Walelu 1 - La Bible en Otetela (Bible K'Ekila) 1991

Wambala Isariyele lu Sinai

¹ Lu lushi la ntundu la ngondo ka hendi, lu eleku ka hendi uma lamʼakatumbi asi Isariyele uma lu kete ya Edjibitu, Latuyalaka akatela Mose lamʼakindi lu luudu lʼesanganelu la dipema, lʼusui wa Sinai ati:

² Kali efula kʼului tshe wʼasi Isariyele lu khumbu yawo, lu mvudu ya washewo, usika pami tshe, untu lʼuntu, uku efula ka kumbu yawo.

³ We la Arona kanyali usika pami tshe, leli la deku akumi ahendi pulu ladiku, lukuki ntsho lu ta. Kanyuwali lʼului lʼului.

⁴ Uma lu diuhu la diuhu, untu omotshi leli ote a khumbu ka washi, kayali kame la nyu.

⁵ Kumbu yʼantu wayemala kame le nyu nye. Uma la Rubena: Elizure, onʼa Shedeure;

⁶ uma la Simeyona: Shelumiyele, onʼa Zurishada;

⁷ uma la Juda: Nashona, onʼa Aminadaba;

⁸ uma la Isakara; Netanele, onʼa Zuara;

⁹ uma la Zebuluna: Eliyabe, onʼa Helona;

¹⁰ uma le asika Josefu, uma la Efarayima: Elishama, onʼa Amihude; uma la Manase: Ngamaliyele, onʼa Pedazura;

¹¹ uma la Bendjamina: Abidana, onʼa Ngidiyoni;

¹² uma la Dane: Ahiyezere, onʼa Amishadai;

¹³ uma la Ashere: Pangiyele, onʼa Okarana;

¹⁴ uma la Ngada: Eliyasafu, onʼa Duele;

¹⁵ uma la Nafetali: Ahira, onʼa Enana.

¹⁶ Oso eli wane wakaweti lʼului, ewandji uma lu wauhu wa washewo, ete wʼatshiha wa Isariyele.

¹⁷ Mose la Arona wakose apami aso wakawuli kumbu.

¹⁸ Ku vo wakasanganya ului tshe kame lu lushi la ntundu la ngondo ka hendi. Vo wakali untu tshe laya la deku akumi ahendi pulu ladiku. Wakali antu lu khumbu yawo, lu mvudu ya washewo.

¹⁹ Mose akawali lʼusui wa shenga wa Sinai, uku akawudjangela Latuyalaka.

²⁰ Vo wakali efula kʼapami, untu lʼuntu, uku efula ka kumbu, waki la deku akumi ahendi pulu ladiku, wane tshe wakakuki ntsho lu ta, uma lu wudja wa Rubena, onʼa Isariyele lʼenundu, uku nonga yawo, khumbu yawo, la mvudu ya washewo.

²¹ Apami tshe wakawali lu diuhu dia Rubena waki nunu akumi anei la samalu la kama tshanu.

²² Vo wakali efula kʼapami, untu lʼuntu, uku efula ka kumbu, waki la deku akumi ahendi pulu ladiku, wane tshe wakakuki ntsho lu ta, uma lu wudja wa Simeyona, uku nonga yawo, khumbu yawo, ndu mvudu ya washewo.

²³ Apami tshe wakawali lu diuhu dia Simeyona waki nunu akumi atanu la divwa la kama shatu.

²⁴ Vo wakali efula kʼapami, untu lʼuntu, uku efula ka kumbu, waki la deku akumi ahendi pulu ladiku, wane tshe wakakuki ntsho lu ta, uma lu wudja wa Ngada, uku nonga yawo, khumbu yawo, ndu mvudu ya washewo.

²⁵ Apami tshe wakawali lu diuhu dia Ngada waki nunu akumi anei la tanu kama shamalu la akumi atanu.

²⁶ Vo wakali efula kʼapami, untu lʼuntu, uku efula ka kumbu, waki la deku akumi ahendi pulu ladiku, wane tshe wakakuki ntsho lu ta, uma lu wudja wa Juda, uku nonga yawo, khumbu yawo, ndu mvudu ya washewo.

²⁷ Apami tshe wakawali lu diuhu dia Juda waki nunu akumi esambeli la nei la kama shamalu.

²⁸ Vo wakali efula kʼapami, untu lʼuntu, uku efula ka kumbu, waki la deku akumi ahendi pulu ladiku, wane tshe wakakuki ntsho lu ta, uma lu wudja wa Isakara, uku nonga yawo, khumbu yawo, ndu mvudu ya washewo.

²⁹ Apami tshe wakawali lu diuhu dia Isakara waki nunu akumi atanu la nei la kama nyei.

³⁰ Vo wakali efula kʼapami, untu lʼuntu, uku efula ka kumbu, waki la deku akumi ahendi pulu ladiku, wane tshe wakakuki ntsho lu ta, uma lu wudja wa Zebuluna, uku nonga yawo, khumbu yawo, ndu mvudu ya washewo.

³¹ Apami tshe wakawali lu diuhu dia Zebuluna waki nunu akumi atanu la esambeli la kama nyei.

³² Lʼatei wʼasika Josefu, vo wakali efula kʼapami, untu lʼuntu, uku efula kakumbu, waki la deku akumi ahendi pulu ladiku, wane tshe wakakuki ntsho lu ta, uma lu wudja wa Efarayima, uku nonga yawo, khumbu yawo, ndu mvudu ya washewo.

³³ Apami tshe wakawali lu diuhu dia Efarayima waki nunu akumi anei la kama tshanu.

³⁴ Vo wakali efula kʼapami, untu lʼuntu, uku efula ka kumbu, waki la deku akumi ahendi pulu ladiku, wane tshe wakakuki ntsho lu ta, uma lu wudja wa Manase, uku nonga yawo, khumbu yawo, ndu mvudu ya washewo.

³⁵ Apami tshe wakawali lu diuhu dia Manase waki nunu akumi asatu la pendi la kama hyendi.

³⁶ Vo wakali efula kʼapami, untu lʼuntu, uku efula ka kumbu, waki la deku akumi ahendi pulu ladiku, wane tshe wakakuki ntsho lu ta, uma lu wudja wa Bendjamina, uku nonga yawo, khumbu yawo, ndu mvudu ya washewo.

³⁷ Apami tshe wakawali lu diuhu dia Bendjamina waki nunu akumi asatu la tanu la kama nyei.

³⁸ Vo wakali efula kʼapami, untu lʼuntu, uku efula ka kumbu, waki la deku akumi ahendi pulu ladiku, wane tshe wakakuki ntsho lu ta, uma lu wudja wa Dane, uku nonga yawo, khumbu yawo, ndu mvudu ya washewo.

³⁹ Apami tshe wakawali lu diuhu dia Dane waki nunu akumi asamalu la pendi la kama esambeli.

⁴⁰ Vo wakali efula kʼapami, untu lʼuntu, uku efula ka kumbu, waki la deku akumi ahendi pulu ladiku, wane tshe wakakuki ntsho lu ta, uma lu wudja wa Ashere, uku nonga yawo, khumbu yawo, ndu mvudu ya washewo.

⁴¹ Apami tshe wakawali lu diuhu dia Ashere waki nunu akumi anei la otoi la kama tshanu.

⁴² Vo wakali efula kʼapami, untu lʼuntu, uku efula ka kumbu, waki la deku akumi ahendi pulu ladiku, wane tshe wakakuki ntsho lu ta, uma lu wudja wa Nafetali, uku nonga yawo, khumbu yawo, ndu mvudu ya washewo.

⁴³ Apami tshe wakawali lu diuhu dia Nafetali waki nunu akumi atanu la satu la kama nyei.

⁴⁴ Oso eli efula kʼantu wakali Mose la Arona, lu ekimanyelu kʼewandji wa Isariyele, antu dikumi la ahendi, wako wakayala untu lʼuntu lʼote wa khumbu la khumbu ya washewo.

⁴⁵ Wane tshe wakawali lʼatei wʼasi Isariyele uku khumbu yawo, waki la deku akumi ahendi pulu ladiku, ndu waki la wulu wa ntsho lu ta.

⁴⁶ Efula ka wane tshe wakawali waki nunu kama shamalu la satu, la kama tshanu la akumi atanu.

Wambusha Asi Lewi Okende wa Luudu lʼEsanganelu la Dipema

⁴⁷ Keli asi Lewi kumbalema lu diuhu dia washewo kame la wo,

⁴⁸ ne dia Latuyalaka akatela Mose ati:

⁴⁹ Tshikima diuhu dia Lewi tu mbahayala, ndu mbahayusanganya lʼului wʼasi Isariyele.

⁵⁰ Keli nyukimo okende wa etemwelo ka dipema kʼomenyi, diango diato, la kene tshe keli loko, le asi Lewi. Vo mbayembaka etemwelo ka dipema la diango diato tshe. Vo mbayutshaka ulimu loko, ndu mbayuhangaka lʼutshimba ato.

⁵¹ Lamʼayuwutunelaka, asi Lewi mbayutahikulaka etemwelo ka dipema, ku lamʼayuwutahangaka, vo mbayutakihikaka. Naka untu kʼuntu ayusukana, ndi ayudiakema.

⁵² Asi Isariyele wayutahikaka mvudu yawo yʼapema, untu lʼuntu lasuki lʼekuhu kawo ka koi, uku elui awo.

⁵³ Keli asi Lewi wayutahangaka lʼutshimba wa etemwelo ka dipema kʼomenyi, ne dia kele atukuyala le ului wʼasi Isariyele. Asi Lewi mbayulamaka okende wa etemwelo ka dipema kʼomenyi.

⁵⁴ Osoku mbakatshi asi Isariyele. Vo wakatshi akambu tshe wakadjangela Latuyalaka Mose.