Walelu 5 - La Bible en Otetela (Bible K'Ekila) 1991

Wambutshanya Antu wa Mindu Uma lu Pangu

¹ Latuyalaka akatela Mose ati:

² Uteli asi Isariyele watundja kanga sudi tshe uma lu pangu, untu tshe lakela tunya, ndu untu tshe lakasana uma lʼesakanelu kandi la udu.

³ Nyunya ndu pami ndu umuntu, nyatundja lʼandja a pangu, watukukiete mindu, ne dia lʼatei ato kudjashimi.

⁴ Asi Isariyele wakatshi osoku, wakatundja lʼandja a pangu. Uku akatela Latuyalaka Mose, mbakatshi asi Isariyele.

⁵ Latuyalaka akatela Mose ati:

⁶ Uteli asi Isariyele wati: Lamʼatshela pami kana umuntu unyandi kolo wuhu watutshaka antu, dia mpedia Latuyalaka, untu ako eko la unungu.

⁷ Ndi kashuli kolo kakandatshi. Kafuti unungu wa kolo kandi. Kahe ndu etenyi ka tanu kʼushinga wʼunungu ladiku; ku ndi ndjusha untu lakandatshela kolo.

⁸ Naka untu lakandatshela kolo taki la untu lakutoka la ndi, lukuki nungula engo kalangandi nkaluya, engo kako kayukimwama le Latuyalaka, kayuyala kʼolombedi, ladiku dia okoko wʼumi wakandakimwi dia mbutungela ekesanelu.

⁹ Ulambu tshe, diango tshe diʼekila dʼasi Isariyele, diatuwelaka le olombedi, diayuyala diandi.

¹⁰ Ee, diango tshe diʼekila diayelaka untu, diayuyala diandi. Diango tshe diatukimoka untu le olombedi, diayuyalaka diandi.

Olembe lu Dikambu dia Kandjema

¹¹ Latuyalaka akatela Mose ati:

¹² Kuteli asi Isariyele wati: Naka untu amboseka umendi, ambutsho le pami kekina,

¹³ ku naka pami kako ambeyana la ndi, la umendi heyi dikambu so, ku naka umuntu ayusana la ndi lu usheshe ku nduku untu luwenyi, la hawuwundji tshu kʼanya,

¹⁴ naka ndi ambuka wadendi kandjema ne dia ndi akatshi kana nkutsha,

¹⁵ ndi katshu la wadendi le olombedi. Katole etenyi ka dikumi ka efa ka shima kʼasami, ulambu dikambu dia wadendi. Ndi tadjaki iso kana tsho loko. Vo weli ulambu wa shima ne dia kandjema, ulambu wa shima wa euhwelu, wa mbuhoka kolo.

¹⁶ Olombedi ayuya la ndi, ayuweme la ntundu ka Latuyalaka.

¹⁷ Olombedi ayosa ashi wʼekila lu mbaka, ayosa ditshu diʼuma lʼudihi wʼetemwelo ka dipema, ayudidja lu ashi ako.

¹⁸ Olombedi ayeme umuntu la ntundu ka Latuyalaka, ayuwete divu esakalaka, ayuwudjela ulambu wa shima wʼeuhwelu lu anya, ulambu wa shima wa kandjema. Olombedi ayukimela ashi wʼululu watutungaka mananu lʼanya andi.

¹⁹ Ku olombedi ayutshibia umuntu ati: Naka pami kumbeyana la ye, naka we kombetola lu mbuka dia ndjasanya, keli we aki la tshina dia umeye, uhandi uma lu ashi ane wʼululu watutungaka mananu.

²⁰ Keli naka we aketola uma le umeye, naka we akayasanya, akeyana la pami kekina, kaha umeye.

²¹ Ku (olombedi ayutshibia umuntu la etshibelu ka mananu ati:) Latuyalaka akudji mananu, akete engo ka wononyi ndu ka etshibelu le wudja anyu, lamʼayundukondja ehelohelo ndu lamʼayundukudia dikundju.

²² Ku ashi ane watutungaka mananu wayoto lʼesohi aye dia nkudia dikundju, la nkondja ehelohelo! Ku umuntu ayuta ati: Ayali osoku! Ayali osoku!

²³ Ku olombedi ayufunda mananu yako lu buku, ku ndi ayuyidimula lʼashi wʼululu.

²⁴ Ndi ayonosha umuntu ashi ako wʼululu watutungaka mananu, ku ashi ako wayoto lu dimba diandi, wayutunga kandji ka wulu.

²⁵ Olombedi ayosa ulambu wa shima ne dia kandjema uma lʼanya wa umuntu, ayuwetshetsha la ntundu ka Latuyalaka, ayuwela uya lʼediakelu.

²⁶ Ku olombedi ayosa diwambu otoi diʼulambu wa shima uku euhwelu kato, ayuditshumba lʼediakelu. Lʼokongo diku, ndi ayonosha umuntu ashi ako.

²⁷ Lamʼayundonosha ashi, ku naka ndi akayasanya, akatuni umendi, ashi watutungaka mananu wayoto lu dimba diandi, wayutunga kandji ka wulu, ku dikundju diandi diayuda, ndu ehelohelo kandi kayonda. Ku umuntu ayuyala engo ka wononyi lʼatei a wudja awo.

²⁸ Keli naka untu kundjasanya, eko pudipudi, ndi ayuhanda, ndu ayuyala la diwutshi.

²⁹ Oso eli olembe ne dia kandjema, lamʼaseka umuntu umendi, dia mbetola uma le ndi, la ndjasanya le pami kekina,

³⁰ kana lamuka pami wadendi kandjema. Ndi keme wadendi la ntundu ka Latuyalaka, ku olombedi ayutshela akambu tshe weli lʼolembe one.

³¹ Ku umi ayuhanda uma lu kolo, keli umuntu ayemba kolo kandi.