Walelu 14 - La Bible en Otetela (Bible K'Ekila) 1991

Antu Wambuhedia Latuyalaka

¹ Ului wʼantu tshe wakadi tukuku; wakaleli lʼutshu.

² Asi Isariyele tshe wakangunangunela Mose la Arona. Vo tshe wakawatela vati: Aki ololo shu ntavwi lʼEdjibitu! kana shu tavwi lʼusui one wa shenga!

³ Okoko wana atatolombola Latuyalaka utsha lu kete sho, dia shu ntudiakema la tombo? Wadiesu la anʼasu wayuyalaka diango diawo dia dimbu. Taki ololo shu nkalula lʼEdjibitu uka?

⁴ Ku vo wakatanela vati: Tosonole olombodi omotshi, tukaluli utsha lʼEdjibitu.

⁵ Mose la Arona wakako ekhukhumadi la ntundu kʼului tshe wʼasi Isariyele.

⁶ Ku Jashua, onʼa Nuna, la Kaleba, onʼa Jefune, wane waki lʼului a waku wakatukemba kete, wakatshatsha ahondo awo.

⁷ Vo wakatela ului tshe wʼasi Isariyele vati: Kete yakatatukemba, yeko kete yʼololo efula ndu dimena.

⁸ Naka Latuyalaka ntongenangenaka, ndi ayutolombola utsha lu kete yako, ayututushayo, kete yuludi too la awele la usanga.

⁹ Keli dikambu otoi, tanyuhendwelaki Latuyalaka, kuyanga mbuka antu wa la kete wotna, ne dia vo wayuyala ma diasu. Vo kema la usuko wa mbasukela ntu. Latuyalaka eko la su; tanyuwaukaki woma.

¹⁰ Keli ului wʼantu wakati dia mbauka ave. Ku lutumbu la Latuyalaka lakene ladiku dia luudu lʼesanganelu la dipema la ntundu kʼasi Isariyele tshe.

¹¹ Ku Latuyalaka akambula Mose ati: Edja ndu kaandi ayukimo wudja one monyolami? Etena kakona kayuwumbetawo, kuyanga aha uma lu tulimbitelu ta mamba tone, takamatshi lʼatei awo?

¹² Dimi layadiaka la sui dia wulu, layuwadima sangu, ku layutunga wudja waleki wuki ndu wulu uma le ye.

¹³ Ku Mose akakaluya Latuyalaka diui ati: Naka asi Edjibitu wayuka lukumu, ne dia we akatundja wudja one la wulu aye uma lʼatei awo,

¹⁴ vo wayutela akanga a kete nye lukumu lako. Vo wakuki vati: We, Latuyalaka, eko lʼatei a wudja one. We ateneka le wo hwe; dingi diaye diatakumbaka. We atutshokaka lu ekoho ka dingi la ntundu kawo la yanyi, ndu lʼekoho ka dja lʼutshu.

¹⁵ Keli kakiane, naka we ayushila wudja one ushiki, wedja ekina wakuki lukumu laye, wayuta vati:

¹⁶ Ne dia Latuyalaka kema la wulu wa nombola wudja one pulu lu kete yakandalaki, diako mbambundadiaka, vo tshe lʼusui wa shenga.

¹⁷ Lambukosengasenga kakiane, nti: Wulu aye, we Latuyalaka, wenami utamanya! uku akayati wati:

¹⁸ Latuyalaka huki kele esadi, eko too la ngandji ka shikaa, atudimanyiaka antu kolo la ehedia awo. Keli ndi hatuyindjaka akanga wʼenungu, atosomboyaka ana ne dia kolo ya washewo, edja ndu lu lolonga la satu kana la nei.

¹⁹ Lambukosengasenga nti: Udimanyia wudja one kolo yawo uku eli wuki wa ngandji kaye ka shikaa, uku ayayadimanyia umaka lʼEdjibitu edja ndu lane.

Unyashungu Ambusuya Asi Isariyele

²⁰ Latuyalaka akakaluya diui ati: Dimi lambadimanyia, uku diui diaye.

²¹ Keli mete, uku wemi la lumu! ndu uku ayulula lutumbu la Latuyalaka lu kete tshe,

²² antu ako tshe wakenyi lutumbu lami ndu tulimbitelu takamatshaka lʼEdjibitu, ndu lʼusui wa shenga, wakambedika tena dikumi ndu kumbukaka diui diami,

²³ hawena kete yakamalaki dia mbisha washewo. Waku tshe wakamonyola, hawuyena.

²⁴ Tshikima ukambi ami Kaleba, ne dia ndi akayala la nyuma kutshikitanyi, ndu akandjelaka lʼutema hwe, kayumukumia lu kete yakandatshu. Tukanula tandi tayuyikita.

²⁵ Asi Amaleka la asi Kanana wambudjase lu ekidi. Kanyukaluli lui, kanyutshu utsha lʼusui wa shenga, lu mbuka kʼutsha lʼUduwa a Tilili.

²⁶ Ku Latuyalaka akambula Mose la Arona ati:

²⁷ Edja ndu kaandi ayukimo ului one wa kolo ngunangunelami? Dimi lakuki engunungunu wʼasi Isariyele watuwungunangunelaka.

²⁸ Kanyuwateli nyati: Latuyalaka kata ati: Uku wemi la lumu! dimi layunyutshela uku akanyati lu atui ami.

²⁹ Edu anyu wayukalema lʼusui one. Nyu tshe wakawali, waki la deku akumi ahendi pulu ladiku wakangunangunela,

³⁰ hanyukuma lu kete yakamanyulaki dia nyu mbidjase, tshikima Kaleba, onʼa Jefune, la Jashua, onʼa Nuna.

³¹ Keli anʼanyu wa tshitshe wakanyataka nyati: Vo wayuyala diango dia dimbu, mbayumukumia leko, dia vo mbeya kete yakanyonyola.

³² Keli nyu nyame, edu anyu wayukalema lʼusui one wa shenga.

³³ Anʼanyu wayuyala alami wa dungalunga lʼusui wa shenga deku akumi anei. Nyu nyayusuwaka ne dia ehedia anyu, edja ndu nyu tshe nyambukalema lʼusui one wa shenga.

³⁴ Uku efula ka nshi yakanyatshu dia ntukemba kete, nshi akumi anei, mbayunyusuwa deku akumi anei uma lu kolo kanyu. Lushi otoi layuyala eleku otoi. Ku nyu nyayulimbitela lunyangu lami.

³⁵ Dimi Latuyalaka kata dikambu ne, okone layuditshela ului one tshe wa kolo, wakasangana dia nsemanela la mi. Vo wayulanyema lʼusui one, wayuvo loko.

Nyoi kʼAtopi wa Kolo Dikumi

³⁶ Antu wakatumi Mose dia ntukemba kete, wane wakayotombosha antu dia ngunangunela Mose lamʼakawakalula la lukumu la kolo dikambu dia kete sho,

³⁷ antu ako wakela lukumu la kolo uma lu kete yako, wakadiakema la sui la ntundu ka Latuyalaka.

³⁸ Tshikima Jashua, onʼa Nuna, la Kaleba, onʼa Jefune, mbakatshikala la lumu lʼatei wʼantu wakatshu dia ntukemba kete.

Elembelo kʼAsi Isariyele la Horoma

³⁹ Mose akatela asi Isariyele aui ane tshe, ku vo wakaleli wulu.

⁴⁰ Vo wakunela kʼolomo la pindju, wakambela lu ahuli wa ladiku wa lu leke lʼakuna. Ku wakati vati: Enda, shu ane taya lane! Shu tayutsho utsha lu dihuli diakatulaki Latuyalaka, ne dia shu takatshi kolo.

⁴¹ Ku Mose akati ati: Ukundi ambunyudiaka olembe wa Latuyalaka? Dikambu diako hadiuluwana.

⁴² Tanyumbelaki! ne dia Latuyalaka kema lʼatei anyu, nyutukutolembiama le atunyi anyu.

⁴³ Asi Amaleka la asi Kanana weko la ntundu kanyu, vo wayunyudiaka la tombo. Latuyalaka hatshu la nyu, ne dia nyu nyakakadimo uma le ndi.

⁴⁴ Vo wakatetemala mumbela utsha lu ahuli wa ladiku wa lu leke lʼakuna, keli oshete wa sheki wa Latuyalaka, kuyanga Mose, kumunela uma lu pangu.

⁴⁵ Ku asi Amaleka lʼasi Kanana wakadjashi lu leke lʼakuna, wakahulo dia ndjolo la wo. Ku wakalembia, wakayelana la wo, pulu ndu la Horoma.