Tukedi 30 - La Bible en Otetela (Bible K'Ekila) 1991

Akambu Wakendaka Angura

¹ Aui wa Angura onʼa Jake, ya lu leke la Masa. Untu akatela Itiyele, akatela Itiyele la Ukala ati:

² Mete, enginya kemi dia ndjala untu. Ndu latayala la yimba yʼuntu.

³ Dimi lateki akambu wa yimba, Kuyanga nimbitela yimba ya lʼEkila.

⁴ Akona akambela utsha lʼulungu, ndu lakahulo uma leko? Akona akakhuke lopepe lʼanya andi? Akona akutela ashi lu dihondo diandi? Akashikike kuma ya kete na? Na lukumbu landi, na lukumbu la onʼandi? Mete, we mbeyaka!

⁵ Aui tshe wa Unyashungu weli mete. Ndi keli eaeawu ka waku tshe watuyangaka eshamelu le ndi.

⁶ Taheki nduku diui ladiku diʼaui andi; Ndi atukuyukuhangwela, ku we ndjuyala kanga kashi.

⁷ Akambu ahendi mbamumukoloma, Tunyimakiwo, lamʼekimi la lumu:

⁸ Umanganyia akambu wa lukesu la aui wa kashi etali. Tumbeteki usi wula kana kanga ongonyi. Umbishaki diango dia nde dieli uhumba le mi.

⁹ Dimi ntukuluta, ku ndjukanguna, La mumbula nti: Akona eli Latuyalaka? Kana dimi ntukuyala usi wula, ku dimi ndjuva, La nyimula lukumbu la Unyashungu ami udimuladimula.

¹⁰ Tumamanyiaka fumbi unungu le khumendi, Ndi atukukudja mananu, ku we ndjuyala la unungu.

¹¹ Lolonga lomotshi leko, latudjaka washewo mananu, Ndu lahatolemiaka anyengewo.

¹² Lolonga lomotshi leko, latuyaenaka pudipudi vame. Keli vo watediama uma lu mindu kawo.

¹³ Lolonga lomotshi leko, ndi ashu awo lahi li! Ndu watufumbulaka kiki.

¹⁴ Lolonga lomotshi leko, lakanga wʼanya uku tombo, Ndu songo yʼanyu uku tukuwa, Dia nde asi wula la mbumana uma la kete, Ndu ehumbi uma lʼatei wʼantu.

¹⁵ Lusundju eli la ana wʼamantu ahendi, watulelaka vati: Umbisha! Umbisha! Diango satu dieko, diahatulutaka pundju. Ee, diango nei diahatutaka vati: Ambukuka!

¹⁶ Dihuli diʼEdu, utema a umuntu lʼekumba, Kete yʼowo yahunduyaka ashi pusa, Ndu dja yahataka ati: Ambukuka!

¹⁷ Su diʼuntu latosokaka shi, Ndu diatonyolaka nkitanyia aui wa nyangu, Angwangwa wa lʼukidi wayuditundula, Ana wa pangu wayudile.

¹⁸ Akambu asatu watumambiaka, Ee, anei wahamalimbitela:

¹⁹ Mbuka katufumboka pungu lʼulungu, Ushidi wʼului ladiku dia dive, Dihuli diatetaka mashua lʼatei ashi a waki, Ndu eyanelu ka pami la umuntu.

²⁰ Osoku mbeli etshelu ka umuntu kanga luseka. Ndi atolekaka, atukitulaka unyo; Atutaka ati: Nduku kolo kutshimi.

²¹ Akambu asatu mbatudidimiaka kete, Ee, anei weko, wahayakuki memba:

²² Fumbi, lamʼambunduyala khumʼekanga; Kanga enginya, lamʼambunduluta ma;

²³ Umuntu lʼepakapaka, lamʼambundutshukama; Lu ukambi a umuntu, lamʼambundukita kumendi a umuntu.

²⁴ Dikendakenda nei dia tutshitshe dieko lu kete, Keli dio dieli la yimba efula:

²⁵ Tonona kema wudja a wulu, Keli to tatumbaka diango dia nde lu nshi ya dinela.

²⁶ Etumba weli wudja a wodu, Keli vo watutshimaka eshu awo lʼasa ave.

²⁷ Endjo kema la khumʼekanga, Keli vo watengolaka, vo tshe lukengi.

²⁸ Lukudi latukimeka lʼekulu lamʼataladela. Lo latutanemaka lu mvudu ya waelelu ya khumi ya dikanga.

²⁹ Diango satu dieko, diatokendakendaka ololo, Ee, diango nei dieko, diatokendakendaka dimena:

³⁰ Tambwe, luleki nyama tshe wulu, Hatetwelaka nduku otoi uma lu mbuka.

³¹ Lekeka ndu wumbi a mbudi, Ndu khumʼekanga kahakuki antu mbolosha.

³² Naka utaku aye wakakusukuya lu akambu wʼenginya, Ndu naka we la tukanyi ta kolo, ukuke lunya laye lʼunyo,

³³ Ne dia ehinelu kʼawele katutungaka mateka, Ehinelu ka lʼohembe atutundjaka dikila, Ndu ehinelu ka kele katutungaka ta.