Tukedi 5 - La Bible en Otetela (Bible K'Ekila) 1991

Dia Mbewula Apami Waha la Ndjakimelu lu Akambu wa Dimba

¹ Onʼami, ulungi yimba yami, Uhuke tui lu ewu kami,

² Dia we namaka ewu, La dia elomo aye nama yimba,

³ Ne dia elomo wa umuntu akana watokediaka usanga, Lulimi landi ndeka iso oselo.

⁴ Keli lʼekumelu, ndi ndjalaka ululu uku kundju, Ndu uku yombo ya pemo wedi ehendi.

⁵ Ekulu andi watuhuloka utsha lu nyoi, Wanya andi watukumaka lu Dihuli diʼEdu.

⁶ Osoku mbahandatani mbuka ka lumu kʼusimbwi. Mbuka yandi yeko wengenge, ku ndi heyi dikambu diako.

⁷ Kakiane, onʼami, umbukeli! Tutunaki aui wakutelami.

⁸ Anganya mbuka kaye etali uma le ndi. Tusukanaki la suku dia luudu landi,

⁹ Utukukimo nemo diaye le akina, La deku diaye le akanga wʼesihi.

¹⁰ Asi wedja watukuluta la ekundji aye, La tumu yaye yatukuyala lu luudu lakana.

¹¹ We utukuyukhuma akhumu lʼekumelu kaye, Lamʼayutshumbama emunyi aye la dimba diaye.

¹² Ku we mvuta wati: Dimi lakahetshaka wetshelu. Utema ami akatunaka luhangu.

¹³ Dimi kununga aui wʼembetsha ami, Kuyanga mpuke tui le wane wakambetshaka.

¹⁴ Dimi laki lasuki la mboto lu kolo tshe, Lʼatei a wudja ndu lʼatei a lusanganya.

¹⁵ Onokaki ashi uma lʼushima aye, La ashi wakela uma lʼeteko kaye hita.

¹⁶ Ololo mbeko, dia teko diaye diʼashi nyangana la ahuli akina, La ekedi aye wʼashi nkela lu esese?

¹⁷ Teko diako diayali dikambu diaye weme, Aha dia angenangenda wudjashi la ye.

¹⁸ Eteko kaye atshokwami, Wadeye lʼumaka nshi yaye yʼolongo a pami, ayali ongenongeno aye

¹⁹ Ndi eli uku wadi a peli lʼololo, la wadi a lufumbo la dimena: Awele andi wakongenyangenyaki nshi tshe. Ulutshamaki la ngandji kandi nshi tshe.

²⁰ Onʼami, ukundi ahumbaye ndutshama la ngandji ka umuntu a kana, La nkhumbatela tulu ka umuntu kanga luseka?

²¹ Ne dia mbuka yʼuntu yeko la ntundu ka Latuyalaka, Ndi atendaka mbuka yandi tshe.

²² Untu a kolo ayundama lu kolo yandi hita. Ayukimame lʼekodi wa kolo kandi.

²³ Ndi ayuvo ne dia uhumba wa wetshelu, Ayunganela ne dia wuki wa djeli yandi.