Tukedi 14 - La Bible en Otetela (Bible K'Ekila) 1991

¹ Umuntu tshe lukanga yimba atuluwanyaka luudu landi. Keli kanga enginya atuluhandjulaka lʼanya andi.

² One latokendakendaka lu akambu wʼusimbwi, atukaka Latuyalaka woma. Keli one latunganelaka lu mbuka yandi, atuwonyolaka.

³ Unyo wa kanga enginya watuyangelaka okongo andi ohehela. Keli elomo wʼakanga a yimba watalamaka.

⁴ Lene aha ngombe, nduku engo katuyalaka lu dipenge. Keli diango diatufulaka ne dia wulu a ngombe.

⁵ Omenyi wa kolamelu hatutaka kashi. Keli omenyi waha mete, atutaka kashi.

⁶ Kanga losoko atuyangaka yimba, ku hayitani. Keli ewu atuyakaka esadi le kanga yimba.

⁷ Umo la le kanga enginya, Ne dia we hutana ewu wʼelomo andi.

⁸ Ewu ka kanga yimba atulimbitshiyaka mbuka kandi. Keli utshatsha wʼakanga a dinginya watadimbiyaka.

⁹ Akanga a dinginya watokenyaka la kolo. Keli kenemo katuyalaka lʼatei wʼantu wʼusimbwi.

¹⁰ Utema ateyaka lokonyo lawo hita. Ongendangenda hatotoka lʼongenongeno awo.

¹¹ Luudu lʼuntu a kolo layulanyema. Keli etumbu kʼuntu lʼusimbwi ayuluwana.

¹² Mbuka kemotshi kateneka ololo lu ashu wʼantu, Keli ekumelu kato eli nyoi.

¹³ Kuyanga lʼatei a tola, lunyangu latuyalaka lʼutema. La ekumelu kʼongenongeno eli asui.

¹⁴ One lukanga utema wambunganela, atulutaka la ditshelu diandi, Ku untu ololo la ditshelu diandi.

¹⁵ Kanga enginya atetawoka aui tshe wata antu. Keli kanga ewu atushishimaka mbuka katandatshu.

¹⁶ Kanga yimba atuyakimelaka, atukadimoka uma lu kolo. Keli kanga enginya hatuyakimelaka, atutshaka utshatsha.

¹⁷ One latukaka kele esadi, atutshaka akambu wa nginyanginya. Keli one luludi too lʼusihi, atuyayangelaka luhetshu.

¹⁸ Kanga enginya ayukita nginyanginya. Keli kanga ewu atuyalimbeka yimba.

¹⁹ Kolo atukhusamelaka ololo, Ndu untu a kolo la suku diʼuntu ololo.

²⁰ Usi wula atutunamaka ndu le usukanyi andi. Keli kanga ongonyi atuyalaka la engenyi efula.

²¹ One latonyolaka unyandi, atutshaka kolo. Keli one latukaka usi wula ketshi, atuyalaka lʼongenongeno.

²² Wane watukanaka yimba lu kolo, hawutunganelaka uka? Wane watutshaka ololo watutanaka mete la kolamelu.

²³ Lu wehu tshe wʼelimu, mbatuyalaka waho. Keli etelu kʼaui atu, atotolaka untu lu wula.

²⁴ Dembo dia kusu diʼakanga a yimba eli ekundji awo. Nginyanginya yʼakanga dinginya eli enginya.

²⁵ Omenyi wa mete atutshungulaka etema. Keli omenyi waha mete, atutaka kashi.

²⁶ One latukaka Latuyalaka woma, keli la usuko a wulu; Anʼandi wayukundja dihuli dia mbishama.

²⁷ Woma wa Latuyalaka eli eteko ka lumu, Dia untu mpanda tulunga ta nyoi.

²⁸ Lu efula kʼantu, keli lutumbu la khumʼekanga. Keli lu ekitekitelu kʼantu, keli elanyelu kʼuwandji.

²⁹ One lahuki kele esadi, atuyalaka la yimba efula. Keli one latumalaka esadi, atuhamiaka akambu wʼenginya.

³⁰ Utema wa ki atuluwanyaka dimba. Keli okomiya atohondjaka weka.

³¹ One latusuyaka usi wula, atotengaka Utungi andi. Keli one latukaka omenyi fono ketshi, atolemiaka Utungi.

³² Untu a kolo atolembiamaka uma lʼetsha andi wa kolo. Keli untu ololo atutanaka eshamelu kuyanga lu nyoi kandi.

³³ Yimba yatudjaseka lʼutema wa kanga ewu. Keli akambu watuyalaka lʼetema wa dinginya, watenamaka.

³⁴ Sambu kʼololo atediaka wudja. Keli kolo atutshaka antu sonyi.

³⁵ Ololo a khumʼekanga atuyalaka le ukambi, latukambaka la ewu. Keli kele kandi katuyalaka le one latuwutshaka sonyi.