Tukedi 11 - La Bible en Otetela (Bible K'Ekila) 1991

¹ Engo ka mbedika wutshu la lukesu, eko wononyi le Latuyalaka. Keli edikelu ka mete katongenyangenyaka.

² Lamʼatuyakaka utaku, katuyakaka ndu sonyi. Keli yimba yatuyalaka kame la kanga ndjakitshakitsha.

³ Akambu wʼusimbwi wʼantu wʼuluwanyi mbatolombolaka. Keli akambu wahasimbwi wʼakanga wʼukadi mbatalanyaka.

⁴ Ukundji hakimanyia antu lu lushi la kele. Keli sambu kʼololo katutshungulaka antu uma lu nyoi.

⁵ Sambu kʼololo kʼukilami ayuluwanya mbuka kandi. Keli untu a kolo ayoko ne dia kolo kandi.

⁶ Sambu k ololo kʼantu wʼusimbwi ayashimbela. Keli akanga wʼuhedia wayundama lu kolo yawo.

⁷ Lamʼatuvokaka untu a kolo, elungamelu kandi katushilaka. Ekungelu kʼuntu a kolo keko anyanya.

⁸ Untu ololo atutshungwamaka uma lʼasui. Keli untu a kolo atundamaka loko.

⁹ Aui wʼuma lʼunyo wʼuntu a kolo watulanyaka unyandi. Keli antu wʼololo watutshungwamaka la ewu.

¹⁰ Lamʼatongonaka antu wʼololo, usumba wʼutundu watongenangenaka. Keli lamʼatulanyemaka antu wa kolo, antu watudjaka waelu wʼongenongeno.

¹¹ Usumba watediamaka uma lʼetshoko wʼuntu lusimbwi. Keli vo watuhandjwamaka uma lʼunyo wʼuntu a kolo.

¹² One latonyolaka unyandi kema la yimba. Keli kanga ewu atolembohalaka.

¹³ Kanga tushimu atushulaka akambu wa usheshe. Keli kanga utema wa kolamelu atuwalamaka.

¹⁴ Lamʼeli kema yimba ya nombola antu, wudja watokokaka. Keli panda keko lamʼeli ului wʼandaki a yimba.

¹⁵ One latuyakimoka usungi le ongendangenda, atusuwaka lu dikambu diako. Keli one latutunaka ndjakimo usungi, atuyalaka la ki.

¹⁶ Umuntu leli la ngandji ka mamba, atuyalaka la nemo. Keli apami wa ngala watuyalaka la ekundji.

¹⁷ Kanga ketshi atutshelaka lumu landi ololo. Keli kanga usihi atutshelaka dimba diandi hita kolo.

¹⁸ Untu a kolo atulungulaka waho wa lukesu. Keli one latuneke akambu wʼololo, keli la difutu dia mete.

¹⁹ Okone ololo atolombolaka untu utsha lu lumu. Keli one latuyelaka akambu wa kolo, ayutana nyoi.

²⁰ Wane weli la etema a kolo, weko wononyi le Latuyalaka. Keli wane wʼusimbwi lu ditshelu diawo, watongenyangenyaka.

²¹ Eyi mete wati: Untu a kolo hutshikala aha la sui. Keli wane weli ololo, wayushimbamela.

²² Uku shingu dia paunyi lʼohembe a sumbu, Osoku mbeli umuntu la dimena laha la ewu.

²³ Lulangu lʼuntu ololo kumelaka paka ololo utu. Keli ekungelu kʼuntu a kolo keli paka kele.

²⁴ One latukahaka efula, atulungulaka efula. Keli kanga unyishi atuhumbaka diango.

²⁵ Kanga utema a lukahu atuhamaka. One latushaka antu ashi wa no, wayuwusha ndu ndi.

²⁶ One latudimanaka mbu ya nde, atudjamaka mananu le antu. Keli one latuyisundiaka, atuyalaka la otshoko.

²⁷ One latokolamelaka nyanga akambu wʼololo, atuyayangelaka diese. Keli one latuyangaka akambu wa kolo, akambu ako wayuwunda.

²⁸ One latekamaka lʼongonyi andi, ayoko. Keli untu ololo atuluwanaka uku songusongu yʼakatshi.

²⁹ One latohenyahenyaka wa lu luudu landi, ayusangula paka lopepe. La kanga enginya ayukambela kanga yimba ulimu.

³⁰ Elua wʼuntu ololo weli utamba a lumu. Ndu kanga yimba atuhandjaka nyumu yʼantu.

³¹ Enda, untu ololo atulungulaka difutu diandi la kete. Keli untu a kolo la undjaki wʼelembe watulungulaka difutu dia otekoya.