Tukedi 12 - La Bible en Otetela (Bible K'Ekila) 1991

¹ One latulangaka ekiyelu atulangaka ewu. Keli one latutunaka luhangu, eli enginya.

² Untu ololo ayuhumo lukulu lʼolo le Latuyalaka. Keli untu latukanaka tukanyi ta kolo, ayudjama mananu le Latuyalaka.

³ Akambu wa kolo hawushikike untu. Keli etshina kʼuntu ololo hasutshasutshamaki.

⁴ Wadi ololo eko dembo dia kusu dia umendi. Keli wadi latushaka akambu wa sonyi, eli ehondelo ka weka wʼumendi.

⁵ Tukanyi tʼantu wʼololo teli uluwanyi. Keli tukanyi tʼantu wa kolo teli lukesu.

⁶ Aui wʼantu wa kolo watushamaka dia ntundja dikila. Keli enyo wʼantu wʼusimbwi wayashimbela.

⁷ Antu wa kolo watulanyemaka, ku hawuyenama ntu. Keli luudu lʼuntu ololo layushikikala.

⁸ Untu ayolemiama uku eli yimba yandi. Keli untu a kolo ayonywama.

⁹ Ndjala la ndjakitshakitsha la ndjakambela ulimu Ndeka ndjasema la mpumba ma ololo.

¹⁰ Untu ololo atukanelaka elungalunga kandi. Keli utema wʼuntu a kolo atuyalaka la usihi.

¹¹ One latukambaka ekambo kandi katuyalaka la mbu ya nde. Keli one latuyelaka akambu wʼanyanya, kema la yimba.

¹² Etangelu ka wulu kʼuntu a kolo kutsha nana. Keli etshina kʼuntu ololo katushikikalaka.

¹³ Untu a kolo atutalaka lu aui andi wa kolo. Keli untu ololo atuhandaka uma lʼasui.

¹⁴ Untu ayulutshama la diango diʼololo uma lʼelua wa unyo andi, La untu lʼuntu ayulungula uku akandakambi lʼanya andi.

¹⁵ Mbuka ka kanga enginya katusimboka too lu ashu andi. Keli kanga yimba katukaka alaku.

¹⁶ Kele ka kanga enginya katenamaka esadi. Keli kanga yimba katuyakimeka lu lotengo.

¹⁷ Umvutshi a mete katuhamiaka ololo. Keli omenyi a kashi katuhamiaka lukesu.

¹⁸ Aui a wutata watuhumuyaka untu uku yombo. Keli lulimi la kanga yimba mbatokonoyaka.

¹⁹ Elomo watutaka mete, watushikikalaka pundju. Keli lulimi la kashi latutshikalaka tshinyitinyi tshu.

²⁰ Lukesu leko lʼetema a wane watukanaka akambu wa kolo. Keli wane watulangaka ki, watongenangenaka.

²¹ Nduku dikambu dia kolo diatukumaka le untu ololo. Keli untu a kolo ayuyala la asui efula.

²² Nimi ya kashi yeli wononyi le Latuyalaka. Keli wane watutaka akambu wa mete mbatongenyangenyaka.

²³ Kanga yimba katusheka ewu kandi. Keli etema wʼakanga a dinginya watudianganyaka akambu wa djeli.

²⁴ Lunya la kanga kolamelu layulela antu. Keli kanga nende ayudjama lʼulimu a wulu.

²⁵ Lunyangu lʼutema wʼuntu latolembiaka. Keli diui diʼololo diatongenyangenyaka.

²⁶ Untu ololo atukadimoka uma lu kolo. Keli mbuka kʼantu wa kolo katalombolaka utsha lʼelanyelu.

²⁷ Kanga nende hatufumbaka nyama kakandandji lu winga. Keli kanga kolamelu atukundjaka diango diʼushinga a wulu.

²⁸ Lu vuka yʼakambu wʼololo keli lumu. Keli mbuka ka engelu katelelaka utsha lu nyoi.