1 Corintios 16 - Nuevo Testamento Toba Maskoy

Patakkom nema allapaskeskama meliaskeiam

¹ Koka kolhvave nak asmak'ak aleltennasangkok aktemakha patakkom na lhta apkellankesaikokha ham kakpota elapaskesek apkelpokkenammap ma'a, ntasek etnangkok ma'a astakha lhta asketlhekmosekamok askeltemo lhta ellankesokhak iglesias akieto m'a Galacia.

² Lhamakho ampakhasekha aknem semana ta eltaqmelkeskasangkok nekha atkok patakkom akianmoma la apkenmakmekama aktakha la akianmoma kakpota mankaimalhkek ellankesokhak asvakho ta ko ham.

³ Eliekiesamo ta apankavek na ketlhengkap enenlhet apieseksek anak ham kakpota etsakhak patakkom anak kanha vakkahak aktalhesammalhka akieto m'a Jerusalen.

⁴ Askaimelhko la ko'o askeleltema la asketlhelhma'ak, ko'o ta nhan aniakhak ma'a.

Apmahai'a niekhe etnokhak amaika'a Pablo Corintios

⁵ Koka amanie sekhek hata aniakhak ma'a iokhalhma Macedonia, netamen hata avatak ham Corinto.

⁶ Alhek hatelha ham apieseksek ketlhengkap akvakmo apsavhekpo ta ieiam apvalhok, netamen hata m'a hellapaksek kakpota alhong mo'ok iokhalhma, helpasem hata nhan.

⁷ Momak'ak atnek ko'o iakvatakho la astaikama amaika'a ham, askeltavek koka alhek iama akvangkahko ham apkelto la nhan Eniapom Neten.

⁸ Asnek koka ko'o kolhvave nak hengke'e akieto Efeso akvakmo ta aknem ankok aktakmelaikama lhma Pentecostes.

⁹ Mantek na enenlhet apkenmahai'a ellailhok askeltennaikama ania'a aktaqmanma hengke'e, koka apkakhangkek na helammelhaikama hengke'e.

¹⁰ Hata apvaktamo ta Timoteo ham, eltaqmelkaso ta apkelanei'o kakpota nkolekkasama apvalhok ma'a, ngkanek apto asmakmekama lheme Apveske engankok ma'a.

¹¹ Meltemeskesenta nkek na koneng neksa aptaikama amaika ham, elpasem hato ka aimelhkelha la m'a kakpota elhiemok akieplomo aktaqmelaikama apvalhok hengke'e asnakha nak, askelailhek ko'o kakpota nhan engelialheng'a hengke'e.

¹² Avanhe lhta asiatekamok Apolos askeltemo enmeiakhak lhemek napokha engelialheng'a m'a, koka meniekhak ma'a, eniakhak hato ka metko la apkellan'elha.

¹³ Elel·halhnamok hata, eliennaktes hata nhan meliaskeiam anak, etnamok hata nhan apmakmosak'a. Eteniamok hata nhan apiempeiok neksa apkellangiemhaikama,

¹⁴ ellanamok hata nhan lhamakho qaselha akieplomo apkellasekhai'o.

¹⁵ Apkeliavek ketlhengkap apketkak anak Estefanas akieto Acaya, aptangko lhta apmaniaie apankavek apkenmaikamok takha ania'a aktaqmanma m'a, koka mokhom apketlhengkeskama aptaikamok apkellasennaikama apkellelto apkelpokkenammap ma'a.

¹⁶ Ellaho ta aplhamakho enenlhet aptaiangkolha nak apkennemolhema Estefanas, ellaho ta nhan aplhamakho apkellelto nak apkenmakmekama apkellasennaikama apkelialheng'a.

¹⁷ Avanhe lhta ko akpaihekha evalhok apkelvaktamo lhta hengke'e akno nak Estefanas, Fortunato kakpota nhan Acacio, apkelpaieskakhe lhta evalhok ngkanek aiose lhta ntema evalhok aniem'o molvetai'a ketlhengkap.

¹⁸ Malha lhta nha ntemak apnaklhatekhaskekta evalhok ka aptaiangkolha lhta nhan apkellanei'o ketlhengkap ham. Ellaho ta ketlhengkap aplhamakho enenlhet aptaiangkolha na mota m'a.

Aktakha nnelha apaivoma Pablo kanhan aklheianma apvalhok

¹⁹ Apkellapaskek atlheianma apvalho'ok iglesias apkakhangko nak hengke'e iokhalhma Asia nak, apkellapaskek na atlheianma apvalho'ok Aquila kakpota nhan aptava Pricila, apkellapaskek na atlheianma apvalho'ok akieplomo apvesai'a Apveske engankok iglesia apkaknekha na mota akhaiangkolha nkave nak ha'e.

²⁰ Ka nhan apkellapasak atlheianma apvalho'ok ketlhengkap aplhamakho nak hengke'e engelialheng'a, ketlhengkap hata nhan elpaivesakpok ham akieplomo apkelpetsesammap alhnai'o.

²¹ Ko'o nhan smak'ak nkolhenek evalhok ketlhengkap ham, astalheskama ehenkek koka.

²² Apno la enenlhet meniasekhai'o Apveske, nema akiematkeskama ta ma'. ¡Apkelhiakmek Apveske!

²³ Askeltavek ko'o Apveske engankok eltaqmelkeskesek apkellaniemhaikama ketlhengkap ham.

²⁴ Ko'o nhan avanhe askellasekhai'o ketlhengkap aniem'o Cristo Jesús.