Walelu 35 - La Bible en Otetela (Bible K'Ekila) 1991

Etenyi ka Sangu kʼAsi Lewi

¹ Latuyalaka akatela Mose lu mandja ya Moaba ya lʼumamu wa Jorodana, lasuki la Jeriko ati:

² Uteli asi Isariyele, kawusha asi Lewi esumba wʼuma lu kete yawo ya sangu dia vo mbidjase. Kanyuwasha ndu etshimba wʼesumba ako.

³ Okone vo wayudjaseka lu esumba, ku etshimba awo wayuyala ne dia dungalunga diawo dia waki, dia ekundji awo, la dia nyama yawo tshe.

⁴ Kete ya lʼutshimba wʼesumba yayunyusha asi Lewi, yayuyala kubita kinunu, uma lu lukumbu lʼusumba utsha lʼandja lʼutshimba tshe.

⁵ Kanyediki kubita nunu pendi lu leke lʼehutwelu, kubita nunu pendi lu leke la diku dia kushi, kubita nunu pendi lu leke lʼedjelu, ndu kubita nunu pendi lu leke la ngelʼa kushi, lʼandja wʼusumba. Oso ayuyala etshimba wʼesumba awo.

⁶ Kanyusha asi Lewi esumba esamalu wʼeshamelu, lene ukuki undjakanyi ndawo. Kanyuwasha ndu esumba ekina akumi anei la ehendi.

⁷ Okone efula kʼesumba tshe wayunyusha asi Lewi wayuyala akumi anei la enanei, kame la etshimba awo.

⁸ Kanyose esumba ako uma lu kete ya sangu ya asi Isariyele okone: efula uma le wauhu weli la wo efula, la tshitshe uma le wauhu weli la wo tshitshe. Uku weli wuki wa sangu wa diuhu la diuhu, mbayuwukimo esumba adio le asi Lewi.

Esumba wʼEshamelu

⁹ Latuyalaka akatela Mose ati:

¹⁰ Uteli asi Isariyele wati: Lamʼayunyuteho Jorodana utsha lu kete ya Kanana,

¹¹ kanyutosonole esumba wayuyala esumba anyu wʼeshamelu, lene ukuki one lakadiaki untu lakindi kunkanela ndjaka ndawo.

¹² Esumba wayuyala ahuli wa nyu mbishama uma le osomboyishi, dia undjakanyi tavokaki ntundu ndi atemala la ntundu kʼului wʼantu lu elumbwelu.

¹³ Esumba wayunyukimo, wayuyala esumba anyu wʼeshamelu.

¹⁴ Kanyukimo esumba esatu la wedi wa Jorodana, la esumba esatu lu kete ya Kanana, dia vo ndjala esumba wʼeshamelu.

¹⁵ Esumba eso kawuyali eshamelu le asi Isariyele, le ongendangenda kana le usi wudja ludjashi lʼatei awo, dia one tshe lambudiaka untu lakindi kunkanela ndjaka ndawo.

¹⁶ Keli naka untu ayokota unyandi ehumo, ku untu ako ambuvo, ndi eli tomboki. Tomboki ayudiakema.

¹⁷ Naka untu ambokomola unyandi dive diukuki mbudiaka, ku untu ako ambuvo, ndi eli tomboki. Tomboki ayudiakema.

¹⁸ Kuyanga naka untu ayokomola unyandi utamba wukuki mbudiaka, ku untu ako ambuvo, ndi eli tomboki. Tomboki ayudiakema.

¹⁹ Osomboyishi wa dikila ndame mbeyaka ndjaka tomboki. Lamʼukukindi mpumana la ndi, ndi mbeyaka mbudiaka.

²⁰ Naka untu ayusukula unyandi la ukunda, kana mbuka engo lu usheshe, ku untu ako ambuvo,

²¹ kana ndi ayokomola la lunya landi lʼusihi, ku untu ako ambuvo, one lakokomodi ayudiakema. Ndi eli tomboki: osomboyishi mbeyaka mbudiaka lamʼahumanandi la ndi.

²² Keli naka untu ayusukula unyandi shashimuya aha la ukunda, kana ayokomola engo lamʼahandatungi lutunga,

²³ kana dive diukindi diambutokomola untu lahandenyi, ku untu ako ambuvo lamʼakindi kundjala utunyi andi, kuyanga nsanguya mbutshela kolo,

²⁴ ului wʼantu wayusambula lʼasa okomodi la osomboyishi a dikila uku elembe ene.

²⁵ Ului wʼantu wayushimbela undjakanyi uma lʼanya wa osomboyishi a dikila. Vo wayukaluya lʼusumba andi wʼeshamelu, lene akandalawo. Ndi kadjase leko edja ndu lamʼayuvo olombedi a ladiku, lakakitama iso kʼekila.

²⁶ Keli naka undjakanyi ayutumba etena kemotshi uma lʼusumba wʼeshamelu, lene akandalawo,

²⁷ ku naka osomboyishi a dikila ambutuhumana la ndi lʼandja usumba ako, ndi kudiakaka, ndi hayala la unungu;

²⁸ ne dia undjakanyi ako akahumbi ntshikala lʼusumba wʼeshamelu edja ndu olombedi a ladiku ambuvo. Ku lʼokongo a nyoi kʼolombedi a ladiku, ndi mbeyaka nkalula lu kete ya sangu diandi.

²⁹ Akambu ane mbayuyala olembe la didjangu le nyu ndu le tukanula tanyu lu adjaselu anyu tshe.

³⁰ Naka untu ambudiaka untu omotshi, kawudiaki undjakanyi uma lu aui wʼemenyi. Vo haweyi ndjaka untu uma lu diui diʼomenyi otoi.

³¹ Dikambu dikina, tanyetawoki diango diʼetshungwelu uma le tomboki, leli la unungu wa mvo, keli ndi kadiakemi.

³² Tanyulungulaki diango diʼetshungwelu uma le untu lambulawo utsha lʼusumba wʼeshamelu, dia mbusha wulu wa ndi nkalula lakawo ntundu olombedi wa ladiku atavu.

³³ Tanyusanyaki kete, lene ayunyuyala, ne dia dikila diatusanyaka kete. Nduku dikila diayukuka ntungela kete ekesanelu, paka dikila dia one lakaditshulula.

³⁴ Tanyeteki kete, lene atanyatshu dia ntudjase, mindu, yako yayumutudjase lʼatei ayo; ne dia dimi Latuyalaka katudjaseka lʼatei wʼasi Isariyele.