Walelu 12 - La Bible en Otetela (Bible K'Ekila) 1991

Miriyama la Arona Wambosemanela la Mose

¹ Miriyama la Arona wakateketela Mose lu dikambu dia umuntu usi Kushi lakandose, ne dia ndi akatshuki umuntu usi Kushi.

² Vo wakati vati: Undi, Latuyalaka akahumbi nteketa paka uma le Mose utu? Ndi konteketa ndu uma le su? Ku Latuyalaka akuki dikambu so.

³ Keli Mose aki untu kanga memakana ka wulu, ndeka antu tshe wa la kete.

⁴ Latuyalaka akatela Mose, Arona la Miriyama shashimuya ati: Nyutshu nyu asatu la luudu lʼesanganelu la dipema. Ku vo asatu wakatshu leko.

⁵ Latuyalaka akahulo lu ekoho ka dingi, akayemala lʼeotwelo ka luudu la dipema. Ndi aketi Arona la Miriyama, ku vo ahendi wakasukana.

⁶ Ndi akawatela ati: Nyulungi aui ami. Naka umvutshi omotshi ambuyala lʼatei anyu, dimi Latuyalaka layeneka le ndi lu enelo; layoteketaka la ndi lu do.

⁷ Keli le ukambi ami Mose, kema osoku; ndi ambushama okende kame la luudu lami tshe.

⁸ Layoteketaka la ndi hwe lʼunyo, aha lʼaui wa tukedi. Ndu ndi ayendaka didjidji dia Latuyalaka. Okoko wana wakinyu kumbuka woma dia nsemanela la ukambi ami Mose?

⁹ Kele ka Latuyalaka kakahete le wo, ku ndi akamo.

¹⁰ Lamʼakamo dingi uma ladiku dia luudu la dipema, wenyi ku Miriyama akayadi sudi dimba tshe, kasaa uku pembe. Arona akasikiso utsha le Miriyama, enyi ku aya sudi dimba tshe.

¹¹ Arona akasengasenga Mose ati: Khumemi li, tutusuyaki ne dia shu takatshi uku dinginya ndu takatshi kolo.

¹² Lambukosengasenga nti: Tetawoki ndi ndjala uku ona lutwi udu, lambohonda etenyi ka hendi ka dimba diandi lamutondi uma lʼutema a nyangu.

¹³ Mose akalelela Latuyalaka ati: Unyashungu li! lambukosengasenga nti: Okonoya!

¹⁴ Ku Latuyalaka akatela Mose ati: Utunduyala shi awuteli losoi lʼelundji, ndi tutuyala la sonyi nshi esambeli uka? Ndi atukudihama nshi esambeli lʼandja a pangu. Lʼokongo diku kawukaluya lu pangu.

¹⁵ Ku Miriyama akatudihama lʼandja a pangu nshi esambeli. Vo kumunela edja ndu lamʼakawakaluya Miriyama lu pangu.

¹⁶ Lʼokongo diku antu wakunela uma le Hazerote, wakatuhanga lʼusui wa shenga wa Parana.