Walelu 9 - La Bible en Otetela (Bible K'Ekila) 1991

Dambu diʼElekanelu

¹ Latuyalaka akatela Mose lʼusui wa shenga wa Sinai, lu ngondo ka ntundu kʼeleku ka hendi, lʼokongo wʼetumbelu kawo uma lu kete ya Edjibitu, ati:

² Asi Isariyele kawutshaki dambu diʼelekanelu lʼetena kadio.

³ Kanyuditshaki la dikolo dia lushi la dikumi lʼanei la ngondo kene. Kanyuditshaki uku elembe adio tshe la adjangu adio tshe.

⁴ Mose akatela asi Isariyele dia vo ntshaka dambu diʼelekanelu.

⁵ Ku vo wakatshi dambu diʼelekanelu lʼusui wa shenga wa Sinai, la dikolo dia lushi la dikumi la ngondo ka ntundu. Asi Isariyele wakatshi akambu tshe wakadjangela Latuyalaka Mose.

⁶ Antu amotshi waki kumbeya ntsha dambu diʼelekanelu lushi lako, ne dia vo wakayala mindu uma lʼesakanelu kawo lʼudu, wakayi la ntundu ka Mose la Arona lushi lako.

⁷ Ku vo wakawutela vati: Shu takayadi mindu, ne dia takasakanyi la udu. Ngandi ukukisu nshimbama dia nambula Latuyalaka ulambu lʼetena kawo lʼatei wa Isariyele?

⁸ Ku Mose akawatela ati: Nyukungi lane, nteyi kene kayuta Latuyalaka lu dikambu dianyu.

⁹ Latuyalaka akatela Mose ati:

¹⁰ Uteli asi Isariyele wati: Naka untu lʼatei anyu, kana lʼatei a tukanula tanyu, ambuyala mindu ne dia ndi akasakanyi la udu, kana ne dia ndi eko lu lokendo lʼetali, ndi katshi dambu diʼelekanelu dia nemia Latuyalaka.

¹¹ Ndi kaditshi la ma diaha la edya la akatshi wʼukai la dikolo dia lushi la dikumi lʼanei lu ngondo ka hendi.

¹² Kalami elembe tshe wa dambu diʼelekanelu. Tatshikaki nduku yema edja ndu la pindju. Tatetaki nduku weka.

¹³ Naka untu, leli pudipudi kana laha lu lokendo, ambutuna ntsha dambu diʼelekanelu, untu ako ayunyema uma lʼatei a wudja awo, ne dia ndi kunambula Latuyalaka ulambu lʼetena kawo. Unungu wa kolo kandi ayuyala lʼote andi.

¹⁴ Naka ongendangenda ludjashi lʼatei anyu ayulanga ntsha dambu diʼelekanelu dia Latuyalaka, kaditshi uku weli olembe adio la didjangu diadio. Kanyuyali lʼolembe otoi, le ongendangenda ndu le usi ngelu.

Dingi Ladiku diʼEtemwelo ka Dipema

¹⁵ Lu lushi lakaweme etemwelo ka dipema, dingi diakakumbi etemwelo kako, luudu la dipema lʼomenyi. Umaka dikolo edja ndu pindju, dingi diako diakahetaka uku dja ladiku dia etemwelo.

¹⁶ Osoku mbakadiayalaka nshi tshe. Dingi diakakikumbaka la yanyi, ku lʼutshu dio diakayala uku dja.

¹⁷ Lamʼakamoka dingi uma ladiku dia luudu la dipema, asi Isariyele wakunelaka. Lu ahuli tshe wakatemalaka dingi, mbakatahangaka asi Isariyele.

¹⁸ Uma lu diui dia Latuyalaka mbakunelaka asi Isariyele; ndu uma lu diui diandi, mbakawatahangaka. Etena tshe kakatshikalaka dingi ladiku dia etemwelo ka dipema, kakawahangaka.

¹⁹ Lamʼakatshikalaka dingi edja ladiku diʼetemwelo ka dipema, asi Isariyele wakakitanyiaka olembe wa Latuyalaka, vo kumunelaka.

²⁰ Tena dimotshi, dingi diakatshikalaka ladiku dia etemwelo ka dipema nshi motshi tshu. Asi Isariyele wakahangaka uku diui dia Latuyalaka; ku wakunelaka uku diui dia Latuyalaka le wo.

²¹ Tena dimotshi, dingi diakatshikalaka umaka dikolo edja ndu pindju. Ku lamʼakamoka dingi la pindju, vo wakunelaka. Kana la yanyi kana lʼutshu, lamʼakatamoka dingi, ku vo munela.

²² Kana nshi hyendi, kana ngondo, kuyanga etena kʼutali, kakatshikalaka dingi ladiku dia etemwelo ka dipema, asi Isariyele wakahangaka, vo kumunelaka. Keli etena tshe kakamoka dingi, vo wakunelaka.

²³ Lu diui dia Latuyalaka mbakawatahangaka, ndu lu diui dia Latuyalaka mbakawatunelaka. Vo wakakitanyiaka olembe wa Latuyalaka uma le Mose.