Biblia Todo Logo
Bìoball air-loidhne

- Sanasan -

Tukedi 27 - La Bible en Otetela (Bible K'Ekila) 1991

1 Tuyasemaki dia lui, Ne dia we heyi akambu wayutumbaka la lushi la lushi.

2 Ete untu ukina akutumbuli, aha unyo aye weme; Ongendangenda, aha elomo aye weme.

3 Dive dieli wutshu, ndu losenga leli wutshu. Keli ohenyohenyo wa kanga enginya mbaleka wutshu.

4 Ududu eli kanga usihi, la kele eli kanga pedu. Keli, akona ayeya memala la ntundu ka kandjema?

5 Luhangu la lu seke, Ambuleka ngandji ka lʼusheshe ololo.

6 Puta yʼuma le ongenyi, yatushikikeka kolamelu; Keli anonelo wʼutunyi, watuyalaka lukesu.

7 Utema wakalutshi, watuhetshaka usanga. Keli le untu leli ia ndjala, diango tshe diʼululu diatuyalaka mpe ketu.

8 Uku atekekoka fudu uma lu kefu kato, Osoku mbeli untu latekekoka uma lu dihuli diandi.

9 Iso la malashi wʼupumu watongenyangenyaka utema. Osoku mbatuyalaka alaku wa ngandji wʼuma le ongenyi mpe ketu.

10 Tosekaki ongenyi aye ndu ongenyi wa sho. Tutshoki laka onanyo lushi le ye la asui, Ne dia usukanyi leli lasuki la ye, ambuleka onanyo leli etali ololo.

11 Onʼami, uyali kanga yimba, ongenyangenya utema ami. Ku dimi layeya nkaluya diui le one latomonyolaka.

12 Kanga yewo atenaka elanyelu, atuyasheka. Keli kanga enginya atokolamelaka lokendo, atusuwaka loko.

13 Ose dihondo diʼone letawo nfutela ukina. Ukimeli one lambuyakimo usungi ne dia umuntu akana.

14 One latotshokolaka unyandi lʼaui wʼehangohango kʼolomo la pindju, Dikambu so diatuyalaka uku mananu le ndi.

15 Mvula ka vwa vwa kahahimbo esadi, La umuntu kanga lundju weko pupu.

16 One lalanga mbolembohaya, alembohaya lopepe, Akimeli iso lu lunya landi.

17 Luwulu latudjaka luwulu diesa, Osoku mbatuluwanyaka untu elundji ka unyandi.

18 One latolongosolaka utamba wʼelua, kayole elua uma loko; La one latulamaka khumendi, ayutumbwama.

19 Uku ateneka elundji dedi diato lʼashi, Mbateneka utema wʼuntu le untu.

20 Dihuli diʼEdu la elanyelu hawutunduyaka saki, Ndu ashu wʼuntu pupu.

21 Puki keko dia ndelola fesa, khuka keko ka ntshula paunyi. Keli untu atedikamaka uma lu lutumbu landi.

22 Kuyanga we ayoto kanga enginya lʼetuli, Kame la asami, Enginya kandi humo uma le ndi.

23 Ulimbitelaki nyimba yaye yʼekoko, Ulamaki dungalunga diaye,

24 Ne dia ekundji hawututshikalaka pundju. Dembo dia kusu diayutshikalaka lu nonga tshe uka?

25 Adiyu wa ndesha dungalunga wambuhimbwama, ku wʼomongela wambutumba, Ndu adiyu wa lʼekungu wambuhimbwama.

26 Ana wʼekoko weko, ne dia nkolotsha; Ndu mbudi yeko, ne dia nfuta ushinga wʼekambo.

27 Awele wa mbudi weko wa nkuka ma diaye la dia wa lu luudu laye, Ndu wankutsha ehumba wʼekambi aye wʼamantu.

La Bible en Otetela © Allianee Biblique de la Republique Democratique du Congo, 1991 

Bible Society of the Democratic Republic of Congo
Lean sinn:



Sanasan