1 Tesalonicenses 1 - Nuevo Testamento Toba Maskoy

Aklheianma apvalhok Pablo ko Tasalonica

¹ Ennengko'o Pablo, Silvano, kakpota nhan Timoteo, nketlhenkek engelvalho'ok iglesia akieto nak ham Tesalonica, apkellelto apkelpasmekha Eniapom Neten apto eniapma'ak kakpota nhan Apveske Jesucristo. Nengeleltavek eltaqmelkeskesek apkellaniemhaikama, ellangkok na altaqmelaikama apvalho'ok ketlhengkap ham.

Pablo aptema gracias Eniapom Neten

² Neksa nelelmalhnongkoma mota nketlheianvakhe mota engelvalho'ok ketlhengkap ham, gracias na nentangkok Eniapom Neten aniem'o ketlhengkap.

³ Neksa nelelmalhnongkoma Eniapom Neten nketlheianvekhe mota engvalho'ok aknaikamo lhta aliennaktema meliaskeiam ketlhengkap nkeltemeskeskangke lhta akiavai'a apkenmakmekama, apkellasennaiangka lhta nhan po'ok akieplomo apkellasekhai'o, nnaianke lhta nhan alel·halhnekamok apvalho'ok nkovak ma'a apkelpasmoma Apveske engankok Jesucristo.

⁴ Ketlhengkap elialheng'a, apkellamelaiam Eniapom Neten, neliavek ennengko'o apto nhan apkeliekieskama m'a.

⁵ Have vanlha mo'ok engatno'ok alhta nentangkok neksa neleltennaskama lhta ania'a aktaqmanma apieseksek ketlhengkap ham, nellan'a lhta nhan qaselha hempelapkeskama aniem'o apmopvana Eniapom Neten kakpota nhan Espíritu Santo. Ka alpekhesangka lhta ketlhengkap metka apkaimommap akto have niapak ankek ania'a nengeltennaikama ennengko'o. Hai, apkeliavek ketlhengkap vanlha lhta mota nengeleltemo nkoltaqmelek apkakhaikamok neksa nengakhengveiam alhta ham.

⁶ Apketlhengkeskangkek ketlhengkap hengelvanekamo nentaiangkolha ennengko'o kakpota nhan aptemakha lhta Apveske, avanhe lhta niekhe apkellengaiangko akientalhnema ketlhengkap ham, nkaqho lhtoka apkenmaiangkek takha ania'a aktaqmanma akieplomo alpaihekha apvalho'ok aniem'o Espíritu Santo m'a.

⁷ Netamen apkelvaneiangko lhta nhan aptaiangkolha ketlhengkap aplhamakho apkellelto nak meliaskeiam ma'a akieto iokhalhma' Macedonia kakpota nhan Acaya.

⁸ Apkelpaieske lhta nhan ania'a aktaqmanma ketlhengkap ma'a akieto Macedonia kanhan Acaya, lhamakho aiempek nnek alioho ketlhengkap akietnema meliaskeiam Eniapom Neten, mangkaimelhkak ennengko'o angetlhenama apkelvesai'a ketlhengkap ma'a.

⁹ Apketlheianma apankavek na lhta nhan ketlhengkap ma'a hengenmaiangko takha aktaqmanma neksa nelvaiam alhta ham, ka apkelieniekho lhna lhta nhan qaselha akiokha la alanemmalhka, apkelelpengkaiakmo lhna lhta nhan apvalho'ok akieto apnakha Eniapom Neten apto menietsepma, apto nhan have niapak anke niapom ma'a. Ka apkelempai'akha lhna lhta nhan apkellasennaikama Eniapom Neten ma'a,

¹⁰ apkelel·halhneiangka lhna lhta nhan Apketka Jesús apto lhta nhan aplhatekhangveiam apieseksek apkenmaskengvaiakmo enielhiemok ma'a neten evatamok mokhom hengke'e kakpota hengelvongkesek tep ennengko'o neksa akvai'a ta apiaqmongkasekha apkeltemakha ngkollatsekama enenlhet'avok halhmankek ham.