1 Corintios 15 - Nuevo Testamento Toba Maskoy

Aktemakha nennaklhatekhangveiam neksa neletsepma

¹ Ketlhengkap elialheng'a askeltavek ko atlhenkeskakhok apvalho'ok aktemakha lhta askeltennaikama ania'a aktaqmanma apieseksek ketlhengkap ham, apkenmaiangke lhta takha, nkoihek na aptaikamok meliaskeiam akvakmo nenvanlha nak.

² Nkolhek hata nhan alvongkaso tep melvatesanko la aptaikamok meliaskeiam ania'a aktaqmanma nak askeleltennaskamo nak, koka apkelvatesangko la m'a, akhemo ta ngkotnek meliaskeiam alhta.

³ Asketlhekmoske lhta ko'o ketlhengkap emanie nke lhta alhevai'a ania'a aktemakha apketsepma lhta Cristo aniem'o mongeleliehekho hengaskamakha Eniapom Neten: Ka ntemak na aklheianma vakkahak Eniapom Neten apaivoma m'a.

⁴ Nnengkek nak aklhengkeskaiakmo nhan metaimong alhva aphapak ma'a, nemo nhan aklhatekhaskeiakmo neksa apketsepma m'a akvakmo hanetolhem'a aknem, ka ntemak ma'a aklheianma Eniapom Neten Apaivoma.

⁵ Netamen apvetaskesammakpo lhnak na Cefas ma'a kakpota nhan 12 apkeltamesaikamok alhta.

⁶ Netamen apkelvetaskesammakpo lhnak na mokhom malha tep 500 engelialheng'a m'a neksa apkaknaikama, moklhem'a apkelloka mokhom nenvanlha nak, aplhamakha koka apkeletsepmek ma'a.

⁷ Netamen na apvetaskesakpo Santiago kakpota nhan aplhamakho nema allapaskamo.

⁸ Netamen, alhaie nkek hetaskesakpo lhta nhan ko'o, malha aktonak nematka akiekai'a nak aknem apteiaianlha.

⁹ Hai, ko'o asto akmaselhte asiaspommalhka apieseksek anak ma'a nema allapaskamo nak, ngvannammalhkek evalhok atnek nema heiapaskamo ngkanek asmenlhenaikama lhta iglesia apankok Eniapom Neten.

¹⁰ Nkaqhok koka Eniapom Neten aktaqmanma nkek helanei'o, hetneskeskangke na apankek heiapaskamo mota. Have aqhemo asmakmekama nak, asteniai'o eiempek ko'o, aselhtek ma'a nema alapaskamo lhta, koka have asiennaktema ehenkok ehenke', koka aniem'o heiaikamok ma'a Eniapom Neten hetnema mota aplhelhma m'a.

¹¹ Aknemo mo'ok koka stemak neleltennaikama ania'a aktaqmanma nak astemo lhemek nema alapaskamo kakpota nhan ko'o, ka ania'a aktaqmanma nak meliaskeiakmo lhta nhan ketlhengkap ma'a.

¹² Ennengko'o nengeleltennaseiangkek aktemakha aplhatekhangveiam alhta Cristo apieseksek apkenmaskengvaiakmo ¿Se lha ntemak moklhem'a ketlhengkap apketlheianmo nak menaklhatekhangvomek hata m'a apkeletsepma nak, he?

¹³ Ka menaklhatekhangvakmo la apkeletsepma nak ma'a, melhatekhangvome lhta nhan Cristo m'a.

¹⁴ Lhta nhan melhatekhangvakmo la Cristo, akhemo ngkotnek neleltennaikama ania'a aktaqmanma, akhemo nha ngkotnek meliaskeiam anak ketlhengkap.

¹⁵ Ka menaklhatekhangvakmo la apkeletsepma nak, malha nha ngkotnek ennengko'o ketsekama ania'a la apkenmopvanka ania'a netlheianma Eniapom Neten aplhatekhaskeiam Cristo neksa apketsepma.

^16-17 Akto la iokhalhmek ma'a metka apnaklhatekhangveiam apkeletsepma nak, melhatekhangvome lhta nhan Cristo m'a, akhemo lhta nha ngkotnek meliaskeiam anak ketlhengkap, nkonmama nhan mokhom ngkollatsekama nak,

¹⁸ melvomek na tep apkeletsepma nak apkellelto lhta meliaskeiam Cristo.

¹⁹ Ka akto la have niapak ankek vanlha nkek aptema hempasmoma Cristo neksa nenganiemhaikama hengke'e takhalhet lhepop anak, mamma ngkotnek na m'a akieto mankolha aknem, eniosak'ak hata ngkotnek ennengko'o m'a.

²⁰ Aplhatekhangveiakmek koka Cristo m'a, have niapak ankek ma'a, apmanie pankek aplhatekhangveiam ma'a, malha aktonak amanie nkek anammalhka aktekteiapma nak.

²¹ Akvai'o lhnak nanek na nengetsepma nak aniem'o lhema enenlhet, akvai'o nhan nennaklhatekhangveiam anak neksa nengetsepma aniem'o nhan lhema enenlhet.

²² Adan nkeniemai'ak nengetsepma nak, Cristo koka nhan nkeniemai'ak ma'a akiennaktema enneniek nenlhamakho.

²³ Apmanie aplhatekhangveiam alhta Cristo ngkanek apto neten apankek ma'a apiaspommap, netamen apvaktamo ta mokhom ma'a, enaklhatekhangvomok hata m'a apkellelto nak apkennemolhema apankave nak.

²⁴ Netamen hata m'a ngkovomok aktakha nnelha aknem, koneng hata eltemeskasekhak Cristo apkelveskai'e, kakpota nhan nema apkeliennaktema nak, eniangkongvakhak hata apientalhnemo m'a Eniapom Neten takhalhet'ok lhamakho qaselha lhmankek ham.

²⁵ Hai, etnek hata apveske Cristo akvakho apkelteiammakho koneng apmankok allelto alammelhaikama la m'a,

²⁶ alhaie ka nkek hato ka etvaksek alammelhmakha akvesai'a nak nengetsepma.

²⁷ Eniapom Neten apnengkenke lhamakho qaselha koneng apmankok Cristo kakpota etnek apveske, koka have koneng ma'a Eniapom Neten Cristo, vanlha apnengkenke lhamakho qaselha apmankok Cristo.

²⁸ Hata akvo'o ta aknem Apketka apmaikama lhamakho qaselha lhmankek ham malha apveske, netamen enialhengvakhak hata napaqtek Eniapom neten kakpota etneskasekhak ma'a apientalhnemo apankek takhalhet'ok lhamakho qaselha lhmankek ham.

²⁹ Hai, have niapak ankek enaklhatekhangvomok hata apkeletsepma nak, ka nkeniemai'ak ma'a apkellavkesammakpo na apankave iemmen moklhem'a ketlhengkap apiaqmoiekha la lhema enenlhet apketsepma.

³⁰ Metko la nenlhatekhangveiam neksa nengetsepma, akhemo ngkotnek nellengaiangko mota akientalhnema neksa neleltennaikama ania'a aktaqmanma nak.

³¹ Lhamakho aknem atlhenkeskama mota amatong ma'a, have niapak ankek astakha nak. Koka malha akpaieskaiam evalhok ma'a aniem'o aptaikamok meliaskeiam ketlhengkap.

³² Askennapommalhkek enenlhet ko Efeso malha qaselha nevhak la akloma m'a, malha akhemo lhta nhan ngkotnek metko la nennaklhatekhangveianlha. Akhemo lhta nhan ngkotnek asteniai'o eiempek ma'a, ntase niekhe antangkok apketlheianmo na mota enenlhet ka aptaiangkok ma'a: "Ntasek antavangkok nentekamok, anienangkok nahan nkanek sosekha kelha angeletsepok", ka aptaiangkok ma'a.

³³ Mellanko nkek eliennengkesek ketlhengkap ma'a enenlhet'avok anak meliamolhma, meltamankek apketlhelhma'ak ngkanek ellekhok meliamolhma m'a.

³⁴ Enmekho mokhom altaqmanma aklhenaikama apvalho'ok, elieniekha koka nhan qaselha ngkolatsekama nak. Apkakhaiangkek nak na enenlhet'avok apieseksek anak ketlhengkap melioho' nak mokhom Eniapom Neten, ketlhengkap nkelleniemai'ak ma'a, enmankangvom koka.

Nennaklhatekhangveiam hata alhnankok neniokha

³⁵ Moklhem'a kelha ketlhengkap ngkotnek atlhenaikama apvalho'ok ko la ta ngkotnek nennaklhatekhangveiam hata netamen nengetsepma, niehek hatelha nhan aktemakha neniokha nak,

³⁶ koka meliangveiakmo moklhem'a ketlhengkap ma'a. Nkotnek hata malha aktonak aktek anak anammalhka, amanie angatonnek ma'a, malha atsepma la'a, netamen nkomaihekhak aiempek lhek, nkotektepok ma'a.

³⁷ Apaktek lhek nengatonnema trigo nlho ka la nhan mo'ok aktek, nkoiaqmokhak mo'ok aktemakha aktektepo la m'a.

³⁸ Netamen Eniapom Neten koka apkeliekieskasekamok ellangkok malha aliokha alpalhkammalhka koka, metka aknemo mo'ok, moklhem'a aktek altekteiapma alpalhkammalhka nhan ma'a metka nhan aknemo mo'ok.

³⁹ Nnavek na m'a apiokha nak enenlhet, mok aktema akiokha nak na kaselha nevhak, kanha ntak anata nak akiokha, mok aktema m'a, kakpota nhan kelasma nak akiokha.

⁴⁰ Nietnek na altaqmelo aliokha m'a qaselha aknaiangko nak neten, nietnek na altaqmelo aliokha qaselha nak hengke'e nalhepop, koka alpalhkammalhka metka aknemo mo'ok ma'a.

⁴¹ Apommatema nak aknem have aptonak pelten apkapommatema kakpota nhan mok aktema apkellapommatema iav'a, nietnek na apieseksek anak apkellapommatema alpalhkammalhka m'a, metka apnemo po'ok.

⁴² Hata ngkotnek ma'a apiokha enenlhet aplhatekhangvakmo ta neksa apketsepma. Nkokpelkalhkak koka apiokha atonnammalhka m'a, koka aplhatekhangvakmo la'a, mankokpelkalhkek metka aktemongvaiam annelha.

⁴³ qaselha atonnammalhka nak have akmamose m'a, mankoienna'ak ma'a. Koka aktekteiapma nak akto aktaqmanma nkek ma'a, nkoihek nahan.

⁴⁴ Atonnammlhka nak apiokha enenlhet apankek ma'a, koka aplhatekhangvakmo la mo'ok aktema apiokha aniem'o Espíritu. Hai, nietnek apioka enenlhet apanke, nietnek na apioka aniem'o Espíritu.

⁴⁵ Ka aktemo nak na aktalhesammalhka vakkahak Eniapom Neten apaivoma: «Nnengkek nak aiangko akiennaktema apkaniemhaikama apmanie pankek enenlhet apteiapma apvesai'a Adan». Koka malha alhaiek ankek apkemhaiam malha Adan koka apto apvanmongkoma hengaikamok neniennaktema.

⁴⁶ Koka amanie apteiapma apiokha enenlhet apanke, alhaiek apteiapma apiokha aniem'o Espíritu.

⁴⁷ Hai, apmanie lhnak nanek nema alanai'a enenlhet apanke apkeniemai'o m'a nalhepop, netamen na enenlhet apkeniemai'o nhan ma'a neten.

⁴⁸ Lhamakho ennengko'o nelelto nelloma nak mokhom takhalhet lhepop, nietnek neliokha malha enenlhet apiokha apkelanemmakpo lhnak nanek apkeniemai'o nalhepop, koka lhamakho apkellelto apkelloma nak neten, nietnek apkeliokha malha apiokha m'a enenlhet apkeniemai'o m'a neten.

⁴⁹ Ka kolhvave nak neliokha nak malha apiokha m'a enenlhet apkelanemmakpo lhnak nanek apkeniemai'o nalhepop, koka alhaiek hata m'a mo'ok neliokha malha enenlhet apkeniemai'o neten.

⁵⁰ Asmak'ak atnek allana ketlhengkap elialheng'a, enenlhet akietnema nak aphapetek kanhan ema apankok mankolpalhakvomek hata ma' aktemakha nak Aveske apmopvana Eniapom Neten. Qaselha nak akmovana nkokpelkalhka' mankavankek nkopalhkekha Qaselha nak mankokpelkammalhka.

⁵¹ Kolhva smak'ak aleltennaksek na Qaselha akielhammalhka nak nkovak hata hengke'e, have ta aplhamakho apkeletsepma enenlhet, koka nkoliaqmokhak hato ka mo'ok apkeliokha aplhamakho.

⁵² Pelapkeskama nke ta nkotnek akvai'a aknem anak ma'a, melvetankek hata nhan ma'a. Nkopaiok hata nhan trompeta, enaklhatekhangvomok hata apkeletsepma nak kakpota elloka m'a mangkotnengvaiam annelha, kanhan ennengko'o neliokha nak nkoiaqmokhak hata mo'ok.

^53-54 Nkaimelhkek neniokha nak akmovana nak nkokpelkalhka' nkoiaqmokhak mo'ok metka aktepelkammalhka. Neniokha nak atsepma mota, nkoiaqmokhak hata nhan mo'ok neniokha mankomovana nkotsepok. Hata akiaqmokho ta mo'ok neniokha nak mankokpelkalhkek hata kanhan mankotsepek, angelvetak hata aklheianmo lhnak nanek Eniapom Neten apaivoma, lhnak nane ntemak: «Aptevaskek nengetsepma nak apto apiephongveiakmo.

⁵⁵ Ka nengetsepma nak mankavankek mokhom hentemeskasenta koneng, mamma nha ntakhak heva ankok kakpota hengelieplha niekhe mokhom ma'a».

⁵⁶ Nengetsepma nak hengaqhaie akieplomo akmaikama malha heva nkok akvesai'a ngkollatsekama, koka ley anak akto akvetaskeskama apkelanai'a la meihamolhma enenlhet.

⁵⁷ Koka gracias Eniapom Neten hengellaiangko nenmopvanka'a kakpota angeliephongvomhok ennengko'o m'a, aniem'o nhan Apveske engankok Jesucristo.

⁵⁸ Ka nkanek na ntasek ketlhengkap elialheng'a askellamelaiam, elienna ta metka apkelvatesaikamok na apkenmakmesaikama Apveske engankok anak, have aqhemo nhan apkenmakmesaikama ketlhengkap ma'a.