Undaki 8 - La Bible en Otetela (Bible K'Ekila) 1991

¹ Akona eli uku kanga yimba? Akona atulimbitelaka tukitshimudi tʼakambu? Yimba yʼuntu yateteka elundji kandi ngaingai, ngala kʼelundji kandi katukadimoka.

² Dimi nti: Ulamaki elembe wa khumʼekanga, ndu etshibelu kakayatshibelu Unyashungu.

³ Tusamanyaki dia mumo uma lasuki la ndi. Tutetemalaki ntsha kolo ne dia ndi atutshaka kene kalangandi.

⁴ Diui dia khumʼekanga dieko wulu. Akona ukuki mbumbula ati: Katshaye na?

⁵ Untu latulamaka elembe andi, hatuhumoka lukulu lʼengeno. Utema a kanga yimba atulimbitelaka etena la elumbwelu.

⁶ Dikambu tshe dieko la etena kadio la elumbwelu kadio, ne dia asui wʼuntu weli wulu le ndi.

⁷ Ndi heyi kene kayuyala lʼokongo andi. Akona ayuwutela uku ayutuyala?

⁸ Nduku untu eli khumʼa lumu landi, dia mbeya lukimela, kuyanga wulu wa nsekola lushi landi la nyoi. Nduku etshungwelu keko lu ta ne, ndu kolo heyi mbushimbela uma loko.

⁹ Dimi lakenyi akambu ane tshe, lakadji utema ami lu kene tshe katutsha-maka lʼesi ulungu. Etena keko ka untu mbulela unyandi dia mbusuya.

¹⁰ Ku dimi lakenyi antu wa kolo wakundja waumbu, wakoto lu mumuya. Keli wane wakatshaka akambu wʼusimbwi, wakamo uma lu dihuli diʼekila, wakuhamela lʼusumba. Ndu dikambu so dieko anyanya.

Akambu wa Lumu Kema Pupu

¹¹ Ehimbwelu kʼakambu wa kolo hayala esadi. Diako mbatululaka etema wʼantu too la pusa ka ntsha kolo.

¹² Kuyanga untu a kolo ambutsha kolo tena lukama ndu ambutalula nshi yandi, mete, dimi mbeyaka nti: Waku watukaka Unyashungu woma, wayuhumo lukulu lʼolo, ne dia vo watukaka woma la ntundu kandi.

¹³ Keli diese huyala le untu a kolo. Ndi hutalula nshi yandi uku didjidji, ne dia ndi hatukaka woma la ntundu ka Unyashungu.

¹⁴ Dikambu diʼanyanya diatuyalaka lu kete ne. Antu wʼololo watukundjaka kene katukundjaka antu wa kolo; la antu wa kolo watukundjaka kene katukundjaka antu wʼololo. Dimi lakati nti: Dikambu so dieko anyanya.

¹⁵ Ku dimi lakalemia ongenongeno, ne dia nduku diese dieli le untu lʼesi ulungu, diuleki nde, no, la ngenangena; ne dia ongenongeno ako ayutshikala la ndi lʼulimu andi lu nshi ya lumu yakawusha Unyashungu lʼesi ulungu.

¹⁶ Lamʼakamadji utema dia nimbitela yimba la dia menda elimu watutshamaka ladiku dia kete, ne dia omotshi eko lahatulakaka djo la yanyi kuyanga lʼutshu,

¹⁷ dimi lakenyi elimu tshe wa Unyashungu. Ku lakenyi nti: Untu heyi nimbitela ulimu watutshamaka lʼesi ulungu. Kuyanga untu ayokomo dimba okomokomo dia mbuyanga, ndi heyi mbushula. Kuyanga usi yimba nangaka mbulimbitela, ndi heyi mbushula.