Tukedi 26 - La Bible en Otetela (Bible K'Ekila) 1991

¹ Uku ahasungana lungi lʼekama la tshitshi lu nshi ya diyi, la mvula lu nshi yʼowo, Osoku mbahasungana kenemo le kanga enginya.

² Uku esole katatshu utshotsho, uku ndjedi mbatekeko, Okone mananu kambuwudja wudjadja hatshela untu nduku dikambu.

³ Ohehela ne dia falasa, la ushinga ne dia unyo wa punda, La lokodi ne dia okongo wa kanga enginya.

⁴ Tukatuyaki kanga enginya diui uku eli enginya kandi, Utukuyaia enginya uku ndi.

⁵ Ukaluya kanga enginya diui uku eli enginya kandi Ne dia ndi atukayakana ati: Kanga yimba kemi.

⁶ One latutumaka kanga enginya dikendji, Atuyahimbulaka ekulu, ndu atuyatungelaka elanyelu.

⁷ Uku atolendalendaka ekulu wa kanga ekusi, Osoku mbatuyalaka aui wa yimba lʼenyo wʼakanga a dinginya.

⁸ Uku atudjaka untu lowoko lu yukaave, Osoku mbeli untu latolemiaka kanga enginya.

⁹ Uku atotoka tende lu lunya lʼumbidjoki, Osoku mbatuyalaka aui wa yimba lu enyo wʼakanga a dinginya.

¹⁰ Uku atuhumuyaka umbuki wʼuta diango tshe, Osoku mbeli one latotshiyaka kanga enginya lateti kana umbidjoki lʼulimu.

¹¹ Uku atukalulaka fo utsha lu tuwoki yato, Osoku mbatukalulaka kanga enginya utsha lʼenginya kandi.

¹² We atenaka untu latuyakanaka ati: Kanga yimba kendi? Uleki nungamela le kanga enginya uleki le ndi.

¹³ Kanga nende atutaka ati: Tambwe keko lu mbuka, Tambwe keko lu esese!

¹⁴ Uku atukadimokadimoka lukuki la suku, Osoku mbatukadimoka kanga nende lu tangi kandi.

¹⁵ Kanga nende atudjaka lunya landi lu lukinga la ma. Keli ndi atukaka diokoko dia ledia uya lʼunyo andi.

¹⁶ Kanga nende atuyakanaka kanga yimba, Luleki antu esambeli, weya nkaluya aui la yimba.

¹⁷ One latotoka lu dikambu diaha diandi, Eli uku untu latukimeka fo lu atui,

¹⁸ Uku kanga dadi latukaka difuki dia dja, Pitu, la nyoi,

¹⁹ Osoku mbeli untu latukesaka unyandi, Latutaka ati: Nkenya mbakenyasu!

²⁰ Lamʼaha kunyi, dja yatudimalaka; Ndu lamʼaha kanga ushimu, tamu tatushilaka.

²¹ Uku atufudiaka akalanga lumbi la dja, la kunyi dja, Osoku mbatufudiaka kanga lundju tamu.

²² Aui wa kanga sedisedi weli uku ma dia mpe, Diatuhuloka kʼesi utema.

²³ Elomo waheta lʼutema a kolo, Weli uku mbaka kambuwushingula lʼakedi wa fesa.

²⁴ Kanga luhetshu atuyafanyaka ololo lʼelomo andi. Keli ndi atulamaka luhetshu lʼutema andi.

²⁵ Lamʼateketandi aui wa mpe, tetawoki, Ne dia akambu wa kolo esambeli a waki, weko lʼutema andi.

²⁶ Kuyanga ndi atukumbaka luhetshu landi la lukesu, Kolo kandi kayenama hwe la ntundu kʼului wʼantu.

²⁷ One latutshimaka difuku, ayutambela loko; Dive diayukamela one latudingitulaka.

²⁸ Lulimi la kashi latuhetshaka wane watuluhumuyaka, Unyo wʼoselo watutungaka elanyelu.