Walelu 33 - La Bible en Otetela (Bible K'Ekila) 1991

Pangu yʼAsi Isariyele lu Lokendo Lawo

¹ Pangu yʼasi Isariyele nye, yakawatahangaka lu lokendo lawo lamʼakawatumbi uma lu kete ya Edjibitu, uku elui awo, lu elombwelo ka Mose la Arona.

² Mose akatafundaka dihuli la dihuli diakawatahangaka lu lokendo lawo, uma lu didjangu dia Latuyalaka. Pangu yawo yaki uku kendo yawo,

³ vo wakunela uma la Ramese lu lushi la dikumi lʼatanu la ngondo ka ntundu. La wedi a pindju a lushi lʼelekanelu mbakatumbi asi Isariyele la lunya la wulu lu ashu wʼasi Edjibitu tshe,

⁴ lamʼaki asi Edjibitu lu nkhunde anʼawo tshe wa nundu, wakadiaki Latuyalaka lʼatei awo. Latuyalaka akalumbuya ndu ditemolatemola diawo.

⁵ Osoku asi Isariyele wakunela uma la Ramese, wakatuhanga la Sukota.

⁶ Vo wakunela uma la Sukota, wakatuhanga la Etame keli lʼumamu wʼusui wa shenga.

⁷ Vo wakunela uma lʼEtame, waketola utsha la Pi-Hahirote kelanedi la Bala-Zefona, ku wakatuhanga lu welelo wa Mingidole.

⁸ Vo wakunela uma lu welelo wa Hahirote, ku wakatenanya uduwa utsha lʼusui wa shenga. Vo wakatshu lokendo la nshi shatu lʼusui wa shenga wa Etame, ku wakatuhanga la Mara.

⁹ Vo wakunela uma la Mara, wakakumi la Elime. La Elime kaki teko diʼashi dikumi la pendi, la atuku akumi esambeli, ku wakatuhanga leko.

¹⁰ Vo wakunela uma la Elime, ku wakatuhanga lʼumamu wʼUduwa a Tilili.

¹¹ Vo wakunela uma lʼumamu wʼUduwa a Tilili, ku wakatuhanga lʼusui wa shenga wa Sine.

¹² Vo wakunela uma lʼusui wa shenga wa Sine, ku wakatuhanga la Dofeka.

¹³ Vo wakunela uma la Dofeka, ku wakatuhanga la Alushi.

¹⁴ Vo wakunela uma la Alushi, ku wakatuhanga la Refidime, lene aki kundjala ashi wʼantu no.

¹⁵ Vo wakunela uma la Refidime, ku wakatuhanga lʼusui wa shenga wa Sinai.

¹⁶ Vo wakunela uma lʼusui wa shenga wa Sinai, ku wakatuhanga la Kiborota-Hatava.

¹⁷ Vo wakunela uma la Kiborota-Hatava, ku wakatuhanga la Hazerote.

¹⁸ Vo wakunela uma la Hazerote, ku wakatuhanga la Ritima.

¹⁹ Vo wakunela uma la Ritima, ku wakatuhanga la Rimona-Pereze.

²⁰ Vo wakunela uma la Rimona-Pereze, ku wakatuhanga la Libina.

²¹ Vo wakunela uma la Libina, ku wakatuhanga la Risa.

²² Vo wakunela uma la Risa, ku wakatuhanga la Kehelata.

²³ Vo wakunela uma la Kehelata, ku wakatuhanga lʼUkungu a Shefere.

²⁴ Vo wakunela uma lʼUkungu a Shefere, ku wakatuhanga la Harada.

²⁵ Vo wakunela uma la Harada, ku wakatuhanga la Makelote.

²⁶ Vo wakunela uma la Makelote, ku wakatuhanga la Tahata.

²⁷ Vo wakunela uma la Tahata, ku wakatuhanga la Tera.

²⁸ Vo wakunela uma la Tera, ku wakatuhanga la Mitika.

²⁹ Vo wakunela uma la Mitika, ku wakatuhanga la Hashimona.

³⁰ Vo wakunela uma la Hashimona, ku wakatuhanga la Moserote.

³¹ Vo wakunela uma la Moserote, ku wakatuhanga la Bene-Jakana.

³² Vo wakunela uma la Bene-Jakana, ku wakatuhanga la Hora-Hangidengade.

³³ Vo wakunela uma la Hora-Hangidengade, ku wakatuhanga la Jotebata.

³⁴ Vo wakunela uma la Jotebata, ku wakatuhanga la Aborona.

³⁵ Vo wakunela uma la Aborona, ku wakatuhanga la Eziyona-Ngebere.

³⁶ Vo wakunela uma la Eziyona-Ngebere, ku wakatuhanga lʼusui wa shenga wa Zina (letawo vati: Kadeshe).

³⁷ Vo wakunela uma la Kadeshe, ku wakatuhanga lʼUkungu a Hora, weli lʼumamu wa kete ya Edome.

³⁸ Ku olombedi Arona akambela ladiku diʼUkungu a Hora, uku diui dia Latuyalaka. Ku ndi akatuvo leko, lu lushi la ntundu la ngondo ka tanu, lu eleku kʼakumi anei, lʼokongo wʼetumbelu kʼasi Isariyele uma lu kete ya Edjibitu.

³⁹ Arona aki la deku lukama akumi ahendi la satu lamʼakandavu lʼUkungu a Hora.

⁴⁰ Khumʼekanga ka Arada, usi Kanana, lakadjashi lu Nengebe, lu kete ya Kanana, akuki lukumu lʼeyelu kʼasi Isariyele.

⁴¹ Vo wakunela uma lʼUkungu a Hora, ku wakatuhanga la Zalamona.

⁴² Vo wakunela uma la Zalamona, ku wakatuhanga la Punona.

⁴³ Vo wakunela uma la Punona, ku wakatuhanga la Obota.

⁴⁴ Vo wakunela uma la Obota, ku wakatuhanga la Iye-Abarima, lu kete ya Moaba.

⁴⁵ Vo wakunela uma la Iyime, wakatuhanga la Dibona-Ngada.

⁴⁶ Vo wakunela uma la Dibona-Ngada, ku wakatuhanga la Alamona-Dibalatayima.

⁴⁷ Vo wakunela uma la Alamona-Dibalatayima, ku wakatuhanga lʼekungu wʼAbarima, lu welelo wa Nebo.

⁴⁸ Vo wakunela uma lu ekungu wa Abarima, ku wakatuhanga lu mandja ya Moaba, lʼumamu wa Jorodana, lasuki la Jeriko.

⁴⁹ Vo wakahangi lʼumamu wa Jorodana, uma la Bete-Jeshimote pulu ndu la Abele-Shitime, lu mandja ya Moaba.

Ekahanyelu ka Elelu wa Kete ya Kanana

⁵⁰ Latuyalaka akatela Mose lu mandja ya Moaba, lʼumamu wa Jorodana, lasuki la Jeriko ati:

⁵¹ Uteli asi Isariyele wati: Lamʼayunyuteho Jorodana utsha lu kete ya Kanana,

⁵² kanyutatshanyaka akanga a kete tshe uma la ntundu kanyu, kanyutalanyaka dikishi diawo diʼave ndu difanelu diawo dia lolelola. Kanyutalanyaka alunga awo tshe.

⁵³ Kanyutohotole kete, kanyutudjase loko, ne dia dimi lambunyusha kete, dia nyu yikita.

⁵⁴ Kanyutukahanya kete yako lu eukelu kʼuwali, uku khumbu yanyu. Kanyusha diuhu dieli efula kete ya sangu kambi, la diuhu dieli tshitshe kete ya sangu tshitshe. Dihuli tshe diayundama le untu lu eukelu kʼuwali, diayuyala diandi. Diuhu la diuhu diayukita kete ya sangu, uku khumbu ya washenyu.

⁵⁵ Keli naka nyu hanyutatshanyaka akanga a kete uma la ntundu kanyu, ku waku wayutshikala lʼatei awo, wayuyala uku afumbu lu ashu anyu, la uku atende lu pandju yanyu. Vo wayu-nyuhenyahenyaka lu kete yayunyutudjase.

⁵⁶ Ku dimi mbeyaka nyutshela uku akamasanguya dia mbatshela.