Walelu 15 - La Bible en Otetela (Bible K'Ekila) 1991

Elembe lu Dikambu dia Elambu

¹ Latuyalaka akatela Mose ati:

² Uteli asi Isariyele wati: Lamʼayunyukuma lu kete yamumunyusha dia nyu ntudjase leko,

³ ndu lamʼayulanga untu nambula ngombe kana okoko ulambu wa nambula lu dja, kana ulambu wa lutshumba, kana ulambu ukina le Latuyalaka, dia nshidiya daka kana uku ulambu wa lulangu kana wa lu nshi yanyu ya waki, dia ntsha diowo dia ngenyangenya Latuyalaka,

⁴ one layela ulambu andi, kalambuli ndu etenyi otoi ka dikumi ka efa ka shima ka pudipudi, kosohanyimi la iso yediko ya etenyi otoi ka nei ka hina ulambu wa shima le Latuyalaka.

⁵ Kolongosole wanu etenyi otoi ka nei ka hina, dia ndjala ulambu wa dinono, kame la ulambu wa lutshumba, kana ne dia ulambu ukina, kana ne dia osongo lʼosongo wʼokoko.

⁶ Naka ne dia okoko wʼumi, kolongosole tenyi pendi dia dikumi dia efa dia shima ka pudipudi, kosohanyimi la iso yediko ya etenyi otoi ka satu ka hina.

⁷ Kulambuli wanu yediko ya etenyi otoi ka satu ka hina ulambu wa dinono, dia ndjala diowo dia ngenyangenya Latuyalaka.

⁸ Lamʼayuyolongosola ngombe kʼumi dia ndjala ulambu wa lutshumba, kana dia ndjala ulambu ukina, dia nshidiya daka, kana dia ndjala ulambu wa ki le Latuyalaka,

⁹ one layulambula ngombe, kela tenyi satu dia dikumi dia efa dia shima ka pudipudi, kosohanyimi la iso yediko ya etenyi otoi ka hendi ka hina, ulambu wa shima.

¹⁰ Kulambuli wanu yediko ya etenyi otoi ka hendi ka hina ulambu wa dinono, uku ulambu wa nambula lu dja, dia ndjala diowo dia ngenyangenya Latuyalaka.

¹¹ Osoku mbayuwutshaka lu nyama la nyama: ngombe kʼumi kana okoko wʼumi, esongo wʼekoko a waumi kana ana mbudi.

¹² Kukutsha diango so lu nyama la nyama uku efula kayo.

¹³ Osoku mbayutsha ona luta tshe lʼulambu, ulambu wa nambula lu dja, dia ndjala diowo dia ngenyangenya Latuyalaka.

¹⁴ Ongendangenda tshe ludjashi lʼatei anyu kana untu layunyokendelaka ufaki lu nonga yanyu, lalanga nambula ulambu wa nambula lu dja, ndi katshi pupu uku atunyutshaka, dia ndjala diowo dia ngenyangenya Latuyalaka.

¹⁵ Olembe otoi mbayuyala le nyu ndu le usi wudja ludjashi lʼatei anyu; olembe wa pundju wa lu lolonga la lolonga. Uku wenyu, mbayuyala ndu usi wudja la ntundu ka Latuyalaka.

¹⁶ Olembe otoi la didjangu otoi mbayuyala le nyu ndu le usi wudja ludjashi lʼatei anyu.

¹⁷ Latuyalaka akatela Mose ati:

¹⁸ Uteli asi Isariyele wati: Lamʼayunyukuma lu kete yatamanyolombola,

¹⁹ lamʼayunyutole diango dia lu kete yako, kanyutulambulaki Latuyalaka ulambu.

²⁰ Kanyulambulaki ukama wa ma wʼuma lu shima kʼolonga ulambu. Kanyulambuli uku ulambu wʼuma lu dihuli diʼesuswelu.

²¹ Kanyulambulaki Latuyalaka shima kʼolonga ulambu lu nonga yanyu.

²² Keli naka nyambutsha munga, diaha ndjela elembe ene tshe wakatela Latuyalaka Mose,

²³ elembe tshe wakadjangela Latuyalaka Mose uma lu lushi lakandakimo elembe pulu ndu lu nonga yayayi tshe.

²⁴ Naka nyu nyakatshi munga kakinyu kuntunga lutunga, kaki ului wʼantu kumbeya, ului tshe kawulambuli osongo wa ngombe wʼumi ulambu wa lutshumba, dia ndjala diowo dia ngenyangenya Latuyalaka, kame la ulambu awo wa shima, la wa dinono uku olembe, ndu wumbi a mbudi ulambu wa kolo.

²⁵ Olombedi ayutungela ului tshe wʼasi Isariyele ekesanelu, ku vo wayudimanyiama; ne dia munga kako kakatshama, ku vo wakela ulambu awo, ulambu wa nambula lu dja le Latuyalaka, la ulambu awo wa kolo la ntundu ka Latuyalaka, ne dia munga kakawatshi.

²⁶ Ului tshe wʼasi Isariyele wayudimanyiama ndu usi wudja ludjashi lʼatei awo, ne dia antu tshe wakayala la unungu lu munga kakiwo kuntunga lutunga.

²⁷ Naka untu ambutsha kolo kahandatungi lutunga, ndi kalambuli usamalu a mbudi wʼeleku otoi ulambu wa kolo.

²⁸ Ku olombedi ayutungela untu lambutsha munga ekesanelu. Lamʼambundutsha kolo kahandatungi lutunga lu ashu wa Latuyalaka, ndi ayudimanyiama.

²⁹ Kanyuyalaki la olembe otoi dikambu dia kolo kutshami, kaha lutunga: pupu le ona luta lʼatei wʼasi Isariyele ndu le ongendangenda ludjashi lʼatei awo.

³⁰ Keli kanga wendjudi tshe, ona luta kana ongendangenda, latenga Latuyalaka, ayunyema uma lʼatei a wudja awo.

³¹ Ne dia untu ako akonyola diui dia Latuyalaka, akadiaki olembe andi, ndi ayunyema uma lʼatei a wudja awo. Wutshu a kolo kandi wayuyala lʼote andi.

Wambudiaka Untu Lakalanya Lushi la Mumuya

³² Lamʼaki asi Isariyele lʼusui wa shenga, vo wakatani pami kemotshi ana kunyi lushi la mumuya.

³³ Wane wakutani ana kunyi, wakayi la ndi le Mose, Arona la ului tshe wʼantu.

³⁴ Wakatukulama lu lukanu, ne dia dikambu diandi diatalema, dia vo mbeya uku ayuwutshela.

³⁵ Latuyalaka akatela Mose ati: Dieli la pami kene ndjakema. Ului tshe wʼantu kawutuwuki ave lʼandja a pangu.

³⁶ Ului tshe wʼantu wakatshu la ndi lʼandja a pangu, wakatudiaka lʼave, uku akadjangela Latuyalaka Mose.

Esambala wa lu Atshuku wʼAhondo

³⁷ Ku Latuyalaka akatela Mose ati:

³⁸ Uteli asi Isariyele kawudjaki tufufo lu atshuku wʼeloto awo lu nonga yawo tshe; kawudjaki okodi wʼudima ladiku dia fufo la fufo.

³⁹ Okone lamʼayunyendaka tufufo tako, ku nyayuhoka elembe tshe wa Latuyalaka, dia mbetsha, mbahanyuyela saki yʼetema anyu la ya ashu anyu, uku akanyatshaka nshi ya ntundu.

⁴⁰ Kanyuhoki elembe ami tshe, kanyeyelaki, ndu kanyuyali ekila le Unyashungu anyu.

⁴¹ Dimi keli Latuyalaka, Unyashungu anyu, lakanyutundja uma lu kete ya Edjibitu, dia ndjala Unyashungu anyu. Dimi keli Latuyalaka, Unyashungu anyu.