Tukedi 6 - La Bible en Otetela (Bible K'Ekila) 1991

Dia Mbewo Shuwasuwa la Kashi

¹ Onʼami, naka we akayala usungi le usukanyi aye, Naka we akayakimo lu anya wʼongendangenda;

² Naka we akatali lu aui wʼelomo aye, Akandama lu aui wʼuma lʼunyo aye,

³ Onʼami, utshi okone dia ndjashimbela, Ne dia we akoto lu anya wa unyaye, Tshoka, tukhusameli, utosengesenge.

⁴ Tuladiaki ashu aye, Kuyanga tokokadia toki yaye.

⁵ Uhangiso uku atuhangisoka mbuluku lu anya wa minginga, Uku atuhangisoka fudu lu anya wʼumambi.

⁶ We kanga nende, utshu le tonona, Kutendi ditshelu diato, ku we ayuyala la yimba.

⁷ To kema la uwandji, Umendji, kana umbuledi.

⁸ To tatumbaka mbu ya nde yato lu nshi yʼowo, Tatusanganyaka mbu ya nde yato lu nshi ya dinela.

⁹ We kanga nende, edja ndu kaandi ayuyukimo ndala djo? Etena kakona kayuyemo uma lu djo yaye?

¹⁰ Yema ya djo, yema yʼotokokalu, Yema ya nkoma anya dia mumuya,

¹¹ Ku wula ayukukashimula uku uvi, Ndu uhumba aye uku untu leli lu ta.

¹² Untu anyanya, kanga kolo, Atekekoka, atutaka aui wa kolo.

¹³ Ndi atumamiyaka ashu, atusanyaka lʼekulu, Atutshaka tulimbitelu la pita.

¹⁴ Kolo katuyalaka lʼutema andi. Ndi atukanaka tena tshe dia ntshela antu kolo, Atutungaka lundju.

¹⁵ Okone ekwelo kandi kayuyala esadi. Ndi ayuhimbwama shashimuya, ku ndi hokono.

¹⁶ Akambu asamalu weko, watuhetshaka Latuyalaka, Ku esambeli mbatundengaka diengekhu:

¹⁷ Ashu wa lahi, lulimi la kashi, Anya watutundjaka dikila diaha la unungu,

¹⁸ Utema watusanguyaka sangweyu dia kolo, Ekulu watusamanyaka utsha lu kolo,

¹⁹ Omenyi a kashi, latutaka akambu wa kashi, Ndu one latutungaka lundju lʼatei anangu.

Dia Mbewo Munanyi

²⁰ Onʼami, ulamaki elembe wa sho, Tukadjaki wetshelu wa nyo.

²¹ Uweumbaki lʼutema aye tena tshe, Ekeleki lu kingu kaye.

²² Lamʼayuyokendakendaka, vo wayukolombola; Lamʼayuyetama, vo wayukulama, Ndu lamʼayuyeto, vo wayusawula la ye.

²³ Olembe awo eli tala, la wetshelu awo eli usasi, Luhangu lʼekiyelu eli mbuka ka lumu;

²⁴ Dia nkulama uma le umuntu a kolo, Ee, uma lʼaui wʼoselo wa umuntu uku kanga luseka.

²⁵ Tokomiyaki lʼutema aye ne dia dimena diandi, Tolembiamaki uma lʼehohiyelo kandi kʼashu.

²⁶ Le umuntu kanga munanyi, pami atukesamaka la ukama wa ma. Keli umuntu kanga luseka atambaka lumu lʼushinga a wulu la pami djunga.

²⁷ Untu mbeyaka nkitsha dja lu tulu kandi, Ku ahondo andi hawutundo lumbi uka?

²⁸ Untu mbeyaka nkendakenda ladiku dia akalanga wa aja, Ku ekulu andi hawulungula?

²⁹ Osoku mbatuyalaka untu luna wadi a unyandi. Untu tshe lawunanda, huhanda unungu.

³⁰ Antu hawuyindja uvi, kuyanga ndi ayuva Dia nshidiya ndjala kandi.

³¹ Naka wayuwunda, ndi ayufuta engo keku tena esambeli, Ayukimo diango tshe dieli lu luudu landi.

³² One latunanaka la umuntu, kema la yimba; One latutshaka dikambu so, atuyalanyaka.

³³ Paka Duta la dionyo mbayundukundja, Sonyi hamo uma le ndi pundju.

³⁴ Kandjema katushaka pami ududu, Ku ndi huki untu ketshi lushi la somboya.

³⁵ Ndi hetawo nfutsha tula; Ndi hutshikala ki, kuyanga we ayuwusha esasha efula.