Tukedi 28 - La Bible en Otetela (Bible K'Ekila) 1991

Tukedi Tutshikitanyi Aui

¹ Antu wa kolo watulawoka ulawolawo. Keli antu wʼololo watuyalaka la dihunga uku tambwe.

² Lamʼatotombokoka wudja, ewandji watuyalaka efula. Keli uma le akanga wʼewu la akanga a yimba, Diulelu diatutshikalaka edja.

³ Usi wula latusuyaka ehumbi, Eli uku mvula ka wulu katulanyaka mbu ya nde.

⁴ Wane watutunaka elembe, watolemiaka antu wa kolo. Keli wane watulamaka elembe, watudjaka la wo tamu.

⁵ Antu wa kolo hawutulimbitelaka elumbwelu kʼololo. Keli waku watuyangaka Latuyalaka, mbatumanaka akambu tshe fundu.

⁶ Usi wula latokendakendaka lu akambu wʼusimbwi, Ambuleka one latunganelaka lu mbuka yandi ololo, kuyanga kanga ongonyi kendi.

⁷ One latulamaka elembe, eli ona la yimba. Keli umbekesanedi wʼakanga a lutshitu, atutshaka shi sonyi.

⁸ One latufudiaka ukundji andi uma lu waho wʼulimu andi, ndu uma lu waho wa lukesu, Atomotshiyaka one latukaka asi wula ketshi.

⁹ One latunyaka atui andi uma lʼelembe, Dombelo diandi dieli wononyi.

¹⁰ One latunganyiaka untu lʼusimbwi utsha lu mbuka ka kolo, Ndame kayutambela lu difuku diakandatshimi. Keli untu lʼuluwanyi ayukita diese.

¹¹ Kanga ongonyi atuyakanaka kanga yimba. Keli usi wula leli la ewu, ayuwushula.

¹² Lamʼatulelaka antu wʼololo, lutumbu la wuki latuyalaka. Keli lamʼatunelaka antu wa kolo la wulu, antu watushamaka.

¹³ One latusheka kolo vandi, hatongonaka. Keli one latushulaka ndu latosekaka kolo yandi, ayukama ketshi.

¹⁴ One latukaka Latuyalaka woma tena tshe, eli la otshoko. Keli one latukikitshaka utema andi, ayuyala lu elanyelu.

¹⁵ Uku tambwe kadikita, la uku koi ka ngala, Osoku mbeli untu a kolo latulelaka asi wula.

¹⁶ Uwandji waha la swu atusuyaka antu. Keli one latuhetshaka okomiya, atufudiaka nshi yandi.

¹⁷ Naka untu eko la wutshu wa dikila diʼuntu ukina, Ndi ayali yekeko edja ndu lushi landi la nyoi. Untu lukimanyiaki.

¹⁸ One latokendakendaka lu akambu wʼusimbwi, ayushimbamela. Keli one leli kolo lu mbuka yandi, ayoko esadi.

¹⁹ One lune ekambo kandi, ayuyala la ma kambi. Keli one latuyelaka antu wa kolo, ayuyala la wula.

²⁰ Kanga kolamelu atuludiamaka lʼetshoko. Keli one latusamanyaka dia ngona esadi, atuyalaka la asui.

²¹ Kema ololo ndjala la shonodi yʼantu, Ne dia uma lu kiama ya ma mbatudiakaka untu elembe.

²² Untu lukanga okomiya, atusamanyaka dia ngona, Ku ndi heyi ati: Latuyala la wula.

²³ One latuhangwelaka ukina dia mbungula, ayutana diese lʼokongo diku, Ndeka one leli la lulimi lʼoselo.

²⁴ One latuvaka diango dia shi kana dia nyangu, Ku ndjuta ati: Kema kolo Eli umbekesanedi wʼundanyishi.

²⁵ Kanga utema wʼutaku atutungaka lundju. Keli one latekamaka Latuyalaka, atongonaka.

²⁶ One latekamaka utema andi hita, eli kanga enginya. Keli one latokendakendaka lu akambu a yimba, ayushimbamela.

²⁷ One latushaka usi wula, hatuyalaka la uhumba. Keli one latudihaka ashu andi uma le wo, ayuyala la mananu efula.

²⁸ Keli lamʼatunelaka antu wa kolo la wulu, antu watushamaka. Ku lamʼatuwulanyemaka, antu wʼololo watufulanelaka.