1 Juan 5 - Nuevo Testamento Toba Maskoy

Mongiaskeiam aktemeskesenta koneng ma'a mangiamolhma

¹ Apkellelto nak meliaskeiam Jesús apto nhan Cristo koka apkelvesai'a m'a Eniapom Neten apketkak. Apkellasekhai'o la Eniapom, apkellasekhavek na apketkak la m'a.

² Nengeliavek ennengko'o nellasekho la m'a apketkak anak ma'a Eniapom Neten aniem'o nhan nellasekhai'o m'a Eniapom Neten, neleliahakhavek na hengellanemakha antangkok ma'a.

³ Hai, nengasekhai'o Eniapom Neten aniem'o neleliehekhok hengellanemakha nak antangkok ma'a, nkelhievak'ave na ngkotnek apkanemakha apanke nak ma'a

⁴ ngkanek Eniapom Neten anak apketka apkeltemeskasantek koneng ngkollatsekama nak. Mongeliaskeiam anak ntemeskesantek na koneng ngkollatsekama nak.

⁵ Apto la nhan mei'askeiam Jesús apto Eniapom Neten apketka, aptemeskasantek na koneng ngkollatsekama nak.

Aplhenammap aktemakha apvetammap Jesús

⁶ Neksa apvai'a lhta Jesucristo hengke'e nalhepop anak nietnengke lhta hanet qaselha akvetammalhka m'a aniem'o iemmen kanhan ema, have vanlha iemmen, kanhan ema'. Espíritu lhta aplheianma m'a apto nhan apvetaiangko m'a, apto nhan metka aptaikama apmopvana ania'a m'a.

⁷ Apkanet'olhema lhtoka nhan apkelvetaiangko m'a, apketlheianma nhan.

⁸ Akno nak ma'a Espíritu, iemmen kanhan ema, aknemo mo'ok alhta nhan apvalho'ok ma'a apketlheianma.

⁹ Ka aplhamo la nhan enenlhet apketlheianma lhema ania'a, nenmangkek na takha ennengko'o m'a, koka akto nhan neten ankek aktaqmanma m'a angenmangkok takha aplheianmo Eniapom Neten aptemakha apketka apanke'.

¹⁰ Apto la enenlhet mei'askeiam Eniapom Neten apketka, apmek na takha aplheianma Eniapom Neten aptemakha Apketka. Koka apiaskakmo la enenlhet, apkeltangkek na apmopvana ania'a Eniapom Neten.

¹¹ Aplheianme lhta Eniapom Neten hengellaiangkok aliennaktema ennenio'ok mankotnengvaianlha nnelha aniem'o m'a apketka apanko ie'.

¹² Apto la enenlhet akietnema apvalhok Apketka, nietnek na akiennaktema apneniek ma'a mankotnengvaianlha nnelha. Koka apto la nhan meietnema apvalhok Apketka nak ma'a, mang na nkoietnak akiennaktema apneniek.

¹³ Hai', lhamakho aktemakha asnaktalheskeskama nak ketlhengkap apkellelto nak meliaskeiam apvesai'a Eniapom Neten Apketka, kakpota eliangvomhok aknaikamok aliennaktema apnenio'ok mankotnengvaianlha nnelha.

¹⁴ Nengeliavek ennengko'o hengellailhave mota Eniapom Neten neksa nengelmalhnongkoma qaselha aklekelha la nhan apvalhok hengellangkok ma'a.

¹⁵ Neliavek apkailhave mota nelelmalhnongkoma m'a, hengellangkok hata nhan qaselha aktakha la nelelmalhnekama.

¹⁶ Hata apkelvet'o ta lhema enialheng apkelanai'a ngkolatsekama nkotno nak hengaqhemo, elelmalhneskes hata Eniapom Neten kakpota eniangkok akiennaktema apneniek ma'a. Koka nietnek na ngkolatsekama akmovana hengaqhek, koka skanek ko'o ntasek melelmalhneskes ankek ma'a apkelvet'o ta apkelan'o la lhema enialheng.

¹⁷ Lhamakho qaselha mankolpeivomo nak alvesai'a ngkollatsekama m'a, koka nietnek ngkolatsekama nkotno hengaqhemo.

¹⁸ Neliavek ennengko'o mongelaneianko ngkollatsekama apkellelto nak Eniapom Neten apketkak, ngkanek Eniapom Neten Apketka nak apkeltakmelkeskama m'a, mankavankek na nkonaqtevaksek keliaqhameio'.

¹⁹ Nengeliavek na ennengko'o nelleniem'o Eniapom Neten, koka apkellelto nak meleliehekhok malha aknaktetema m'a maniamolhma ngken anak.

²⁰ Nengeliavek na apvai'o lhta Eniapom Neten Apketka, hengellangkongvai'o lhta nhan aknema nengeliamo kakpota angeliekpelkangvomok ma'a apto have niapak anke nak niapom, nelpasmekhek na ennengko'o m'a aniem'o apketka Jesucristo. Koka apto Eniapom Neten, apto nha niapom have niapak anke, hengaikamok na akiennaktema enneniek nkotnengvaianlha nnelha.

²¹ Eietkak apketko'ok, melpasengvom ankek qaselha akiokha alanemmalhka nak.