Zekariya 5 - La Bible en Otetela (Bible K'Ekila) 1991

Buku Dia Wombo Diayafumbo

¹ Dimi lakedia ashu ntu, lakendi, menyi ku wombo wa mukanda one wayafumbo.

² Ndi akamumbula ati: Kakona kenaye? Ku dimi lakakaluya diui nti: Wombo wa mukanda mbenami wayafunibo: utali awo kubita akuma hendi; la wekeki awo, kubita dikumi.

³ Ku ndi akamvutela ati: Uku eli mananu kambudiangana ladiku dia kete tshe, ne dia untu tshe latuvaka, ayutshanyema uku to; la one latutshibaka, ayutshanyema uku to.

⁴ Latuyalaka Kanga lulimbilimbi kata ati: Dimi layutuma wombo ako. Ku vo wayoto lu luudu la kanga uvi, ndu lu luudu la one latutshi baka lukumbu lami utshibatshiba. Vo wayudjase lʼatei a luudu landi, wayulu-tshumba kame lʼetamba alo la ave alo.

Umuntu la Efa

⁵ Ondjelo wa Unyashungu wakateketaka la mi akasukana, akamvutela ati: Edia ashu aye kakiane, endi dikambu diambutumba.

⁶ Dimi lakawumbula nti: Na dikambu diku? Ku ndi akamvutela ati: Efa keku kayatumbi. Ndi akamvutela ntu ati: Uku eli kolo lu kete tshe.

⁷ Menyi ku ufudi wa kapindji one wambunela, ku umuntu omotshi one udjashi lʼetei a efa.

⁸ Ndi akati ati: Uku eli Kolo. Ndi akasukula umuntu ako lʼetei a efa, ku ndi akakaluya ukama wa kapindji lʼunyo ato la khudu.

⁹ Ku dimi lakedia ashu, lakendi, menyi ku amantu ahendi ane wayatumbi uma loko; lopepe laki lu ahafu awo. Vo waki la ahafu uku wa yemema. Vo wakedia efa lʼasa ulungu la kete.

¹⁰ Ku dimi lakambula ondjelo wakateketaka la mi nti: Utsha lendi atawembe! efa keku?

¹¹ Ndi aka-nkaluya diui ati: Dia ntukihikela uudu la kete ya Shinare. Ku lamʼayuluhikama, vo wayutukitsha efa lu ekitshelu kato leko.