Zekariya 2 - La Bible en Otetela (Bible K'Ekila) 1991

Wane Wakatshanyema Wambusanganyema

¹ Dimi lakedia ashu, lakendi, menyi ku pami kemotshi kene ukimedi okodi wa wedikelu lu lunya landi.

² Dimi lakawumbula nti: Utsha lendi atayatshu? Ku ndi akankaluya diui ati: Dia ntedika Jerusalema, dia ntena uku eli wuki ayo, uku eli utali ayo.

³ Menyi ku ondjelo wa Unyashungu ukina ambuya dia ndjuhumana la ndi.

⁴ Ndi akawutela ati: Ulawo, ututeli olongo a pami uku wati: Jerusalema ayuyala la antu uku tungelungelu tana la peli uma lu efula kʼantu la dungalunga dieli loko,

⁵ ne dia Latuyalaka kata ati: Dimi layuyala eheli ka dja lʼutshimba awo tshe, ndu layuyala lutu-mbu lʼatei awo.

⁶ He nyuneli! he nyuneli! Nyulawo uma lu kete ya ngelʼa kushi, ne dia dimi lakayudianganya lu beke nei diʼulungu, mbata Latuyalaka.

⁷ We Siona ludjashi la ona umuntu a Babilona, he uneli! uyashimbeli.

⁸ Lʼokongo wa lutumbu la Latuyalaka Kanga lulimbilimbi, Latuyalaka akantumi le wedja wakanyumbaka diango. Ndi akati ati: One lakanyunanda, akananda onʼa su diandi.

⁹ Nyulungi, dimi layetshetsha lunya lami ladiku diawo. Ku vo wayuyala engo ka dimbu le wane waki lʼokongo awo. Osoku nyayeya nyati: Latuyalaka Kanga lulimbilimbi kakantumi.

¹⁰ We ona umuntu Siona, imbi esambu, ongenengene. Enda, dimi lambuya, layudjase lʼatei aye, mbata Latuyalaka.

¹¹ Wedja efula wayumamema, dimi Latuyalaka, lushi lako. Vo wayuyala wudja ami. Dimi layudjase lʼatei aye, ku we ayeya wati: Latuyalaka Kanga lulimbilimbi kakantumi le ye.

¹² Latuyalaka ayukita Juda uku etenyi kandi kʼukito lu kete yʼekila, ndu ayosonola Jerusalema ntu.

¹³ Nyu antu tshe, nyolembohali ki la ntundu ka Latuyalaka, ne dia ndi ambunela uma lʼedjaselu kandi kʼekila.