Zekariya 4 - La Bible en Otetela (Bible K'Ekila) 1991

Ekitshelu ka Tala la Eweli

¹ Ondjelo wa Unyashungu wakateketaka la mi akayi ntu, akayumemula uku untu lemulawo uma lu djo.

² Ndi akamumbula ati. Kenaye na? Ku dimi lakûkaluya diui nti: Dimi lakendji, ku lakenyi ekitshelu ka tala tshe paunyi ketu, dikoho la atala ato esambeli ladiku, kame la epundu esambeli weli lu tala la tala dieli ladiku diato.

³ Eweli ehendi weko lasuki lato: omotshi lu lunya la pami, la ukina lu lunya la lomoso la dikoho.

⁴ Dimi lakambula ondjelo wakateketaka la mi nti: Na kitshimudi ya akambu ane na, khumemi?

⁵ Ku ondjelo wakateketaka la mi akankaluya diui ati: We heyi kitshimudi ya akambu ane? Dimi lakûkaluya diui nti: Kema, khumemi.

⁶ Ku ndi akamvutela ati: Uku eli diui dia Latuyalaka le Zerubabele ati Aha uma lu wulu wa ta, kana uma lu khudu, keli uma le Nyuma kami, mbata Latuyalaka Kanga lulimbilimbi.

⁷ Kakona keye, we ukungu a wuki? We ayuyala bamubamu la ntundu ka Zerubabele. Ndi ayukitsha dive dia lʼote wa luudu la waelu wʼongenongeno vati: Ngandji ka mamba, ngandji ka mamba le dio!

⁸ Di li dia Latuyalaka diakayi le mi ntu ati:

⁹ Anya wa Zerubabele mbakahiki etshina ka luudu lone, anya andi mbayulushidiya. Ku nyu nyayeya nyati: Latuyalaka Kanga lulimbilimbi kakantumi le nyu.

¹⁰ Ne dia untu tshe lakonyola lushi lʼakambu wa tshitshe, ayongenangena, ndu ayena okodi a wedikelu lu lunya la Zerubabele. Ne dia atala ako esambeli weko ashu wa Latuyalaka, watetetaka lu ahuli tshe wa la kete.

¹¹ Ku dimi lakawumbula nti: Na kitshimudi ya eweli ehendi ene weli: omotshi lu leke la lunya la pami, la ukina lu leke la lunya la lomoso lʼekitshelu ka tala?

¹² Dimi lakawumbula etena ka hendi nti: Na kitshimudi ya tahi hyena: yʼeweli ku, yeli lasuki la epundu ehendi wa paunyi watokediaka iso ka tilili vame?

¹³ Ndi akamumbula ati: We heyi kitshimudi yawo? Ku dimi lakûkaluya diui nti: Kema, khumemi.

¹⁴ Ku ndi akamvutela ati: Wane weli akitami wʼiso ehendi, watemalaka lasuki la Latuyalaka kanga kete tshe.