Walelu 17 - La Bible en Otetela (Bible K'Ekila) 1991

Danga dia Arona

¹ Latuyalaka akatela Mose ati:

² Uteli asi Isariyele dia we mbosa danga otoi otoi uma lu luudu la washi, tslie kame alanga dikumi la ahendi, uku efula kʼewandji wa mvudu ya washewo. Kufundi lukumbu la uwandji la uwandji lu danga diandi.

³ Kufundi lukumbu la Arona lu danga dia Lewi. Ne dia ete wa khumbu la khumbu ka washewo wayuyala la danga otoi.

⁴ Kakitsha la ntundu kʼoshete wʼomenyi, lu luudu lʼesanganelu la dipema, lu dihuli diatumuhumanaka la ye.

⁵ Ku danga diʼuntu layumosonola diayomonga, ku dimi layukumiya engungungunu wayunyungunangunelaka asi Isariyele la ntundu kami.

⁶ Mose akatela asi Isariyele dikambu diako, ku ewandji awo tshe wakawusha alanga dikumi la ahendi, uwandji la uwandji danga, uku aki mvudu ya washewo. Danga dia Arona diaki lʼatei wʼalanga awo.

⁷ Mose akakitsha alanga lu luudu lʼomenyi, la ntundu ka Latuyalaka.

⁸ Ku wedi a pindju, lamʼakoto Mose lu luudu la dipema lʼomenyi, enyi ku danga dia Arona, dia lu luudu la Lewi, diakamongi, diakatundjisha songusongu, diakombodi alembo, ndu diambutshundja edika wa amande.

⁹ Mose akatundja alanga tshe uma la ntundu ka Latuyalaka, akawaela uya le asi Isariyele. Vo wakawaendi, ku untu lʼuntu akose danga diawo.

¹⁰ Latuyalaka akatela Mose ati: Ukaluya danga diʼArona la ntundu kʼomenyi, dia dio namema uku djimbitelu yʼeuhwelu, le akanga wʼuhedia dia we nkumiya engunungunu awo le mi, vo watukuvo.

¹¹ Mose akatshi osoku; uku akawutela Latuyalaka, mbakandatshi.

¹² Ku asi Isariyele wakatela Mose vati: Enda, shu tambukitshiya, tambuvo, tambushila ushiku!

¹³ Untu tshe lutusukanaka, latusukanaka lʼetemwelo ka dipema ka Latuyalaka, ayuvo. Dieli la su dia mvo shu tshe uka?