1 Pedro 4 - Nuevo Testamento Toba Maskoy

¹ Aplengaiangke lhta nhan Cristo neksa apkaniemhaikama hengke'e nalhepop anak, ntasek na enmankok takha ketlhengkap ma'a akvo'o la apkellengaiangko akientalhnema. Enenlhet apto la apmopvana evaskapok neksa akvai'a la akientalhnema, apmopvana nhan etneskasentak koneng ngkollatsekama nak

² kakpota nhan akiaspongkomakha la apvalhok, apvankek na elana mota qaselha akleklemelha la apvalhok Eniapom Neten.

³ Ngvenaktenke lhta aknem apkellanekamok qaselha aleklemelha nak apvalho'ok enenlhet'avok melioho nak mokhom Eniapom Neten, apkeltemengvekho lhma, ngkollatsekama mota apkenmahai'akha etnangkok, melleskama etavangkok aptekamok, anmen alieieskama lhma, kakpota nhan apkeltakneskasekamok qaselha akiokha apkellanekamok. Npelhkaskek apiempek Eniapom Neten qaselha ngkollatsekama nak ma'a, ka meleliehekho nak Eniapom Neten aptaiangkek aktonak ma'a,

⁴ ketlhengkap koka mmaskek apkelpasengvakmo m'a neksa apkaqnaikama la m'a apkellanekamok anak nkeskama qaselha ngkollatsekama, ka ngkanek enenlhet anak meliamolhma elkenatkesek ketlhengkap kanhan eltaqnevama aniem'o melpasmakhak ma'a.

⁵ Koka netamen hata ma'a enenlhet'avok meliamolhma nak nkolietok hata apketlheianvekha qaselha apkellanekamok napaqtek hengiekpelkemo niapom, eliekpekok hata nhan apkellelto aphalhnanko'ok kanhan apkeletsepma.

⁶ Ka apkeletsepma nak nnengke lhta nhan aleltennaskamo ania'a aktaqmanma neksa lhta apkellangiemhaikama hengke'e nalhepop anak, nietne mota apkeletsepma aniem'o enenlhet apankave nak, koka netamen apkeletsema nkelloka mota apkel·hango'ok aniem'o Eniapom Neten.

Aktaqmanma ampasmok emmo'ok

⁷ Ketsek nkaimelhkak aktemongvanlha nnelha aknem lhmankek ham, ka ngkanek ketlhengkap ntasek etnangko mota apkeltakmelkasemmakpo apankavek, elelmalhnangkok nahan metka nnelha.

⁸ Ellasekhakpo ta mota apankavek apieseksek anak ketlhengkap, enenlhet apto la m'a apkasekhekho po'ok, melan'ok na aptakha po'ok aptevaskai'a la m'a.

⁹ Eniaqhes hata nhan akiakvatakho apkakhaiangkolha apieseksek anak ketlhengkap amaika apankok la'a metka nhan aptepkesaikama apvesai'a m'a.

¹⁰ Apkellangkek Eniapom Neten nemmopvana nak ellanhok qaselha ketlhengkap, eltaqmelkaso ta apkenmaikama kakpota nkoltaqmelkeskesek apkellangiemhaikama po'ok la'a.

¹¹ Akietno la nenmopvana nak angeliatama, ntasek etnek ma'a aktemakha apiangveiakmo aniem'o Eniapom Neten apaivoma. Akietno la nhan nenmopvana nak hengasennama emmo'ok, etne ta nhan ma'a, emama ta apiennaktema apkaikamok aniem'o Eniapom Neten, netamen hata m'a eliavenkaskesama ta nhan apvesai'a Eniapom Neten akieplomo apvesai'a Jesucristo apto aknema apmopvana, nietavek na etlhenek apiephongveiakmo metka akvaiam annelha aliekaikamok iantelhkapa. Amen.

Akpaihekha engvalhok neksa nellengaiangko akientalhnema

¹² Ketlhengkap elialheng'a askellamelaiam, mopallemmankek apvalho'ok apkelvet'o la aliepkonma malha aktonak talha la'a, mellanankek na mankovhek hata m'a.

¹³ Kolpaihekha toka mota apvalho'ok apkelvet'o la apkellengaiangko, ka aktemo lhta nhan Cristo m'a, netamen nkolpaihekhak hata nhan apvalho'ok apkelhiakmo ta m'a akieplomo akiavai'a apientalhnemo.

¹⁴ Aktakmelakho nkek apkeltaknommap la'a aniem'o apkelleliehekho Cristo, ngkanek Espíritu Eniapom Neten apankok nkelloka mota lhemek ketlhengkap ma'a.

¹⁵ Moklhem'a enenlhet nnek akmenlhenangka aniem'o aptaikamok ntekioma niapma'ak, apkenmenielhma, meliamolhma kakpota nhan apkellapsongkeskaiam apkakhaikamok po'ok. Metnamo nkek ketlhengkap aptaiangkolha nak ma'a.

¹⁶ Koka menmangkankek ketlhengkap neksa nema akmenlhenaikama aniem'o atlhenkasekama aptaikamok Jesucristo apkennemolhema, eltakneskasamok hato ka Eniapom Neten ketlhengkap ma'a neksa apkelvetai'a aktonak ma'a.

¹⁷ Ngva'ak aknem akientalhnema nkek nemakha aliekpelkemelha nentaiangkolha ennengko'o nengelelto nak Jesucristo apkennemolhema, koka tep ankek hato ka nkotnek ma'a akientalhnema nema aliekpelkemo aptaiangkolha apkellelto nak meleliehekho' ania'a aktaqmanma aniem'o Eniapom Neten.

¹⁸ Nkotlhengkasama ta nhan melvongkasakpek tep apkellelto nak apkelpeivomo ¡Avanhek ankek hato ka nha ngkotnek apkellengaiangko apkellelto nak meliamolhma, kanhan apkellanekamo nak ngkollatsekama!

¹⁹ Ka apkelto la elvetak akientalhnema ketlhengkap Eniapom Neten, nheklhek koka etlhengkesek apkellanekamok qaselha altaqmelo m'a, ntasek na enmeksek apvalho'ok ma'a apto lhta apkellanai'a ketlhengkap kanhan apto apkelpasmoma mota.