Walelu 4 - La Bible en Otetela (Bible K'Ekila) 1991

Elimu Wakawasha Asi Lewi

¹ Latuyalaka akatela Mose la Arona ati:

² Kanyali efula kʼasika Kohata lʼatei wʼasi Lewi, lu khumbu yawo ndu lu mvudu ya washewo.

³ Kanyali apami tshe wukuki ntsha ulimu, weli la deku akumi asatu pulu ndu akumi atanu, dia vo ntshaka ulimu lu luudu lʼesanganelu la dipema.

⁴ Onʼeli ulimu wayutshaka ana apami wa Kohata lu luudu lʼesanganelu la dipema: diango diuleki ekila.

⁵ Lamʼayuyangaka asi Isariyele munela, Arona la anʼandi wʼapami kawotoki loko, kawuhanulaki dihondo diʼatanyelu, ku vo dikumba oshete wʼomenyi.

⁶ Kawuwaheki ukumbo wa dikuhu dia mbudi, kawufeki ndu dihondo diʼudima utu; ku vo ndjosome esimbi lʼoshete ako.

⁷ Kawalaki dihondo diʼudima ladiku dia mesa wa ma diʼEyalelu. Kawukitshaki alonga wʼekalekali, alonga wʼafuku ne dia malashi, ndu etika la tolondo ne dia elambu wa dinono. Kawukitshaki ndu ma diatuyalaka tena tshe laawo.

⁸ Kawaheki dihondo dia tilili. Kawufeki ndu ukumbo wa dikuhu dia mbudi; ku vo ndjosome esimbi lu mesa ako.

⁹ Kawosaki dihondo diʼudima, kudikumbaki ekitshelu ka tala la atala ato, tosholo tato ta nyima atala, alonga awo wa minyaka utuku, la diango diawo tshe dia mbidja iso, ndu kene tshe katuwutshaka la to ulimu.

¹⁰ Kawukiombaki kame la diango diato tshe diʼulimu lu ukumbo wa dikuhu dia mbudi; ku vo ndjukiahe ladiku diʼesimbi wʼembelo.

¹¹ Kawalaki dihondo diʼudima lʼediakelu ka paunyi, kawudikumbaki la ukumbo wa dikuhu dia mbudi, ku vo ndjukisome esimbi.

¹² Kawosaki diango tshe diatuwutshaka la dio ulimu lʼetemwelo. Kawudiombaki lu dihondo diʼudima. Kawudikumbaki ukumbo wa dikuhu dia mbudi; ku vo ndjudiahe ladiku diʼesimbi wʼembelo.

¹³ Kawunyaki utuku uma lʼediakelu, kawalaki dihondo dia tilili ladiku diato;

¹⁴ ku vo ndjukitsha diango tshe diatuwutshaka la to ulimu ladiku diato: panu yʼakalanga, somo, kasu, alonga, diango tshe diʼulimu dia lʼediakelu. Kawukikumbaki ukumbo wa dikuhu dia mbudi; ku vo ndjukisome esimbi ato.

¹⁵ Lamʼayushidiya Arona la anʼandi momba etemwelo la diango diato tshe diʼulimu, ana apami wa Kohata kawuyakaki dia ndjemba diango diako lamʼayunelaka asi Isariyele. Keli vo tawunandaka diango diʼekila, ne dia watukuvo. Oso eli diango diʼulimu wa luudu lʼesanganelu la dipema diakawasha ana apami wa Kohata dia membaka.

¹⁶ Eleazara, onʼa olombedi Arona, ayuyala la okende wa namaka iso ka tala, malashi wʼupumu, ulambu wa shima kahashili, iso ka lukita. Ndi ayuyala la okende wa namaka etemwelo ka dipema la kene tshe keli loko, etemwelo la diango diato diʼulimu.

¹⁷ Latuyalaka akatela Mose la Arona ati:

¹⁸ Tanyunyaki diuhu dia khumbu yʼasika Kohata uma lʼatei wʼasi Lewi.

¹⁹ Kanyatshelaki okone mbayuwulumba, watukuvo lamʼayuwusukana lasuki la diango diuleki ekila. Arona la anʼandi kawotoki loko, kawukahanyaki untu lʼuntu ulimu andi la ushiko andi.

²⁰ Keli vo tawotoki loko, dia ntuka diango diʼekila su, watukuvo.

²¹ Latuyalaka akatela Mose ati:

²² Kali ndu efula kʼana apami wʼasika Ngereshona, uku khumbu yawo, la mvudu ya washewo.

²³ Kali wane tshe weli la deku akumi asatu pulu ndu akumi atanu, wukuki ntsha elimu lu luudu lʼesanganelu la dipema.

²⁴ Lanʼeli ulimu wahumba khumbu kʼasika Ngereshona ntsha, la eshiko wahumbawo memba.

²⁵ Vo kawembaki apema wa etemwelo ka dipema, ndu luudu lʼesanganelu la dipema, kame la ukumbo alo, ndu ukumbo wa dikuhu dia mbudi watulukumbaka, ndu dihondo dia la suku dia luudu lʼesanganelu la dipema,

²⁶ ahondo wa mpane lu lukumbu la seke, dihondo dia lu suku dia wuki dia lukumbu la seke, dieli lʼutshimba tshe wa etemwelo ka dipema ndu wʼediakelu, la ekodi alo tshe, ndu diango tshe diatuwutshaka la dio ulimu loko. Elimu eso tshe mbayuwukambaka loko.

²⁷ Ana apami wʼasika Ngereshona kawukitanyiaki aui wa Arona la anʼandi wʼapami lu dikambu diʼelimu wayuwutshaka, la diango diayuwembaka. Kanyuwashaki okende wa namaka diango tshe diayuwembaka.

²⁸ Oso eli elimu wa khumbu yʼana wʼapami wʼasika Ngereshona lu luudu lʼesanganelu la dipema. Itamara, onʼa olombedi Arona, kayali umendji awo.

²⁹ Kali efula kʼana wʼapami wʼasika Merari, uku khumbu yawo, la mvudu ya washewo.

³⁰ Kali tshe weli la deku akumi asatu pulu ndu akumi atanu wukuki ntsha elimu, dia ntsha ulimu wa luudu lʼesanganelu la dipema.

³¹ Lutumu tshe layuwutshaka lu luudu lʼesanganelu la dipema, diango ne diayuyalaka okende le wo wa namaka la membaka: abaya wa etemwelo ka dipema la esimbi ato, dikoho diato, la dikitshelu diadio,

³² dikoho dia lukumbu la seke la dikitshelu diadio, tokoho tadio, ekodi adio, la diango tshe diatuwutshaka uli ato. Kanyushaki untu lʼuntu diango diahumbandi nama, diayundembaka.

³³ Oso eli elimu wa khumbu yʼana wʼapami wʼasika Merari, elimu awo tshe wa lu luudu lʼesanganelu la dipema wayuwutshaka la tshina diʼelombwelo ka Itamara, onʼa olombedi Arona.

³⁴ Mose la Arona la ewandji wʼelui wʼantu wakali ana apami wʼasika Kohata uku khumbu yawo, la mvudu ya washewo.

³⁵ Wakali antu tshe waki la deku akumi asatu pulu ndu akumi atanu, wakakuki nkamba, dia ntsha ulimu lu luudu lʼesanganelu la dipema.

³⁶ Wane wakalema lʼatei awo uku khumbu yawo, waki antu nunu pendi kama esambeli la akumi atanu.

³⁷ Oso eli efula kʼantu wakakambaka ulimu lu luudu lʼesanganelu la dipema, wakali Mose la Arona lʼatei a khumbu yʼasika Kohata, uku akadjangela Latuyalaka Mose.

³⁸ Vo wakali ana apami wʼasika Ngereshona, uku khumbu yawo la mvudu ya washewo,

³⁹ waki la deku akumi asatu pulu ndu akumi atanu, wakakuki nkamba ulimu lu luudu lʼesanganelu la dipema —

⁴⁰ waku tshe wakawali, uku khumbu yawo, la mvudu ya washewo, waki antu nunu pendi la kama shamalu la akumi asatu.

⁴¹ Oso eli efula kʼantu tshe wakakambaka ulimu lu luudu lʼesanganelu la dipema, wakali Mose la Arona lʼatei a khumbu yʼasika Ngereshona, uku akadjangela Latuyalaka Mose.

⁴² Vo wakali antu wa lu khumbu yʼana apami wʼasika Merari, uku khumbu yawo, la mvudu ya washewo,

⁴³ waki la deku akumi asatu pulu ndu akumi atanu, wakakuki nkamba ulimu lu luudu lʼesanganelu la dipema.

⁴⁴ Waku tshe wakawali, uku khumbu yawo, waki antu nunu satu la kama hyendi.

⁴⁵ Oso eli efula kʼantu wakali Mose la Arona uma lu khumbu yʼana apami wʼasika Merari, uku akadjangela Latuyalaka Mose.

⁴⁶ Mose, Arona la ewandji wʼasi Isariyele wakali asi Lewi tshe, uku khumbu yawo, la mvudu ya washewo,

⁴⁷ waki la deku akumi asatu pulu ndu akumi atanu, wane tshe wakakuki mboto dia nkamba ulimu lu luudu lʼesanganelu la dipema, ndu memba diango dialo.

⁴⁸ Efula kʼantu wakalema lʼatei awo, waki nunu enanei kama tshanu la akumi enanei.

⁴⁹ Mose akawali tshe, uku akawudjangela Latuyalaka. Ndi akasha untu lʼuntu ulimu wakandakuki ntsha, la diango diakandakuki memba. Mose akawali, uku akawudjangela Latuyalaka.