Walelu 20 - La Bible en Otetela (Bible K'Ekila) 1991

Etundjelu kʼAshi Uma lu Dive

¹ Ului wʼasi Isariyele tshe wakakumi lʼusui wa shenga wa Zina lu ngondo ka ntundu. Ku wudja wakadjase la Kedeshe. Miriyama akavu leko, ku wakukhunde leko.

² Ashi tawakiko ne dia ului wʼantu. Okone vo wakamotela Mose la Arona.

³ Ku antu wakatukula la Mose vati: Aki ololo shu ntavwi lamʼakavu anengesu la ntundu ka Latuyalaka!

⁴ Okoko wana wakayatolombola shu ului wa Latuyalaka, uya lʼusui one wa shenga dia shu ndjuvo, shu la dungalunga diasu lindu?

⁵ Ukundi akanyatutundja uma lʼEdjibitu dia ntela uya lu dihuli dia kolo ne? Lane kema dihuli diukuki antu mune wehu, kana etamba wa fingu, ekodi wʼelua, etamba wa dikomi, kuyanga ashi wa no, kema.

⁶ Mose la Arona wakamo uma lʼatei wʼului wʼantu, wakatemala lʼeotwelo ka luudu lʼesanganelu la dipema, wakayakosha ekhukhumadi. Ku lutumbu la Latuyalaka lakene le wo.

⁷ Ku Latuyalaka akatela Mose ati:

⁸ Ose danga, usanganya ului wʼantu, we la onanyo Arona. Kanyuteli dive dia dio ntundja ashi lu ashu awo. Ku we ayatundjiya ashi uma lu dive. Osoku mbayuyusha ului wʼantu la dungalunga diawo ashi wa no.

⁹ Ku Mose akose danga uma la ntundu ka Latuyalaka, uku akandawutela.

¹⁰ Mose la Arona wakasanganya ului wʼantu la ntundu ka dive diako. Ku Mose akawatela ati: Nyulungi nyu akanga wʼuhendudi! Undi, tunyutundjiya ashi uma lu dive ne?

¹¹ Ku Mose akedia lunya landi, akakomola danga lu dive tena pendi. Ku ashi efula wakatumbi. Ului wʼantu wakano, ndu dungalunga diakano.

¹² Latuyalaka akatela Mose la Arona ati: Ne dia nyu kumbetawomi, dia nemiami lu ashu wʼasi Isariyele, mbahanyukumia ului one wʼantu lu kete yakamawasha.

¹³ Onʼeli ashi wa Meriba (kitshimudi ati: Tamu), ne dia asi Isariyele wakadji la Latuyalaka tamu, ku ndi akayaenya ekila le wo.

Edome Ambushimba Isariyele Mbeta

¹⁴ Mose akatumi akendji uma la Kedeshe utsha le khumʼekanga ka Edome, dia ntuwutela ati: Onanyo Isariyele kata okone ati: We mbeyaka asui tshe wakayi le su!

¹⁵ Uku akatshu watshesu utsha lʼEdjibitu, ndu uku akatadjase leko edja, ndu uku akatusuyaka asi Edjibitu, shu la washesu.

¹⁶ Lamʼakataleli le Latuyalaka, ndi akatukela, akatumi ondjelo andi, akatutundja uma lʼEdjibitu. Kakiane tambukuma la Kadeshe, usumba weli lʼekumelu ka kete yaye.

¹⁷ Lambukosengasenga nti: Etawo shu ntenanya kete yaye. Shu hateta lu dikambo dianyu kuyanga lu dikambo diʼelua. Shu hatono ashi wʼuma lu teko dianyu. Shu tayutayelaka paka Osese a Khumʼekanga. Shu hatetola lu lunya la pami kana lu lunya la lomoso, edja ndu lamʼayutulekana kete yaye.

¹⁸ Ku asi Edome wakûkaluya diui vati: Tetaki lu kete yasu. Naka we ayeta loko, shu tayutumba dia ndjolo la ye.

¹⁹ Ku Mose akakaluya diui, ndi la asi Isariyele vati: Shu tayeta lu mbuka ka wuki. Naka shu la dungalunga diasu, tayono ashi anyu, shu tayunyufuta ushingʼawo. Shu tayeta mbeta tshu lʼekulu, hatutsha nduku dikambu.

²⁰ Ku asi Edome wakûkaluya diui vati: Nyu hanyeta lane! Ku vo wakayi lʼantu efula, akanga a wulu, dia ndjolo la Isariyele.

²¹ Osoku mbakatuni asi Edome dia Isariyele mbeta lu kete yawo. Ku Isariyele waketola lu leke lukina.

Nyoi ka Arona lʼUkungu a Hora

²² Ului tshe wʼasi Isariyele wakunela uma la Kedeshe, wakakumi lʼUkungu a Hora.

²³ Latuyalaka akatela Mose la Arona lʼUkungu a Hora, weli lʼumamu wa kete ya Edome, ati:

²⁴ Arona utsha ntsho le washi. Ndi hukuma lu kete yakamasha asi Isariyele, ne dia nyu nyakahendula diui diami lu ashi wa Meriba.

²⁵ Ose Arona la onʼandi, Eleazara, umbeli la wo lʼUkungu a Hora.

²⁶ Kukululi Arona eloto andi, kelotsha onʼandi Eleazara. Arona ayutuvo leko, ayulungwama le washi.

²⁷ Mose akatshi uku akawutela Latuyalaka. Vo wakambela lʼUkungu a Hora lu ashu wʼului tshe wʼantu.

²⁸ Mose akatukulula Arona eloto andi, akelotsha onʼandi Eleazara. Arona akavu leko lʼatei wʼukungu. Ku Mose la Eleazara wakahulo.

²⁹ Lamʼakenyi ului wʼantu tshe vati: Arona ambutuvo, luudu tshe la Isariyele wakûleli nshi akumi asatu.