Tito 3 - La Bible en Otetela (Bible K'Ekila) 1991

Eshimbamelu Uma lu Mbetawo la Ehilwelu kʼUyuyu

¹ Uwauhuli dia mbetawo embuledi, ndu ewandji, la dia ndjala la ukitanyia, la dia ndjalongosola lu elimu wʼololo tshe.

² Tawotengaki untu, tawuyalaki la ngala, keli wayali la memakana, wenya antu tshe ndjakitshakitsha lu akambu tshe.

³ Ne dia ndu shu mbaki dinginya ntundu, taki la uhedia, takadimbiyama, takayala la lutunu la kandjema, la djawudi, takahetshanya.

⁴ Keli lamʼakene ketshi ka Unyashungu, Ushimbedi asu, la ngandji kandi le antu,

⁵ aha dia etsha wʼololo wakatatshi shame, keli ne dia ketshi kandi mbakandatushimbela uma lu diotshelo dia mbuto kʼuyuyu la ehilwelu kʼuyuyu ka le Nyuma kʼOlolo,

⁶ kakandatutshulwela uma le Jesu Kristu, Ushimbedi asu;

⁷ dia shu nyindjama lu ngandji kandi ka mamba, shu tayeya ndu ndjala ekito lu elungamelu ka lumu la pundju.

⁸ Diui ne dieko mete. Dimi nangaka we mvuta akambu ane la eteti, dia wane waketawo Unyashungu ntetemala vame lu ditshelu diʼololo. Akambu aso weko ololo ndu waho le antu.

⁹ Keli utuni dimbwanelu dia dinginya, ndu akambu wa nonga yʼantu, ndu etshanelu, ndu tamu tʼelembe. Akambu ako kema waho, ndu weko anyanya.

¹⁰ Utuni umbatudi lamʼayuyuhunwela etena otoi kana tena pendi.

¹¹ Eyi wati: Untu ako ambunganela, ambutsha kolo, ambuyamia.

Aui le Antu Amotshi

¹² Lamʼayumukutumela Aratema, kuyanga Tukiko, kuhimbi la wulu aye tshe dia we ndja le mi la Nikopoli, ne dia dimi lambusanguya mbidjase leko lʼeleku ka tshitshi.

¹³ Utumi Zenasi, umbeyi wʼelembe, la Apolo lu lokendo lawo esadi; vo tawuhumbaki engo.

¹⁴ Ndu asikasu weki lama ntsha elimu wʼololo dia nungula diango diahumbawo, diaha vo ndjala waha la elua.

¹⁵ Weli la mi tshe wambukutumela moyo. Umemweli wane tshe watulanga lu mbetawo moyo. Ngandji ka mamba kayali la nyu, nyu tshe!