Walelu 19 - La Bible en Otetela (Bible K'Ekila) 1991

Ediamelu kʼUntu Leli Mindu

¹ Latuyalaka akatela Mose la Arona ati:

² Didjangu diʼuma lʼolembe ne, diakadjanga Latuyalaka ati: Kawukela osongo wa ngombe a wadi wa belaa, waha la diwadi, waha la ekomo, ndu wahatakelekama lokoho.

³ Kanyuwusha olombedi Eleazara, ndi kutundja lʼandja a pangu. Kawutudiaki la ntundu kandi.

⁴ Olombedi Eleazara kambia luhita lu dikila diawo, kadimonge tena esambeli lu welelo wa luudu lʼesanganelu la dipema.

⁵ Kawutshumbi osongo wa ngombe a wadi lu ashu andi: ekuhu kawo, emunyi awo, dikila diawo, kame la tumi tawo.

⁶ Olombedi kose kunyi yʼutamba wʼusasi, nyumba la wundu, kadikadja lu dja yalunguya osongo wa ngombe ako.

⁷ Olombedi kasuli ahondo andi, koke ashi; kakaluli lu pangu. Ku ndi ayutshikala mindu edja ndu dikolo.

⁸ One layutshumba kasuli ahondo andi, koke ashi, ku ndi ayutshikala mindu edja ndu dikolo.

⁹ Untu omotshi leli pudipudi, katongone uduwu wʼosongo wa ngombe a wadi, katuwukadja lu dihuli dia pudipudi, lʼandja a pangu. Uduwu ako kawulamemi dia ntshela ului wʼasi Isariyele ashi wʼedielo, ne dia enyelu ka kolo.

¹⁰ One layotongona uduwu wʼosongo ako wa ngombe a wadi, kasuli ahondo andi, ku ndi ayutshikala mindu edja ndu dikolo. Oso eli olembe wa pundju le asi Isariyele ndu le ongendangenda ludjashi lʼatei awo.

¹¹ Untu layunanda udu wʼuntu, ayutshikala mindu nshi esambeli.

¹² Untu ako kayaedia lʼashi ako lushi la satu, ku lushi lʼesambeli, ndi ayuyala pudipudi. Keli naka ndi hayaedisha lushi la satu, ndu lushi lʼesambeli, ndi heyi ndjala pudipudi.

¹³ Untu tshe layunanda udu wʼuntu, dimba diʼuntu lambuvo, ku hayaedia, ambusanya etemwelo ka dipema ka Latuyalaka. Untu ako ayunyema uma lu Isariyele, ne dia ndi kumvutamela ashi wʼedielo, ndi eko mindu; mindu kandi keko le ndi.

¹⁴ Onʼeli olembe lamʼayuvo untu lu luudu la dipema. Untu tshe layoto lu luudu la dipema, la untu tshe leli loko, ayuyala mindu nshi esambeli.

¹⁵ Donga tshe dieli loko diahafulami ufudi, diayuyala mindu.

¹⁶ Untu tshe layunanda untu lakadiakemi la yombo, kana lakavwi uvovo, kana weka wʼuntu kuyanga diumbu lʼusui, ayuyala mindu nshi esambeli.

¹⁷ Kawosele untu leli mindu uduwu wʼuma lʼetshumbelu kʼulambu wa kolo, kawuteli ashi wʼuma la lushi ladiku diawo lu donga.

¹⁸ Untu leli pudipudi kose nyumba, kayimbia lʼashi, kamonge lu luudu la dipema ndu diango tshe diʼulimu, kamonge ndu antu tshe weli laawo, ndu one lakananda weka kana udu wʼuntu lakadiakemi kana untu lakavu uvovo, kuyanga diumbu.

¹⁹ One leli pudipudi, kamonge one leli mindu lushi la satu la lushi lʼesambeli; kawedia lushi lako lʼesambeli. Untu ako kasuli ahondo andi, koke, ku ndi ayuyala pudipudi la dikolo.

²⁰ Keli untu leli mindu, tayaediaki ndame, ndi ayunyema uma lʼatei wʼului wʼantu, ne dia ndi ambusanya etemwelo ka dipema ka Latuyalaka lamʼakindi kumvutamela ashi wʼedielo. Ndi eko mindu.

²¹ Oso ayuyala olembe wa pundju le wo. Untu layomonga ashi wʼedielo, kasuli ahondo andi; ndu one layunanda ashi wʼedielo, ayutshikala mindu edja ndu dikolo.

²² Engo tshe kanananda one leli mindu, kayuyala mindu. Ku untu lakinanda, ayutshikala mindu edja ndu dikolo.