Walelu 22 - La Bible en Otetela (Bible K'Ekila) 1991

Balaka Ambutuma Akendji dia Ntosa Balama

¹ Asi Isariyele wakunela, wakatuhanga lu mandja ya Moaba ya la wedi wa Jorodana, lasuki la Jeriko.

² Balaka, onʼa Zipore, akenyi akambu tshe wakatshela asi Isariyele asi Amora.

³ Ku asi Moaba wakuki asi Isariyele woma heyama, ne dia vo waki efula. Asi Moaba wakatela asi Isariyele asulu.

⁴ Asi Moaba wakatela dihangamendi dia Midiyana vati: Ului one wa hyadi wutsha nde kene tshe keli lʼutshimba asu, uku atuhatulaka ngombe adiyu lʼusui. Okone Balaka, onʼa Zipore, laki khumʼekanga kʼasi Moaba lʼetena kako,

⁵ akatumela Balama, onʼa Beore, akendji la Petore keli lʼumamu wa Ndjali (ketawo: Eyufarate), lu kete ya Amau, dia ntuweta vati: Uhukami, wudja omotshi wambutumba uma lʼEdjibitu. Uyendi, vo ane welanendi la mi. Vo weko efula, wambukumba kete khu-khu-khu.

⁶ Lambukosengasenga nti: Yaka kakiane, uyumbidjeli antu ako mananu, ne dia vo ndekami wulu. Undu dimi layeya mbalembia, kana mbatshanya uma lu kete yami, ne dia dimi mbeyaki nti: One lambuyotshokola, atotshokwamaka, la one lambuyundja mananu, atudjamaka mananu.

⁷ Dihangamendi dia Moaba la dihangamendi dia Midiyana wakunela la wotʼukunda lʼanya awo; wakatukuma le Balama, wakawutela aui wa Balaka.

⁸ Ndi akawatela ati: Nyetami, kanyuteli diui diayumvutela Latuyalaka. Ku ewandji wa Moaba wakalali lʼutshu ako laka Balama.

⁹ Unyashungu akene le Balama, akawumbula ati: Apami akona ane weli lakaye?

¹⁰ Balama akakaluya Unyashungu diui ati: Balaka, onʼa Zipore, khumʼekanga ka Moaba, kakatumi le mi ati:

¹¹ Enda, wudja omotshi wambutumba uma lʼEdjibitu, wambukumba kete khu-khu-khu. Yaka kakiane, uyumbidjelewo mananu. Undu, osoku mbayumeya ndo la wo la mbatshanya.

¹² Unyashungu akatela Balama ati: Tutshoki la wo; tudjaki wudja one mananu, ne dia vo wambotshokwamaka.

¹³ Balama aketo la pindju, akatela ewandji wʼuma le Balaka ati: Nyukaluli lu kete yanyu, ne dia Latuyalaka ambunshimba dia dimi ntsho la nyu.

¹⁴ Ewandji wa Moaba wakunela, wakakalula le Balaka. Vo wakatuwutela vati: Balama kumbetawo ndja la su.

¹⁵ Ku Balaka akayutuma ewandji ekina efula wakaleki wa ntundu lukumu.

¹⁶ Vo wakakumi le Balama, wakatuwutela vati: Balaka, onʼa Zipore, kata okone ati: Lambukosengasenga nti: Tetawoki nduku dikambu nkushimba dia we ndja le mi.

¹⁷ Mete, dimi layukolemia efula, la kene tshe kayuyutaka, kayumutsha. Lambukosengasenga nti: Uyi, uyumbidjeli wudja one mananu.

¹⁸ Keli Balama akakaluya ekambi wa Balama diui ati: Kuyanga Balaka ayumbisha luudu landi too la fesa la paunyi, dimi haleyi ndekana diui dia Latuyalaka, Unyashungu ami, dia mbahe kana mbahula diui.

¹⁹ La-mbunyosengasenga nti: Nyetami lane, tendi kana Latuyalaka ayumvutela diui dikina.

²⁰ Unyashungu akene le Balama lʼutshu, akawutela ati: Naka antu wa-kayi dia ndjukosa wambunela, kutshu la wo. Keli paka diui diayumukutela, mbayuyutsha.

Ondjelo la Punda, la Balama

²¹ Balama aketo la pindju, akakeleka edye lu punda kandi, akatshu la ewandji wa Moaba.

²² Keli Unyashungu akumala ne dia ndi akatshu. Ondjelo a Latuyalaka akatemala lu mbuka dia mbushimba. Ndi akatshu, ndi la ekambi andi ehendi, atahemi lu punda kandi.

²³ Punda kako akenyi ondjelo wa Latuyalaka emadi lu mbuka, ukimedi yombo lu lunya landi. Ku punda kaketola uma lu mbuka, kaketi lʼadiyu. Balama akakikomola dia nkikaluya lu mbuka.

²⁴ Ku ondjelo a Latuyalaka akatemala ntu lu mbuka ka pika, lʼasa dikambo pendidiʼelua, diaki la eheli wedi one, eheli wedi one.

²⁵ Lamʼakenyi punda ondjelo a Latuyalaka, to kakamamema lu eheli, ku dikaka dia Balama diakahinama lu eheli, ku ndi akakomola punda ntu.

²⁶ Ku ondjelo a Latuyalaka akamutsho, akatemala lu dihuli dia pika, diaki nkukuka nkadimo lu lunya la pami kana lu lunya la lomoso.

²⁷ Lamʼakenyi punda ondjelo a Latuyalaka, to kakakhusama lʼesi a Balama. Balama akakiuki kele, akakikomola lʼukalimba andi.

²⁸ Latuyalaka akateketsha punda. Ku to kakambula Balama ati: Kamumukutshela, kambuyonkomola tena satu ne?

²⁹ Balama akakikaluya diui ati: Ne dia we ambomonyola, mbukokomodimi. Utumuyala la yombo lu lunya lami, tshiki lambukudiaka kakiane.

³⁰ Ku punda kakawumbula ati: Dimi laha punda kaye, katuyahemaka tena tshe edja ndu elo? Undi, dimi ndjalaka la etshelu ka nkutshela wuhu uku? Ku ndi ati: Kema.

³¹ Ku Latuyalaka akasenya ashu wa Balama, ku ndi akenyi ondjelo a Latuyalaka emadi lu mbuka, ukimedi yombo yandi lu lunya. Ku ndi akakolama, akayakosha ekhukhumadi.

³² Ku ondjelo ako akawumbula ati: Okoko wana wokomodiye punda kaye tena satu ne? Enda, lakayi dia ndjukushimba lu mbuka katayatshu kene. To keli mbuka kʼelanyelu la ntundu kami.

³³ Keli punda kakamenyi, mbakatetodi tena satu ne uma la ntundu kami. Utunduyala to kombetola uma la ntundu kami, tshiki dimi lakakudiaki, ku dimi nkitshika la lumu.

³⁴ Balama akatela ondjelo ati: Dimi lakatshi kolo. Dimi hambeyi nti: We kakemadi lu mbuka dia nshimbami. Kakiane, naka eko kolo lu ashu aye, dimi layukalula.

³⁵ Ondjelo a Latuyalaka akatela Balama ati: Utshu lʼantu ane. Keli paka aui wayumukutelaka atu, mbayuyututa. Okone Balama akatshu la ewandji wa Balaka.

³⁶ Lamʼakuki Balaka lukumu ati: Balama uyayi, ndi akatshu lʼusumba wa Moaba, weli lʼulelu wakadji Aranona, dia ntuhumana la ndi ka la kuma kʼulelu,

³⁷ Balaka akambula Balama ati: Dimi kuntuma akendji dia ntukosa uka? Ukundi akiye kundja le mi? Undi, dimi kema la wulu wa nkolemia?

³⁸ Balama akakaluya Balaka diui ati: Nti kana dimʼone ambuya le ye. Dimi la wulu wa nkutela dikambu dimotshi kakiane uka? Diui diayudja Unyashungu lʼunyo ami, mbayumuta.

³⁹ Balaka akose Balama, akatshu la ndi la Kiriyata-Huzata.

⁴⁰ Ku Balaka akakidia ngombe la ekoko, akayitumela Balama la ewandji waki kame la ndi.

⁴¹ La pindju, Balaka akose Balama, akatshu la ndi la Bamota-Bala. Uma leko, kakandaleki mena wudja wa Isariyele kasuki.