Tukedi 16 - La Bible en Otetela (Bible K'Ekila) 1991

Tukedi lu Dikambu Dia Lumu la Ditshelu

¹ Untu katusanguyaka tukanyi lʼutema andi. Keli diui diatukaluyaka unyo, diatuyakaka uma le Latuyalaka.

² Untu ndame atenaka etsha andi tshe ololo utu. Keli Latuyalaka atedikaka etema.

³ Ekamaki Latuyalaka lʼelimu aye tshe. Ku sangweyu diaye diayushikikala.

⁴ Latuyalaka akatungi engo lʼengo dia ntsha ulimu ato, Ee, nuu untu a kolo pupu lu lushi lʼasui.

⁵ Untu tshe lukanga utema wʼutaku eli wononyi le Latuyalaka. Mete mete, ndi huhanda asui.

⁶ Uma lu mete la kolamelu mbatudimanyiamaka kolo; La uma lu woma wa Latuyalaka mbatukadimoka antu uma lu kolo.

⁷ Lamʼatongenangenaka Latuyalaka ditshelu diʼuntu, Ndi atuyalaka ololo kuyanga le atunyi andi.

⁸ Ndjala la diango tshitshe kame la sambu kʼololo, Ambuleka diango efula dieli kame la shonodi ololo.

⁹ Utema wʼuntu atukanaka yimba dia mbuka kandi. Keli Latuyalaka atolombolaka.

¹⁰ Aui wa Unyashungu watuyalaka lʼeomo wa khumʼekanga. Unyo andi hatungaka lʼelumbwelu.

¹¹ Diango dia mbedika wutshu ololo dieli dia Latuyalaka. Diango tshe diatuyalaka lu paya dia mbedika wutshu, dieli ulimu andi.

¹² Dia ntsha kolo eli wononyi le khumi ya dikanga, Ne dia kiti ka diulelu katushikikalaka lu sambu kʼololo.

¹³ Elomo watutaka akambu wʼololo, watongenyangenyaka khumʼekanga. Ndu ndi atulangaka one latutaka aui wʼusimbwi.

¹⁴ Kele ka khumʼekanga eli dikendji dia nyoi. Keli kanga yimba atukilembohayaka.

¹⁵ Lu ngaingai kʼelundji ka khumʼekanga keli lumu; La dia mbukama ketshi le ndi eli uku dingi dia mvula kʼalohoki.

¹⁶ Ndi nkundja yimba ndeka nkundja paunyi olo li! Dia nkundja ewu ndeka nsonola fesa ololo.

¹⁷ Mbuka kʼuntu lʼusimbwi keli dia mumo uma lu kolo. One latulamaka mbuka kandi, atumbaka utema andi.

¹⁸ Utaku katetaka la ntundu kʼelanyelu, La djawudi la ntundu kʼekwelo.

¹⁹ Ndjala la ndjakitshakitsha kame lʼului wʼasi wula, Ambuleka nkahana la kanga utaku diango dia lohotola ololo.

²⁰ One latulungaka diui atuhumoka lukulu lʼolo. La one latekamaka Latuyalaka eli lʼongenongeno.

²¹ One leli la utema a yimba, atetamaka ati: Kanga ewu. Elomo wa memakana watuhamiaka yimba.

²² Yimba eli eteko ka lumu le kanga yo. Sui dia akanga a dinginya eli enginya kawo.

²³ Utema wa kanga yimba atulakanyaka unyo andi, Ndu atufudiaka yim ba lu elomo andi.

²⁴ Aui wʼamena weli uku ehihi wʼusanga, Watongenyangenyaka utema, watokonoyaka weka.

²⁵ Mbuka kemotshi kateneka ololo lu ashu wʼuntu. Keli ekumelu kato eli nyoi.

²⁶ Ndjala kʼukambi ekambo katukimanyiaka, Ne dia unyo andi atusukuyaka utsha leko.

²⁷ Epipi kʼuntu atuyangaka kolo; Ndu elomo andi ndjalaka uku dja yaheta.

²⁸ Kanga atui wulu atutungaka lundju. Kanga sedisedi katatanyaka engenyi a wulu.

²⁹ Kanga ngala atukesaka unyandi, Atolombolaka lu mbuka ka kolo.

³⁰ Ndi atudihaka ashu andi dia nsanguya akambu wa luhukutui. One latokomaka elomo andi, katufudiaka kolo.

³¹ Ote wa ndjui eli lufule la nemo. Vo watutanameka lu mbuka kʼololo.

³² One lahatukaka kele esadi, ambuleka kanga wulu ololo. La one latuyaulelaka, ndeka one lambolembia usumba ololo.

³³ Uwali watukamaka, Keli esonwelo ka nde uwali keli paka le Latuyalaka.