Tukedi 23 - La Bible en Otetela (Bible K'Ekila) 1991

¹ Lamʼadjaseye dia nde ma laka untu a wuki, Ukaneli one ludjashi la ntundu kaye.

² Naka kanga deshi keye, Uyahimbuli wudi.

³ Tokomiyaki ma diandi dia mpe; Ne dia diango dia lukesu mbedio.

⁴ Tuyahenyahenyaki dia ndjala kanga ongonyi, Tudjaki yimba vaye loko.

⁵ Lamʼayuyudja ashu aye lu ongonyi, vo nshishoka. Mete mete, ongonyi atuyalongoswelaka ahafu wa nfumbo, Uku atufumboka pungu utsha lʼulungu.

⁶ Tolekaki ma dia kanga su dia kolo, Tokomiyaki diango diandi dia mpe.

⁷ Uku atundukanaka yimba lʼutema andi, osoku mbendi. Ndi atukutelaka ati: Uli, ono. Keli utema andi kema kame la ye.

⁸ We ayutuwo ukama wakayali, Ndu ayushisha aui aye wʼololo.

⁹ Toteketaki aui la le kanga enginya, Ne dia ndi ayonyola aui aye wa yimba.

¹⁰ Tosekolaki ulelu wʼedjedja. Totoki lu dikambo dia ana wa tshiki,

¹¹ Ne dia utshungudi awo eli kanga wulu. Ndi ayoteketa la ye dikambu diawo.

¹² Udjaki utema aye lu wetshelu, Ndu atui aye lu aui wa yimba.

¹³ Tosekaki mpangwela ona dia mbungula; Ne dia kuyanga we ayokomola ohehela, ndi havu.

¹⁴ Dieli la ye dia mbokomola lʼohehela, Ku we ayuhandja lumu landi uma lu Dihuli diʼEdu.

¹⁵ Onʼami, naka we ambuyala la yimba, Ku utema ami ayulula lʼongenongeno.

¹⁶ Utema ami ayongenangena Lamʼayutaka elomo aye akambu wʼusimbwi.

¹⁷ Utema aye tawukaki antu wa kolo kandjema. Keli ukaki Latuyalaka woma tena tshe.

¹⁸ Mete mete, ekumelu keko, Ndu elungamelu kaye huyala anyanya.

¹⁹ Onʼami ulungi, uyali kanga yimba; Olombole utema aye lu mbuka kʼusimbwi.

²⁰ Tuyalaki lʼului wa anoshi a wanu, Kuyanga lʼului wʼakanga wa deshi diʼunatshi,

²¹ Ne dia umbidjoki la kanga deshi wayuyala la wula. Unyingunyingu wa djo wayolotsha untu emusu wʼahondo.

²² Uhukami aui wa sho lakakuti, Tonyolaki nyo lamʼayandi usumbi.

²³ Ukundja mete, keli tukisundjaki, Ee, ndu yimba, wetshelu la ewu.

²⁴ Shi untu ololo ayutamanya ngenangena; La one lakuti ona leli la yimba, ayongenangena lu dikambu diandi.

²⁵ Sho la nyo wangenengene; La one lakakuti, ayali la ongenongeno.

²⁶ Onʼami, umbisha utema aye; Ashu aye wangenangenaki lu mbuka yami.

²⁷ Umuntu kanga luseka eli difuku diʼohongo; La umuntu akana eli eteko ka pika.

²⁸ Ndi atuhulamaka uku opotodi, Atufudiaka akambu wa tomboki lʼatei wʼantu.

²⁹ Akona atulelaka ati; Yi! yi! na? Akona atunyangaka ati: Hai! hail na? Akona atuyalaka la tamu? Akona atukiyanaka? Akona atuhumoka puta uhumohumo? Akona ateloka ashu bela?

³⁰ Wane watutshikalaka edja lu no wanu, Wane watutshokaka dia ntuyanga wanu wa losohanya.

³¹ Tendaki wanu lamʼewo tilili, Lamʼatuwukhundokhundoka lu dikoho, Lamʼatuwomenamaka dimena.

³² Lʼekumelu, vo watulumataka untu uku ului, Ndu watokomaka uku kutu.

³³ Ashu aye wayendaka akambu wʼeyuyu, Utema aye ayutundjaka akambu wa kolo.

³⁴ We ayuyala uku untu letami lʼatei ashi a waki, Uku one letami la shodi yʼutamba a mashua.

³⁵ We ayuta wati: Vo wakankomola, keli dimi kumpumo. Vo wakankomola wulu, ku dimi kumbuka nduku engo. Kaandi ayumemo! Dimi layuyanga wanu ako ntu.