Yilipai 1 - Tolomaku Portions 1909

SOPENA 1.

¹ Paul me Timote, ra tahavarao hi Iesu Kristo, me ra uluo hi Iesu vunuvunu me Vilipai, me ra varese hina lotu, me ra varese tahamata na sule.

² Motahonai Atua Tamaja me na Moli Iesu Kristo teaso tahonai suri amiu, terahu me amiu na lolotamautu.

³ Aaso tahonai me Atua me na rani vunuvunu anini-ma amiu.

⁴ Me na rani vunuvunu aninima amiu amatapisi suri amiu me na ejieji.

⁵ Suria oto-tuiturituau me na Leo Tahonai me na majihana rani, me na havui.

⁶ Apinisi susuhi na sanu naa, inie isei movaere na varao tahonai me amiu tomovea me na rani hi Iesu Kristo imalua:

⁷ Motahonai aninima amiu suria ameje amiu me na lolou: suria me na rani tehajiriau, me na varao hina Leo Tahonai oto-tuiturituau.

⁸ Suria Atua mopinisi na lolou movano me amiu me na varao hi Iesu Kristo.

⁹ Amatapisi sura semiu meje mojiha tahajia me tahajia me na pinisi me na lolorani.

¹⁰ Sura otomeje ra sanu tahonai tohova, sura ototaharahu, saite sanu oso me amiu me na rani Iesu Kristo imalua.

¹¹ Motahonai na vana hau hina mauri tataholo mota-vere me amiu me Iesu Kristo, sura teaso tahonai me Atua, tehalea.

¹² Ameje amiu, tuahau, otopinisi ra sanu temalua meau tetuiturituana Leo Tahonai sura ilaho paravu.

¹³ Ra tahajumu isei temata na moli tahajia me ra valura tajua tepinisi aauri suri Kristo.

¹⁴ Ra tari hi ra uluo hi Kristo tereni ra asi hiu, tejiha tahajia, teaso hauhaua na Leo, tesaine.

¹⁵ Valura telalaa suri Kristo suria te-manomano-oso jojo nie, temeje na jumu; valura telalaa suria temejeia:

¹⁶ Valura telalaa suri Kristo sura asoaso, tejihajiha, suria teninima tehajiau me na asi hiu.

¹⁷ Maa ra valura telalaa suria tepinisi mopilau varao sura turehoro suri na Leo Tapu.

¹⁸ Motoma? Me na vue ra tari, vai tejihajiha e tetaharahu, telalaa suri Kristo; suria aejieji, aejieji pa.

¹⁹ Suria otomatapisi suriau, suria alavi pilau na meje tahajia sei Iesu, ra sanu vunuvunu tevarao suri na seu jolo.

²⁰ Paleeno amanomanoe, ameje a-sa-tamatamalihi suria, maa suria alalaa tuitui me na havui, taupa mono, tehale Iesu me na epeu, hina seu mauri e hina seu mate.

²¹ Na mauri meau inie Kristo; maa na mate motahonai jivia.

²² Maa vai aitoho me na epeu, ra sanu naa na vana pilau varao: maa asapinisi alavi sava.

²³ Suria atoho me na vuati hira rio morua, ameje na mule sura toho valui Kristo; motahonai tohova:

²⁴ Maa motahonai me amiu atoho me na epeu.

²⁵ Suria aninima palea, apinisi atoho pa valui amiu sura tuiturituamiu otolaho paravu me na ejieji me na rohoroho.

²⁶ Sura otoejieji tohova me Iesu Kristo suriau suria atanumai me amiu.

²⁷ Maa otosiaso pala na Leo Tahonai hi Kristo: suria vai anumai areni amiu e mojoa, aroho pa suri amiu ototuri hauhaua me na lolotea, otovarao vahatea me na lolotea suri na rohoroho me na Leo Tahonai.

²⁸ Ototena ine taiti ra satuamiu: ta mera inie na mata-mata hina puelimiu, maa me amiu na matamata hina jolo, na matamata me Atua.

²⁹ Mopilamiu suri Kristo sura rohoroho mea, sura lavi mono ra sanuoso suria.

³⁰ Naano na varao hauhaua otoreniau avea, otoroho avea tohoreji.