Walelu 3 - La Bible en Otetela (Bible K'Ekila) 1991

Efula kʼAsi Lewi la Elimu Awo

¹ Lanʼeli tukanula ta Arona la ta Mose lʼetena kakateketa Latuyalaka la Mose lʼUkungu a Sinai.

² Kumbu yʼana wʼapami wa Arona nye: Nadaba, ona lʼenundu, Abihu, Eleazara la Itamara.

³ Waso weli kumbu yʼana wʼapami wa Arona, elombedi wakakitama iso ndu wakakidiama dia ntsha ulimu wʼolombedi.

⁴ Keli Nadaba la Abihu wakavu la ntundu ka Latuyalaka lamʼakawela dja ku dja la ntundu kandi, lʼusui wa shenga wa Sinai. Vo tawaki la ana. Eleazara la Itamara wakatshi ulimu wʼolombedi ku shewo Arona eki la lumu.

⁵ Latuyalaka akatela Mose ati:

⁶ Usukanya diuhu dia Lewi, uwaeme la ntundu kʼolombedi Arona, dia vo nkambaka la ndi ulimu wʼolombedi.

⁷ Vo wayuyala la okende wa namaka diango diandi ndu diango diʼului tshe wʼantu la ntundu ka luudu lʼesanganelu la dipema, ndu wa ntshaka ulimu wʼetemwelo ka dipema.

⁸ Vo wayulamaka diango tshe diʼulimu wa luudu lʼesanganelu la dipema, wayuyala la okende wʼasi Isariyele dia vo ntshaka ulimu lu etemwelo ka dipema.

⁹ Kukimo asi Lewi le Arona la anʼandi. Vo wayukimwama tshe le ndi uma lʼatei wʼasi Isariyele.

¹⁰ Kukitsha Arona la anʼandi, dia vo namaka ulimu awo wʼolombedi. Naka untu kʼuntu ayusukana, ndi ayudiakema.

¹¹ Latuyalaka akatela Mose ati:

¹² Enda, dimi lakose asi Lewi uma lʼatei wʼasi Isariyele lu dihuli diʼana wa nundu tshe, tata kundu tʼasi Isariyele. Asi Lewi weli wami,

¹³ ne dia ana wa nundu tshe weli wami; umaka lushi lakamadiaki ana wa nundu tshe wa lu kete ya Edjibitu, mbakamayakidiya ana wa nundu tshe wa lu Isariyele, wʼantu ndu wa nyama. Vo wayuyalaka wami. Dimi keli Latuyalaka.

¹⁴ Latuyalaka akatela Mose lʼusui wa shenga wa Sinai ati:

¹⁵ Ali efula kʼului tshe wʼasi Lewi, uku mvudu ya washewo, uku khumbu yawo. Kali ndu ana apami tshe wambuto ngondo otoi pulu ladiku.

¹⁶ Ku Mose akawali tshe, uku akawudjangela Latuyalaka.

¹⁷ Kumbu yʼana wʼapami wa Lewi nye: Ngereshona, Kohata, la Merari.

¹⁸ Kumbu yʼana wʼapami wa Ngereshona nye uku khumbu yawo: Libini la Shimei.

¹⁹ Ana apami wa Kohata ane, uku khumbu yawo: Amurama, Izehare, Heberona la Uziyele.

²⁰ Ndu ana apami wa Merari ane uku khumbu yawo: Mali la Mushi. Waso mbeli khumbu yʼasi Lewi, uku mvudu ya washewo.

²¹ Uma le Ngereshona, kakatongo khumbu kʼasika Libini ndu khumbu kʼasika Shimei. Waso mbeli khumbu yʼasika Ngereshona.

²² Ana apami wakalema lʼatei awo, wambuto ngondo otoi pulu ladiku, waki nunu esambeli la kama tshanu.

²³ Khumbu yʼasika Ngereshona kawutahangaka lu leke lʼedjelu ka unya lʼetemwelo ka dipema.

²⁴ Eliyasafu, onʼa Laele, kayali ote wa khumbu ka washi, asika Ngereshona.

²⁵ Okende wʼana wʼapami wa Ngereshona lu luudu lʼesanganelu la dipema wayuyala etemwelo ka dipema, dipema la ukumbu adio, dihondo dia la suku dia luudu lʼesanganelu la dipema,

²⁶ ahondo wa lu lukumbu la seke, dihondo dia la suku dia lukumbu la seke dieli lʼutshimba tshe wʼetemwelo ka dipema la ediakelu, ndu ekodi alo tshe: kene tshe katuwutshaka ulimu la wo.

²⁷ Uma le Kohata, kakatongo khumbu kʼasika Amurama, khumbu kʼasika Izehare, khumbu kʼasika Heberona, ndu khumbu kʼasika Uziyele. Waso mbeli khumbu yʼasika Kohata.

²⁸ Ana apami wakalema lʼatei awo, wambuto ngondo otoi pulu ladiku, waki nunu enanei la kama shamalu. Waso mbaki la okende wa namaka etemwelo.

²⁹ Khumbu yʼasika Kohata kawutahangaka lu leke la diku dia kushi lʼetemwelo ka dipema.

³⁰ Elizafana, onʼa Uziyele, kayali ote wa luudu la washi, la khumbu kʼasika Kohata.

³¹ Vo kawuyali la okende wa namaka oshete wa sheki, mesa, ekitshelu kʼatala, diakelu, diango diʼulimu diʼetemwelo diakatshaka olombedi ulimu ndu dihondo diʼatanyelu: kene tshe katuwutshaka ulimu la wo.

³² Eleazara, onʼa olombedi Arona, kayali uwandji wa ladiku diʼewandji wa asika Lewi. Ndi kayali la okende wa nama wane tshe watulamaka etemwelo.

³³ Uma le Merari, kakatongo khumbu kʼasika Mali, ndu khumbu kʼasika Mushi.

³⁴ Ana apami wakalema lʼatei awo, wambuto ngondo otoi pulu ladiku, waki nunu samalu la kama hyendi.

³⁵ Zuriyele, onʼa Abihaile, kayali ote wa luudu la washi, khumbu ya Merari. Vo kawutahangaka lu leke la ngelʼa kushi lʼetemwelo ka dipema.

³⁶ Ana apami wa Merari kawuyali la okende wa namaka abaya wʼetemwelo ka dipema, esimbi ato, dikoho diato la dikitshelu diato, ndu diango diawo tshe diʼulimu: kene tshe katuwutshaka ulimu la wo;

³⁷ ndu dikoho dia lʼutshimba tshe dia lukumbu la seke, dikitshelu diato, tokoho tato, la ekodi ato.

³⁸ Wane wayutahangaka la ntundu ka etemwelo ka dipema lu leke lʼehutwelu ka unya, lu welelo wa luudu lʼesanganelu la dipema, utsha lu leke lʼehutwelu, ku Mose, Arona la anʼandi wʼapami. Vo mbeli la okende wʼakambu tshe wa dienyanyu lʼatei wʼetemwelo, akambu tshe watuhumbamaka ntshama dikambu diʼasi Isariyele. Untu kʼuntu tasukanaki, ndi atukudiakema.

³⁹ Wane tshe wakalema lu khumbu la khumbu lʼatei wʼasi Lewi, wakali Mose la Arona uku diui dia Latuyalaka, apami tshe wambuto ngondo otoi pulu ladiku, waki nunu akumi ahendi la pendi.

⁴⁰ Ku Latuyalaka akatela Mose ati: Kali efula kʼana apami wa nundu wʼasi Isariyele, wambuto ngondo otoi pulu ladiku, kulami efula ka kumbu yawo.

⁴¹ Kombosele asi Lewi, — dimi keli Latuyalaka — lu dihuli diʼana wa nundu tshe wʼasi Isariyele. Kombosele dungalunga diʼasi Lewi lu dihuli diʼana wa nundu tshe wa dungalunga diʼasi Isariyele.

⁴² Ku Mose akali ana apami wʼasi Isariyele tshe wa nundu, uku akawudjangela Latuyalaka.

⁴³ Ana apami tshe wa nundu, wambuto ngondo otoi pulu ladiku, wakalema lʼatei awo, waki nunu akumi ahendi la pendi kama hyendi akumi esambeli la asatu.

⁴⁴ Latuyalaka akatela Mose ati:

⁴⁵ Kombosele asi Lewi lu dihuli diʼana apami tshe wa nundu wʼasi Isariyele, ndu dungalunga diʼasi Lewi lu dihuli dia dungalunga diawo. Ku asi Lewi wayuyala wami. Dimi keli Latuyalaka.

⁴⁶ Kutshunguli ana apami wa nundu kama hyendi akumi esambeli la asatu, wʼasi Isariyele wambuyala ladiku diʼefula kʼasi Lewi.

⁴⁷ Kali toshekele wuhu watuwutshaka la to ulimu lʼetemwelo, toshekele tutanu, lʼote wʼuntu lʼuntu, lu shekele yeli la ngera akumi ahendi.

⁴⁸ Kusha Arona la anʼandi wʼapami falanga sho ya etshungwelu kʼana wa nundu, wakayala ladiku diʼefula kʼasi Lewi.

⁴⁹ Okone Mose akose falanga ya waku wa wakatshikala lʼului wa wane wakatshungwama uma le asi Lewi.

⁵⁰ Mose akalungula falanga uma le ana wa nundu wa Isariyele, toshekele kinunu kama shatu akumi asamalu la tutanu, wuhu wa shekele yatuwutshaka la yo ulimu lʼetemwelo.

⁵¹ Ku Mose akasha Arona la anʼandi falanga yʼetshungwelu, pupu uku diui dia Latuyalaka; uku akadjangela Latuyalaka Mose.