Walelu 25 - La Bible en Otetela (Bible K'Ekila) 1991

Asi Isariyele Wambotemola Bala-Peore

¹ Lamʼakadjase asi Isariyele la Shitime, vo wakunana la amantu wʼasi Moaba.

² Amantu ako wakawaetaka dia ndjulambula ditemolatemola diawo elambu. Asi Isariyele wakali la wo, wakakhusamela ditemolatemola diako.

³ Osoku mbakamamema asi Isariyele Bala-Peore. Ku Latuyalaka akuki asi Isariyele kele.

⁴ Latuyalaka akatela Mose ati: Usanganya ewandji tshe a wudja, uhane antu wa kolo ane lu yanyi la ntundu kami, dimi Latuyalaka, dia kele kami ka wulu mumo uma le asi Isariyele.

⁵ Mose akatela embadi wa Isariyele ati: Nyudiaki apami ako tshe wakamamema Bala-Peore.

⁶ Nyulungi, lamʼakalelaka asi Isariyele lʼeotwelo ka luudu lʼesanganelu la dipema, ku usi Isariyele omotshi akayi la umuntu usi Midiyana uya le khumbu kandi, lu ashu wa Mose ndu wʼului tshe wʼasi Isariyele.

⁷ Lamʼakenyi Finehasi, onʼa Eleazara, onʼa olombedi Arona, dikambu so, ndi akunela uma lʼatei wʼului wʼantu, akose dikonga.

⁸ Ndi akayelana la usi Isariyele ako lʼetei a luudu, akahiki dikonga ekinda vo ako ahendi, ndu pami kʼusi Isariyele ndu umuntu, ku diaketi lu dimba dia umuntu wedi la wedi. Okone sui diakashili lʼatei wʼasi Isariyele.

⁹ Keli wane wakavu la sui diako, waki nunu akumi ahendi la nei.

¹⁰ Latuyalaka akatela Mose ati:

¹¹ Finehasi, onʼa Eleazara, onʼa olombedi Arona, ambukadimula kele kami uma le asi Isariyele, ne dia ndi akayala la kandjema kame la kandjema kami lʼatei awo. Diako mbakimi kunshila asi Isariyele ushiki lu kandjema kami.

¹² Diako mbayuyuta wati: Nyendi, dimi lambuwusha daka diami dia ki.

¹³ Daka diako diayuyalaka le ndi ndu le tukanula tandi, daka diʼulimu wʼolombedi wa pundju, ne dia ndi akukela Unyashungu andi kandjema, ndu akatungela asi Isariyele ekesanelu.

¹⁴ Lukumbu lʼusi Isariyele lakadiakema kame la umuntu usi Midiyana laki Zimiri, onʼa Salu, ote wa luudu la washi, asika Simeyona.

¹⁵ Lukumbu la umuntu usi Midiyana lakadiakema laki Kozibi, onʼa Zura, laki uwandji wa luudu lʼasika shi lu Midiyana.

¹⁶ Latuyalaka akatela Mose ati:

¹⁷ Ohenyahenya asi Midiyana, adiaki,

¹⁸ ne dia vo wakanyohenyahenya la kesu yawo yakawanyukesi lu dikambu dia Peore ndu lu dikambu dia kadiyewo Kozibi, onʼa uwandji wa Midiyana, lakadiakema lu lushi lakayi sui lu dikambu dia Peore.