Undaki 2 - La Bible en Otetela (Bible K'Ekila) 1991

¹ Dimi lakatela utema ami nti: Tutshu! layukedika la ongenongeno; okone ongenengene. Keli ndu dikambu so dieko anyanya.

² Dimi lakati dia tola nti: To teli enginya! la dia ongenongeno nti: Waho akona weli loko?

³ Dimi laka-shishima utema ami, dia vo nombola dimba diami la yimba, dia dimi ngena-ngena la wanu, la dia dimi nkimela utshatsha edja ndu lamʼayumulimbitela kene keli ololo dia antu ntshaka lʼesi ulungu nshi tshe ya lumu lawo.

⁴ Dimi lakatshi elimu sfula, lakayahikela mvudu, lakayaunela dikambo dia vinyo.

⁵ Dimi lakayatshela dikambo la dikambo diʼelua, lakuni etamba wʼelua wa wehu la wehu.

⁶ Dimi lakayatshela eduwa, dia ndoyaka ukunda, lene atulaka etamba.

⁷ Dimi lakasumbi fumbi yʼapami ndu yʼamantu, yakuti ana efula lakami. Dimi laki la nyimba ya ngombe la ya ekoko, yuleki ya waku waki la ntundu kami la Jerusalema.

⁸ Dimi lakayamotshiya ndu fesa la paunyi ndu ekundji wa khumi ya dikanga la wa lu beke. Dimi lakakundja emimbi wʼapami la emimbi wʼamantu, la wehu tshe wa dihumahuma diatongenyangenyaka antu.

⁹ Dimi lakayala wuki wuki, uleki waku tshe waki la ntundu kami la Jerusalema. Ndu yimba yami yakatshikala kame la mi.

¹⁰ Kene tshe kakakomiya ashu ami, ku dimi mbashato. Dimi kunyima utema ami nduku ongenongeno, ne dia utema ami akangenangenaka lu elimu tshe wakamatshaka. Oso aki waho ami uma lʼelimu ami tshe.

¹¹ Ku dimi lakakani yimba lu elimu tshe wakatshaka anya ami, ndu pa kakamenaka dia mbetsha. Tshe anyanya atu, uku untu latatshanya lopepe. Nduku waho wa nkundja antu lu kene katshawo lʼesi ulungu.

¹² Ku dimi lekediya ashu ami utsha lu yimba, utsha lu akambu wʼenginya la wa djeli. Kakona kayutsha one layukita khumʼekanga? Aha kene kambutshamaka edja uka?

¹³ Dimi lakenyi nti: Yimba ndeka akambu wʼenginya ololo, uku uleki usasi udjima.

¹⁴ Ashu wa kanga yimba watuyalaka lʼote andi. Keli dimi lakayulimbitela nti: Dikambu dia wuhu otoi diatuyalaka le wo vo ahendi.

¹⁵ Ku dimi lakati lʼutema ami nti: Akambu watuyalaka le kanga enginya, watuyakaka ndu le mi. Dikambu kuna diulekimi yimba? Ku dimi lakati lʼutema ami nti: Ndu dikambu ne dieko anyanya.

¹⁶ Euhwelu ka kanga yimba eli uku kanga enginya, to kema pundju. Lu nshi yayayi, akambu tshe wakatshama wayuhamema. Yi! kanga yimba atuvokaka uku kanga enginya!

¹⁷ Ku lakahetsha lumu lami, ne dia elimu watutshamaka lʼesi ulungu weli wutshu le mi. Tshe eli anyanya, uku untu latatshanya lopepe.

¹⁸ Dimi lakahetshaka elimu tshe wakamatshaka lʼesi ulungu, wakamahumbi ntshikela one layunkita.

¹⁹ Akona eya kana ndi ayuyala kanga yimba kana enginya? Ndi ayulela diango tshe diakamatshi uma la yimba yami lʼesi ulungu. Ndu dikambu so dieko anyanya.

²⁰ Diako mbakamanya utema, mbakamayala la ukiyanu, ne dia ulimu tshe wakamatshaka lʼesi ulungu.

²¹ Untu omotshi atutshaka ulimu la yimba, la ewu ndu la uluwanyi. Ku ndi atutshikelaka untu laki kunkamba waho wʼulimu andi. Ndu dikambu so dieko anyanya, ndu kolo ka wuki.

²² Waho akona watukundjaka untu uma lʼulimu andi tshe, ndu uma lʼohenyohenyo wʼutema andi, wakandakomoka dimba lʼesi ulungu?

²³ Ne dia nshi yandi tshe yatuyalaka paka asui, la ulimu andi paka okei. Lʼutshu, utema andi hawutuyalaka la mumuya. Ndu dikambu so dieko anyanya.

²⁴ Nduku diese diuleki le untu uku nde la no, la ngenyangenya utema andi lʼulimu andi. Keli lakenyi nti: Ndu dikambu ne diambuya uma lu lunya la Unyashungu.

²⁵ Akona ukuki nde, la ngenangena naka aha dimi?

²⁶ Ne dia Unyashungu atushaka one latongenyangenyaka yimba, ewu la ongenongeno. Keli ndi atushaka utshi a kolo ulimu wa nsanganya la motsha, dia mbisha one latongenyengenyaka Unyashungu. Ndu dikambu so dieko anyanya, uku untu latatshanya lopepe.