Tukedi 3 - La Bible en Otetela (Bible K'Ekila) 1991

Alaku wa Ndjala la Ukitanyia

¹ Onʼami, tuhelaki wetshelu ami, Utema aye alamaki elembe ami,

² Ne dia vo mbayukufudiya Nshi, la deku dia lumu laye.

³ Mete la kolamelu tawumoki uma le ye, Uwakeleki lu kingu kaye, uwafundi lʼutema aye.

⁴ Ku we ayukundja kenemo la lukumu lʼololo Lu ashu wa Unyashungu ndu wʼantu.

⁵ Ekamaki Latuyalaka lʼutema aye tshe, Tekamaki yimba yaye hita.

⁶ Uwetawoki lu akambu aye tshe, Ku ndi ayukolongoswela mbuka yaye.

⁷ Tuyalaki kanga yimba lu ashu aye weme: Uki Latuyalaka woma, umo uma lu kolo.

⁸ Dikambu ne diayuyala ekonwelo kʼemunyi aye, Ndu ekikitshelu ka weka aye.

⁹ Olemia Latuyalaka la ekundji aye, La elonga wʼuma lu dikambo diaye tshe.

¹⁰ Ku apenge aye wayululanelaka la diango, Ndu mbaka yaye yayutshulotshuloka la wanu wʼuyuyu.

¹¹ Onʼami, tonyolaki ekiyelu ka Latuyalaka, Tuhekoki luhangu landi;

¹² Ne dia Latuyalaka atuhangwelaka one lukandi ngandji, Uku atuhangwelaka shi ona lalangandi.

¹³ Untu lambukundja yimba, eli la ongenongeno, Ndu untu lambuyala la ewu.

¹⁴ Ekundjelu ka yimba ndeka ka fesa ololo, Ndu waho ayo ndeka wa paunyi ka lutshula.

¹⁵ Yo ndeka ave wʼushinga a wulu dimena, Yo ndeka diango tshe diukukiye nanga ushinga wulu.

¹⁶ Lu lunya layo la lu pami keli efula ka nshi ya lumu; Ndu lu lunya layo la lomoso keli ekundji la lutumbu.

¹⁷ Mbuka yayo, yeli mbuka yʼongenongeno, Ndu tuwuka tayo teli ki.

¹⁸ Yo yeli utamba a lumu le wane watuyekamaka. Untu tshe latutshikalaka la yo, watuwetaka vati: Kanga ongenongeno.

¹⁹ Uma lu yimba, mbakatungi Latuyalaka kete; Ndu uma lʼewu, mbakandashikike ulungu.

²⁰ Uma lu yimba yandi, mbakandatedia ehongo. Ndu mbakalosha wangi lopopo.

²¹ Onʼami, ulami yimba la ewu, Tawumoki lu ashu aye.

²² Vo wayuyala lumu lʼutema aye, La elengalenga lu kingu kaye.

²³ Ku we ayokendakenda la ki lu mbuka kaye, La lukulu laye halutakana,

²⁴ Lamʼayuyetama, we huka woma, Ee, we ayetama, ku djo yaye yayuyala olo utu.

²⁵ Tukaki woma kuyanga dikambu dia woma mbuyi shashimuya, Kuyanga elanyelu kuyi uma le antu wa kolo,

²⁶ Ne dia Latuyalaka keli ekamelu kaye, Ndi ayulama lukulu laye aha lo mundama.

²⁷ Tuyalaki la unyishi a diʼololo le wane wukuki dilungula Lamʼeye la wulu wa mbashadio.

²⁸ Lamʼeye la diango diku lʼanya, tutelaki unyaye wati: Utukutsho, kuyi, kandjukusha lui.

²⁹ Tukanaki yimba dia ntshela unyaye kolo Lamʼudjashindi ki lasuki la ye.

³⁰ Tudjaki la unyaye tamu udjadja Lamʼahandakutshedi kolo.

³¹ Tokomiyaki kanga ngala, Tosonolaki ditshelu diandi, kuyanga otoi,

³² Ne dia Latuyalaka atukaka antu wa kolo wononyi, Keli ndi eli ongenyi wʼantu wʼusimbwi.

³³ Latuyalaka atudjaka luudu lʼantu a kolo mananu, Keli atotshokolaka luudu lʼantu wʼololo.

³⁴ Ndi atosokaka asokanyi, Keli ndi atuhumuyaka akanga a ndjakitshakitsha lukulu lʼolo.

³⁵ Akanga a yimba wayukita lutumbu, Keli sangu dia akanga a dinginya dieko sonyi.