Tukedi 13 - La Bible en Otetela (Bible K'Ekila) 1991

¹ Ona la yimba atuhukamaka wetshelu wa shi. Keli kanga dionyo huki diata untu.

² Uma lʼulua wa unyo wʼuntu ololo, mbayundoleka diango diʼololo. Keli saki kʼakanga a lukesu eli ngala.

³ Untu latulamaka unyo andi, atulamaka lumu landi. Keli one lataseka unyo andi, ayulanyema.

⁴ Utema wa kanga nende atokomiyaka diango diahandeyi nkundja. Keli utema wa kanga kolamelu ayulutshama.

⁵ Untu ololo atuhetshaka kashi. Keli untu a kolo atonywamaka, atutshamaka sonyi,

⁶ Sambu kʼololo atulamaka untu lʼusimbwi lu mbuka kandi. Keli kolo katulanyaka untu a kolo.

⁷ Untu omotshi atuyadimbiyaka ati: Kanga ongonyi kemi, lamʼendi kema la engo. Keli untu ukina atutaka ati: Usi wula kemi, lamʼendi la ongonyi.

⁸ Etshungwelu ka lumu lʼuntu eli ukundji andi. Keli usi wula heyi ndjala la etshungwelu.

⁹ Usasi wʼuntu ololo watohetaka. Keli tala diʼuntu a kolo diatudimalaka.

¹⁰ Uma lʼutaku, mbatuyakaka ta. Keli one latukaka alaku wʼololo, atuyalaka la yimba.

¹¹ Ukundji watuwukundjaka ukundjakundja, watukitakitaka. Keli one latukundjaka yema yema uma lʼulimu andi, ayongona efula.

¹² Elungamelu kʼengo kahakumi esadi, katukiaka utema kandji. Keli lamʼakuma engo kalungamelandi, to katuyalaka uku utamba a lumu.

¹³ One latutunaka diui, atuyalanyaka. Keli one latukaka elembe woma, ayulungula difutu.

¹⁴ Wetshelu wa kanga yimba weli eteko ka lumu, Wa nsikisula untu uma lu tulunga ta nyoi.

¹⁵ Yimba yʼololo yatuhumuyaka untu lukulu lʼolo. Keli mbuka ka wane waha la mbetawo keko elanyelu kawo.

¹⁶ Usi yimba tshe atukambaka lʼewu. Keli kanga enginya atenyaka antu enginya kandi.

¹⁷ Dikendji dia kolo atusukuyaka antu utsha lu kolo. Keli dikendji dia kolamelu atuluwanyaka akambu.

¹⁸ Wula la sonyi watuyakaka le one latutunaka wetshelu. Keli one latulungaka luhangu, atolemiamaka.

¹⁹ Ekundjelu kʼengo kalanga untu, atongenyangenyaka utema. Keli akanga a dinginya watukaka wononyi dia mumo uma lʼakambu wa kolo.

²⁰ One latengolaka kame la akanga a yimba, atuyalaka kanga yimba. Keli one latekesanelaka la akanga a dinginya, atuhumoka lukulu lʼengeno.

²¹ Kolo katuyelaka antu wa kolo. Keli difutu diʼuntu ololo eli diese.

²² Untu ololo atutshikelaka ekana andi ukito. Keli ukundji wʼuntu a kolo atumbamaka dikambu diʼuntu ololo.

²³ Ekambelu kʼusi wula katongonyaka mbu ya nde efula. Keli motshi yatulanaka, ne dia uhumba wa sambu kʼololo.

²⁴ One lahetawo nkomola onʼandi ohehela, atuhetshaka. Keli one latukaka onʼandi ngandji, atokomolaka tena dimotshi dia mbungula.

²⁵ Antu wʼololo watolekaka, watulutaka. Keli antu wa kolo wayudienaka la ndjala.