1 Juan 2 - Nuevo Testamento Toba Maskoy

Cristo apto Henmasmo niapom

¹ Ketlhengkap eietkak apketko'ok, asnaktalheskaso nak vakkahak anak askeleltemakha etnangkok kakpota mellanankek qaselha ngkollatsekama, ka apkelan'o la ngkolatsekama lhema aphapak ham, apnek koka lhema apto Henmasmo niapom, Jesucristo apto nhan apeivomo m'a, enio ta mota m'a napaqtek Eniapom.

² Apkaiangkave lhtoka apmatnamo hengeliaqmoiekha have vanlha ennengko'o nengelelto nak nengellanekamo mota ngkollatsekama, koka nhan ma'a aplhamakho apkellanekamo nak ngkollatsekama lhmankek ham.

Apkeltemo Eniapom Neten angellamelalhka

³ Have niapak ankek neliekpelkavek ma'a ngkanek nengeleliehekhave mota hengellanemakha antangkok ma'a.

⁴ Koka apto la aplheianma apiekpelkemo m'a, man koka eliahakho apkellanemakha etnangkok ma'a, mok apatong koka m'a, mopvana ania'a, have iokhalhmek aplheianma m'a.

⁵ Koka envanka'ak ennengko'o angelleliehekhok apaivoma nak ma'a aniem'o nelletsavhongvaiakmo akiokho nkek nengasekhai'o nak hengaikamok ma'a Eniapom Neten, ka ngkanek neliavek nengelelto nelpasmekama m'a.

⁶ Enenlhet apto la aplhenammakpo pankek apto apasmekha m'a, nkaimelhkek na etnek aptemakha lhta mota m'a.

⁷ Ketlhengkap apkellelto nak askellamelaiam, have alhnankok henganemakha nak asnaktalheskaso nak, lhennenga koka m'a, apkellengai'a lhta nhan sekhek anke lhta ketlhengkap ma'a,

⁸ kolhva koka asnaktalheskaskek kakpota atneskesangkok malha alhnankok la'a. Apkeliehekhave lhta nhan Cristo henganemakha nak ma'a, apkelleliehekhavek na ketlhengkap nenvanlha nak ma'a, ntaqmelkasavek na akmak'o nkomaskengvomok malha ienaqteskama lhma lhta akvakmo akiavengko atsai'a lhma aktema have niapak ankek la'a.

⁹ Enenlhet apto la aplhenammakpo apankek aploma aiseksek atsak'elha lhma, koka aptaqnevakkek enialheng la'a, apmopvana ania'a m'a, aploka niekhe mokhom aiseksek ienaqtesakha lhma.

¹⁰ Enenlhet apto la apkasekhai'o enialheng la'a, koka apto nhan enenlhet aploma aiseksek atsak'elha lhma, mamma songkek ngkolatsekama apvalhok kakpota metengkesakpe pankek ma'a.

¹¹ Koka apto la aptaqnongkoma enialheng, malha metka apaqto'ok la m'a, apne mota, aploka nhan malha ienaqtesakha lhma la'a, meihok na apmangkolha la m'a.

¹² Asnaktalheskaskek vakkahak anak hengke'e ketlhengkap eietkak apketkok, ngkanek nne lhta aktemeskesangkankek apkellanekamok ngkollatsekama aniem'o m'a apvesai'a Jesucristo.

¹³ Asnaktalheskaskek na ketlhengkap apiapma'ak anak, ngkanek apkeliavek ma'a apnemo lhnak nanek tep nak nanek alanemmalhko sekha lhmankek ham. Asnaktalheskaskek na m'a ketlhengkap apketko'ok, ngkanek apkeltemeskesentanie koneng maniamolhma ngken anak.

¹⁴ Asnaktalheskaske lhta nhan vakkahak anak ketlhengkap eietkak apketkok, ngkanek apkeliavek Eniapom, asnaktalheskaske lhta nhan ketlhengkap apiapma'ak, ngkanek apkeliavek apnemo lhnak nanek tep nak nanek ma'a alanemmalhko sekha lhmankek ham, asnaktalheskaskek na ketlhengkap apketko'ok ngkanek melieniekhak Eniapom Neten anak apaivoma, apmelleihak apankavek nahan, apkeltemeskesentaniek koneng maniamolhma ngken anak.

¹⁵ Melteniamo nke mota qaselha ngkollatsekama aknaiangko nak nalhepop, mellanko nkek na apvalhok anak aliatengko la altemo ellanangkok qaselha ngkolatsekama. Apto la enenlhet apteniai'a mota ngkollatsekama, meniasekhek hata nhan Eniapom.

¹⁶ Akiaspongkomakha nak envalhok hengiatengkek angelanak qaselha ngkolatsekama, aniasepkeskamo nenvet'akha la'a, nkaqhama nhan engvalhok qaselha engankok. Koka have aniem'o Eniapom, aniem'o ngkollatsekama nak.

¹⁷ Nkomaskengvomok hata m'a ngkollatsekama nak kakpota nhan akmahai'akha na mota nkolanak engvalhok, koka mankomaskengvomek ma'a apto la enenlhet apkelanai'a apkeltemakha etnek Eniapom Neten, eloka ta nhan mankotnengvaianlha nnelha m'a.

Apto apkammelhma Cristo

¹⁸ Ketlhengkap eietkak apketkok, ketse nkaimelhkak aktemongvaianlha nnelha aknem lhma nkek ham, apkellengai'ak ketlhengkap aplheiam apto apkammelhma Cristo, kolhva koka apkeliephongvak aplhamakma apkellammelhma Cristo, ka ngkanek nengeliavek ennengko'o kanketva'ak aktemongvanlha nnelha aknem alhma nkek ham.

¹⁹ Apkakhangkek nenieseksa ennengko'o m'a apkellammelhmakha nak, koka hengelieniekhek lhta nhan ngkanek have netlhelhma'ak engankavek ma'a. Lhta kto la netlhelhma'ak engankavek ma'a, manghengelieniekhe lhta nhan ma'a, nelvetai'a koka iokhalhmek ankek have aplhamakho netlhelhma'ak ma'a.

²⁰ Ketlhengkap koka malha apkeliangkanma la apietsekso'ok aniem'o m'a apto Apokkenammap memangveiam ngkolatsekama nak, ka ngkanek nnankek neniekpelkemo nak aplhamakho ketlhengkap ma'a.

²¹ Asnaktalheskaskek ko'o vakkahak anak ngkanek apkeliavek ketlhengkap akto have niapak anke nak, apkeliavek na akmovana ania'a nak have aniem'o m'a akto have niapak anke nak.

²² ¿Se lha enenlhet aptema la apmopvana ania'a ie, he? Vanlha enenlhet aplheianma la Jesús have apto Cristo, apto nhan ma'a apkammelhma Cristo ngkanek aptaqnevakkek Apiapom kanhan Apketka.

²³ Enenlhet apto la aptaqnongkoma Apketka nak ma'a, aptaqnevakkek na m'a Apiapom anak, koka apto la nhan enenlhet apmama takha Apketka nak ma'a, apmek na takha Apiapom anak ma'a.

²⁴ Ka ngkanek ntasek ketlhengkap melvankamankek apkelleliehekho ania'a apkellengai'a sekhek anke lhta, ka aknangko la ania'a apqatko'ok anak ketlhengkap ma'a, apkelpasmakhek Apketka kanhan Apiapom ma'a,

²⁵ nkolhnangkok hata nhan aliennaktema apnenio'ok mankotnengvaianlha nnelha apeneskamo lhta aplheianma apkeleltennasekamok.

²⁶ Asnaktalheskaskek vakkahak anak askeltemo ellahok ma'a enenlhet anak apkenmahai'a na mota eliennengkeska.

²⁷ Koka mankaimommalhkak etlhekmoskak ma'a ngkanek Jesucristo malha apkeltemeskeskama apkeliangkanma apietsekso'ok ketlhengkap Espíritu Santo m'a, apkelloka nhan lhemek ketlhengkap ma'a. Hata etlhekmosangkok lhamakho aktemakha qaselha m'a, akto haveniapak ankek, metka akmovana ania'a nhan, apketlhekmoskamo lhta nhan ma'a etlhengkesek na apkelpasmekha Cristo.

²⁸ Ketlhengkap eietkak apketkok, etlhengkes hata apkelpasmekha Cristo kakpota apvanka'ak na elteteskamok metka apkenmangkasekama, metka altaikama nhan apvalho'ok apvaktamo ta m'a.

²⁹ Apkeliavek ketlhengkap Jesucristo apto apeivomo, ka lhamakho enenlhet anak apkellanekamok qaselha akpeivomo, apkellelto koka m'a Eniapom Neten apketkak.