Zekariya 6 - La Bible en Otetela (Bible K'Ekila) 1991

Pusupusu ya Ta Nyei

¹ Dimi lakedia ashu ntu, lakendi, menyi ku pusupusu nyei nye lʼasa ekungu ehendi. Ekungu ako waki wʼehotela.

² Lu pusupusu ka ntundu, kaki falasa ya tilili; lu pusupusu ka hendi, falasa yʼedima;

³ lu pusupusu ka satu, falasa ya wema; la lu pusupusu ka nei, falasa yʼekesekese yʼawadi awadi.

⁴ Ku dimi lakambula ondjelo wakateketaka la mi nti: Na kitshimudi ya falasa ku, khumemi?

⁵ Ondjelo akankaluya diui ati: Yo yeli pepe nyei ya lʼulungu yatutumbaka uma lu dihuli diatuyuyalaka la ntundu ka latuyalaka kanga kete tshe.

⁶ Pusupusu kaki la falasa yʼedima kaka-tshu utsha lu kete ya ngelʼa kushi. Ku falasa ya wema yakatshu lu kete ya lu leke lʼedjelu. Falasa yʼekesekese yʼawadi awadi yakatshu utsha lu kete ya lu leke la diku dia kushi.

⁷ Lamʼakatumbi falasa, yo yakahasahasa dia nkindula lu ahuli tshe wa la kete. Ku ondjelo akayitela ati: Nyutshu, nyukinduli lu kete tshe Okone yo yakakindula lu kete tshe.

⁸ Ku ndi akambeti, akamvutela ati: Enda, yo yambutsho utsha lu kete ya la ngelʼa kushi, dia ntolembohaya nyuma kami lu kete ya la ngelʼa kushi.

Djimbitelu ya Diulelu ya Jashua

⁹ Diui dia Latuyalaka diakayi le mi ntu ati:

¹⁰ Kose Heledai, Tobidja, la Jedaya, uma lʼatei a fumbi yuyi uma la Babilona, kutshu lushi lako le khumbu ka Josiya, onʼa Zefaniya.

¹¹ Kutose fesa la paunyi uma le wo; kuyitshi dembo dia kusu dia diulelu, kudilimbe lʼote wa Jashua, olombedi a ladiku, onʼa Jehozadaka.

¹² Kuwuteli wati: Latuyalaka Kanga lulimbilimbi kata ati: Ulungi, unti lukanga lukumbu lone ati: Lukuno, ayula lu dihuli diandi; ayuhika etemwelo ka Latuyalaka.

¹³ Ndi ayuhika etemwelo ka Latuyalaka, ayuyala la lutumbu, ayudjase lu kiti kandi ka diulelu, ayulela. Olombedi omotshi ayuyala lasuki la kiti kandi ka diulelu, ku ekesanelu ka ki kayuyala lʼatei awo.

¹⁴ Dembo dia kusu diayuyala lu etemwelo ka Latuyalaka, uku euhwelu le Heledai, Tobidja, Jedaya, le Josiya, onʼa Zefaniya.

¹⁵ Ku wane weli etali, wayuya, wayuyukimanyia dia mpika etemwelo ka Latuyalaka; ku nyu nyayeya nyati: Latuyalaka Kanga lulimbilimbi kakantumi le nyu. Dikambu so diayuyala, naka nyu nyayukitanyia diui dia Latuyalaka, Unyashungu anyu.