1 Pedro 3 - Nuevo Testamento Toba Maskoy

Nenganemmalhkelha antangkok nema ennaqteiangka'a

¹ Ketlhengka' ngkelvana'ak koleliehekho ta mota anakteiangka'a. Apno la atava' metno Jesucristo apnemolhema koliehekho ta nhan ma'a kakpota etnengvomok na Jesucristo apnemolhema aniem'o apvetai'a aktakmelkasemmalhko aptava, mankaimelhkak akiatekamok la enialhok ania'a aktaqmanma,

² vanlha koka apvetai'a aptava aktakmelkasemmalhko nke, ai'o nhan Eniapom Neten.

³ Ngkelvana la akteniai'a mota alalhnasemmalhko nkeskama nhan alalhnaskama ava' neten ankek akiaspekamok, annatanma nhan oro kakpota nhan alentalhnema akmennave nak.

⁴ Koka nlekavek apvalhok Eniapom Neten ma'a ketlhengka' malha alalhnaskama av'alho'ok anak ngkanek mankomaskengvomek aktaqmanma m'a, akto nhan nalhepek av'alho'ok kanhan altakmelkeskamo av'alho'ok.

⁵ Lhnak nane na ntaiangkok ngkelvana'ak alpokkenammalhka, malha alalhnaskama av'alho'ok mankoliaskeiakmo Eniapom Neten kanha alleliehekho mota anakteiangka'a.

⁶ Ka aktemo lhnak nanek Sara aliehekho mota Abraham, altaiangka nhan apvesai'a apveske nkok aniem'o ai'o. Nkovak hata aknem ketlhengka' malha aktaikamok atkak Sara allanengko la qaselha altaqmelo, mangkoitek hata nhan allai'akha la nhan ma'a.

⁷ Ketlhengkap apkelennava'ak, eltaqmelkaso ta mota apkellanei'o apnaqteiangka'a neksa aliepetkaikamaha, meliennaho, ellaho ta nhan ngkanek nalhep'avek av'alho'ok ma'a, nkotlhevangkok hata lhemek ketlhengkap qaselha altaqmelo metka akianmoma akvesai'a nenganiemhaikama ta m'a. Koka meltaqmelkaso la apkellanei'o ketlhengkap ma'a, meniailhek hata Eniapom Neten apkelelmalhnongkoma.

Apkellanemmakpelha etnangkok Jesucristo apkennemolhema

⁸ Hai', ka m'a, ¡mellaskesap ankek ame' apieseksek anak ketlhengkap! Elhneso ta mota nhan atlhenaikama apvalho'ok po'ok la'a, ellasekhakpo malha apkelialheng'a apankavek la'a, etnamok hata nhan apkeliamolhma kanhan nalhep'avek apvalho'ok.

⁹ Meliaqmongkasekha nkek apnaqtevaso la po'ok, meliaqmongkasekhangkek na apiamenvo la po'ok, ntasek koka ellangkok aktaqmanma apaivoma m'a ngkanek Eniapom Neten hata eltaqmelkeskesek apkellangiemhaikama ketlhengkap.

¹⁰ Ka ktemo nak na aktalhesammalhka vakkahak Eniapom Neten apaivoma hengke'e: «Enenlhet apkelto la enianiemhama aktaqmanma, akpaihekha apvalho'ok, nkaimelhkek elvataksek apkeliatekama ngkolatsekama kanhan metnek apmopvana ania'a.

¹¹ Eieniekhak na qaselha ngkolatsekama, elanak na qaselha altaqmelo, etenia mota nhan metka akmaska.

¹² Nkanek aptaqmelkaskek Eniapom Neten apkelelto la apkelpeivomo, enialhok na apkelelmalhnongkoma, koka apkammelhkek ma'a apkellanekamo nak ngkollatsekama».

¹³ Koka apkellanengko la mota ketlhengkap qaselha altaqmelo, netamen mamma enenlhet ellaneskeskak na qaselha ngkolatsekama m'a,

¹⁴ Aktakmelakho nkek apkelvetai'a nak akientalhnema neksa apkellanekamok akpeivomo. Mellaga nkek enenlhet, mennelhtengankek na neten,

¹⁵ elpokkenkes apvalho'ok ketlhengkap Apveske Eniapom Neten, elpeneso ta mota ankok apkellatemmoikama la'a metka apkeliennai'o kanhan nalhep'avek apvalho'ok aktemakha akietnema alel·halhnekama apvalho'ok Eniapom Neten.

¹⁶ Eltaqmelkasakpo ta nhan kakpota nkoltaqmelkasok na alietnaikama apaqto'ok ketlhengkap, kakpota enmankangvomok apkellelto nak apkeliematkesaikama ketlhengkap neksa apkellanekamok qaselha altaqmelo.

¹⁷ Ka apkelto la Eniapom Neten ntase niekhe m'a elvetak akientalhnema aniem'o apkellanekamok qaselha altaqmelo, have aniem'o apkellanekamok qaselha ngkollatsekama.

¹⁸ Ka ktemo lhta nhan Cristo aplengaiangko aniem'o nellanekamok ngkollatsekama, apmesemmakpo lhta apankek ma'a lhema aktema nhan ma'a, mankaimelhkak mokhom enietsepok ma'a. Mamma lhta niekhe nhan aptemengveiakmo la lhma Cristo, koka aplengaiangke lhta m'a aniem'o hengelpasmoma nengelelto nak nellanekamok ngkollatsekama, apmahai'a nhan henlaqlakhak napaqtek Eniapom Neten ma'a. Apketsepme lhta nhan aptemo nak enenlhet enietsepok hengke'e, koka netamen nnengke lhta aklhatekhaskeiakmo m'a, ka aniemhaiangka lhta nhan apiempek ma'a.

¹⁹ Akmeiekho lhta nhan aleltennaskekho akiephongveiam aiseksek ma'a enghangok aklhatmommalhka

²⁰ aniem'o lhnak na nek mankoleliehekhok Eniapom Neten ma'a, neksa aploma lhnak nanek Noé. Mepekheskamo lhnak nanek na Eniapom Neten epenaksek loma nemmen akiavai'a m'a Noé, apkelvaiakmo lhnak nanek na tep 8 enenlhet apkelvaivekamok neksa akmamai'a akiavai'a.

²¹ Ka iemmen lhnak nanek ma'a akietkesammalhka nellavkesammalhka konne iemmen anak kakpota nhan evongkasakpok tep enenlhet. Ka nenlavkesammalhka nak konne iemmen have alhnaskama eniempehek, vanlha koka akto malha alhnaskama alketamekama engvalhok napaqtek Eniapom Neten, koka nhan nenvongkasemmalhka nak tep aniem'o m'a nema aklhatekhaskeiam alhta Cristo,

²² apmeiekho lhta neten, apnekho akiennakha apoktong Eniapom Neten, aptemengvekho nhan apveske apieseksek ángeles kanhan enghangok aknema anmovanka'a, alientalhnemo nhan ma'a.