1 Corintios 4 - Nuevo Testamento Toba Maskoy

Aktemakha apkenmakmekama nema alapaskamo

¹ Elioho ta ketlhengkap, ennengko'o nengelelto hengellasennaikama Cristo vanlha apankek, have koka nentangko neten apankavek, kakpota angetlhekmosangkok ania'a akielhammalhka nak aniem'o Eniapom Neten.

² Envanka'ak na angelvetaskesek enenlhet'avok nentaiangkolha nengeltaqmelkasemmalhko neksa nenmakmekama nenlhevai'a.

³ Nkaqhok hetlhenek aselhnanemmalhka ketlhengkap, nlho ka la nhan lhema hengiekpelkemo niapom, ko'o nhan molhenalhkek ehenkek aselhnanemmalhka ehenke.

⁴ Niekhe nhan aklhenaikama nak evalhok aktaqmanma askelanai'a ko'o, koka evankek kelha nhan mankoietek aklhenaikama evalhok ma'a. Vanlha koka Eniapom Neten apvankek elhenek akietemo nkek aktaqmanma nlho ka la ngkolatsekama.

⁵ Ka ngkanek mangkolatsema etlhenek ketlhengkap apketselhnanemmap po'ok la'a, ellaielh koka akvakmo aknem apvektanlha ta apto Apveske, hata el·hatsoksek qaselha alposemmalhka apvalho'ok anak kakpota enengkanvetak alhnakhoho, ngkolvetalhkak hata nhan m'a, etlhevangkok hata alianmoma alietakhelha la m'a.

⁶ Ketlhengkap elialheng'a, ka stakha lhkek askellano aspaioma kakpota nkoltaqmelkeskesek apkellangiemhaikama ketlhengkap ham ¡Elieplavkes hata nhan ketlhengkap nentaiangkolha nak Apolos kanhan ko'o! Mongeliekak ennengko'o henganemakha aktalhesammalhka. Moliephesamankek ketlhengkap ellakpok ma'a, eltemeskesentak na koneng po'ok la'a.

⁷ Nkanek Eniapom Neten apkeltemeskeskama apkelientalhnemo ketlhengkap ham, have aptaikamok apanke, ka ngkanek akhemo ellakpok ketlhengkap ma'a.

⁸ Nketlhenke mota apvalho'ok ketlhengkap apkellelto ngkeskama qaselha apanko'ok, mankaimommalhka qaselhaha nhan, nketlhenkek na apvalho'ok malha apkeliav'akha apkelveskai'e la'a, malha mongelaimelhkak na ennengko'o angelpasmok ma'a. Ntasek hatelha m'a etnangkok apkeliav'akha apkelveskai'e ketlhengkap kakpota antangkok ennengko'o lha malha apkelveskai'e nentemo lhemek la'a.

⁹ Malha niekhe Eniapom Neten hengeltemeskaskek alhaiek ankek ennengko'o hengellapaskamo mota, malha nenmammalhka nengeivekha nak netlhengama amai apieseksek enenlhet'avok hengellaneiakmo nak kanhan ángeles, nkolhek heniantemakho akieto nenmatnekhelha.

¹⁰ Netlhenalhkek na ennengko'o metka enqatko'ok aniem'o nellasennaikama Cristo, ketlhengkap koka apkeltemeskaskek Cristo nema apkeliamo. Netlhenalhkek na ennengko'o nengelelto mongeliennaktema, ketlhengkap koka apkeliennaktema. Manghengellak'ok na enenlhet'avok, ketlhengkap koka apkellak'ok ma'a.

¹¹ Ampai'o sekhe lhta akvakmo nenvanlha nak hengennapma mek, aknem hengennapma, metka nelentalhnema, avanhek na hennaqtevaskamo enenlhet'avok, metka nengaqhaiangkolha nhan.

¹² Avanhek neliampai'a aniem'o nenmakmekama akientalhnema enmeio'ok engankave. Neksa hengeliamenaikama enenlhet'avok, nellatemmoma koka aktaqmanma nempaivoma neleltemo nkoltaqmelek apkellaniemhaikama. Neksa hengenmenlhenaikama nhan, nengelvaskapkek koka ennengko'o.

¹³ Neksa nhan nema hengeltaknongkoma, nellatemmoma koka aktaqmanma nempaivoma, malha qaselha apavok anak alhammalhka, akmaskema nak nema anmaikama hengeltemeskasak nenvanlha nak ennengko'o.

¹⁴ Moltok ko'o enmangkak ketlhengkap asnaktalheskaso nak, vanlha askeltavek aleltennasangkok malha akto nak eietkak ehenko ie askellamelaiam anak.

¹⁵ Tokha m'a mantek apkellelto apketlhekmosekamok apanko'ok ketlhengkap ham, koka ko'o malha lhema asto apiapma'ak apankavek, alheianvai'a lhta ania'a aktaqmanma apieseksek anak ham, ka aptaiangko lhta nhan apkennemolhema apankave nak Cristo,

¹⁶ ka nkanek askeltavek helieplo'ok amai astemakha nak ko'o.

¹⁷ Ka ngkanek na askapaskamo lhta Timoteo ham, apto malha eietka ehenke askamelaiam meietnekho nhan netamen ko'o, etlhenkeskeskakhok apvalho'ok astemakha na mota ko'o aniem'o moi'askeiam Cristo, ka astemakha na mota asketlhekmoskamok aplhamakho iglesias.

¹⁸ Moklhem'a kelha ketlhengkap nkoliephesama apkellanema movataniek ham,

¹⁹ koka kolhvavek hata avatak ham apkelto la Apveske, alvetangvetak hata apkellelto nak aliephesekama apkellammakpo, vanlha koka mok apatno'ok niapma'ak ma'a, atengvatak hatelha apkenmopvanka la ellanangkok qaselha.

²⁰ Nkanek aptemakha nak Apveske Eniapom Neten have mok engatong neliatekama m'a, vanlha koka aknema akmovana m'a.

²¹ ¿Ko la apkeleltakha atnek asvaktamo ta ham apieseksek anak ketlhengkap, he. Aliamenvata, nlho ka allasekho kanhan nalhepek evalhok, he?