom Neten aktaqmanma akpeivomo nentaiangkolha apieseksek ketlhengkap meliaskeiam anak, nellanengke lhta nhan qaselha akpeivomo, mankollapvanke lhta nhan hengetlhenek enenlhet.

^11-12 Apkelvetai'a lhta nhan neliatekho ketlhengkap kanhan nelpaieskaiakmo apvalho'ok moklhem'a ketlhengkap malha apto nak lhema apiapom nematka aptaqmelkeskaiam la apvalhok apketka, nengeleltennaso lhta nhan etnangkok aptaiangkolha apkelpeivomo ngkanek apkellelto apkennemolhema Eniapom Neten, apto lhta nhan apkellavekama kakpota eltemengvomok ma'a apkelveskaie' kakpota nhan apkelientalhnemo.

¹³ Hai, nengeleltangke mota ennengko'o gracias Eniapom Neten aniem'o apkellengai'a, apkenmaikamok na takha ania'a aplhenammap Eniapom Neten netsavkeskama lhta ham. Apkeliangveiakme lhta ania'a aktaqmanma have aniemai'o enenlhet apanke, koka aniemai'o m'a Eniapom Neten. Hai, have niapak ankek ma'a aniemai'o Eniapom Neten ania'a aktaqmanma nak nkelentepkeskaske mota akiavai'a qaselha altaqmelo apkellelto nak meliaskeiam.

¹⁴ Apaivomolhema apankave lhta nhan apkenmenlhenaikama ketlhengkap ma'a, lhta nhan ntemak ma'a iglesia apankok Eniapom Neten akieto m'a Judea aniem'o meliaskeiam Cristo, apaivomo lhema apankave lhta judios apkenmenlhenaikama m'a.

¹⁵ Ka judios alhta m'a apkennapmo lhta nhan apveske Jesús ma'a kanhan apkeleltennaskama ania'a apankok, ennengko'o lhta nhan hengelentepkeskamo apkellavakha apanke apiav'akha temma. Ma lhta nhan nkolleklemok apvalhok Eniapom Neten, vanlha lhta nhan apteniaikamok apkellammelhma.

¹⁶ Ma lhta nhan hengellaiangkoho angelpaiaksek ania'a aktaqmanma nenvongkasemmalhka tep apieseksek metnangko judios, koka m'a niaveiangke lhta nhan ngkollatsekama apkellanekamok, koka nkovak hata nhan akiavai'a nema aliaqmongkaskesekha apkeltemakha m'a.

Apmahai'a etnek amaika'a mokhom Pablo akieto Tesalonica

¹⁷ Ketlhengkap elialheng'a, nelvaktanie lhta ennengko'o nentangko lhta amaika'a ketlhengkap ham, hengeliepvamenke ennengko'o aniem'o ketlhengkap, niekhe nhan engelvalho'ok ketlhengkap, avanhek nemmahai'a angelvetekhak mokhom ham.

¹⁸ Nenmak'a lhta niekhe angelelhiemok apieseksek anak ketlhengkap ham, ko'o Pablo nlhanie ntemak askelienlhaneiam asmahai'a niekhe angvelhiemok ham, koka Satanas mangkoltemoho.

¹⁹ Avanhek nemmahai'a angelvetekhak mokhom ketlhengkap ngkanek apkelpaiesekha mota engelvalhok. Ketlhengkap malha netlhevaikamok akianmoma la nennaksepma nempekkenekha empatek anak, hengellaiangko nhan alel·halhnekama engelvalho'ok envanka'ak hata nhan nkolalhkok engelvalho'ok napaqtek apveske Jesús apvaktamo ta hengke'e.

²⁰ Hai', ketlhengkap hengeltemeskeskama alammalhko engelvalho'ok, apkelpaiesakhek na engelvalho'ok.